Wahn lee wail afta 1940, mi payrents mi stodi di Baibl wid Jehoava Witnisiz. Laytaraan dehn mi stap stodi, bot mai ma mi kantinyu geh di Wachtowa an Awayk! magazeen dehn. Eena 1950 mee ahn mi famili mi aksep di invitayshan fi goh da di intanashanal kanvenshan weh mi hapm da New York City.

Noh tu lang afta dat, Brada Lawrence Jeffries mi staat tu vizit wi. Hihn mi chrai help mi laan di chroot. At fers, Ai neva gree wid ahn bowt wai Jehoava Witnisiz noh jain di aami er geh involv wid eniting weh ga fi du wid palitiks. Ai mi tel ahn dat if evribadi eena America mi rifyooz fi goh da waar, den sohn enimi kuda kohn ahn tek oava di hoal konchri. Brada Jeffries mi payshent wid mi, an ih aks: “Weh yu tink Jehoava Gaad mi wahn du if evribadi eena America mi-di serv hihn ahn dehn wuda geh atak?” Di way how hihn mi reezn wid mi pahn dehndeh tingz mi help mi fi si dat Ai mi rang. Dat mi mek Ah waahn laan di chroot.

Ai mi spen wahn lata taim di reed Di Wachtowa an Awayk! magazeen dehn weh mai ma mi put op eena di baysment. Den, Ah mi riyalaiz dat Ah mi-di laan di chroot, soh Ah mi aksep wahn Baibl stodi fahn Brada Jeffries. Ah mi aalso staat tu goh da aala di meetin dehn. Ai lov weh Ah mi-di laan, an Ah mi ton wahn poblisha. Wen Ai mi laan dat “di grayt day a Jehoava deh kloas,” mai goalz mi chaynj. (Zeph. 1:14) Insteda goh da yooniversiti, Ah mi waahn help peepl laan di chroot.

Ah mi grajuayt fahn hai skool pahn Joon 13, 1956, ahn chree dayz afta dat, Ah mi geh baptaiz da wahn serkit asembli. Ai  neva noa dat Ah wuda geh soh moch blesin fahn Jehoava bikaaz Ah chooz fi laan bowt hihn ahn fi teech adaz bowt ahn.

Ai mi staat regyula painyaa siks monts afta Ai mi geh baptaiz. Di Disemba 1956 Kingdom Ministry mi gat een wahn aatikl weh naym “Can You Serve Where the Need Is Great?” Dat da sohnting Ai kuda mi du. Ah mi waahn goh sohnweh wehpaat onli lee bit a peepl mi-di preech di gud nyooz.—Mach. 24:14.

Ah gaahn liv eena wahn tong weh naym Edgefield, da South Carolina. Di kangrigayshan mi onli ga foa poblisha, bot wid mee ih gaan op tu faiv. Ahn wi yoostu ga meetin eena wahn brada hows. Evri mont Ah wuda spen 100 owaz eena feel servis. Ah mi bizi di tek di leed eena feel servis ahn di gi taak eena di kangrigayshan. An ih mi inchrestin fi si dat di moa Ah werk eena di kangrigayshan, di moa Ah mi laan bowt Jehoava tu.

Wahn laydi weh Ah doz stodi wid mi oan wahn finaral hoam da wahn tong weh naym Johnston, weh neva deh tu faar. Shee mi soh kain dat ih gi mi wahn paat-taim jab, an ih mi alow wi fi ga meetin eena wahn smaal bildin weh mi bilangz tu shee.

Brada Jolly Jeffries, weh da di son a di brada weh mi stodi wid mi, mi kohn fahn New York, an ih mi geh fi bee mai painyaa paadna. Wi mi liv eena wahn smaal chrayla weh wahn brada mi len wi.

Dong eena di sowt dehn wuda pay cheep. Dehn wuda pay too er chree dalaz fi di day. Wan taim, Ai mi gaahn da shap an Ah mi yooz di laas lee bit a moni weh Ah mi ga fi bai sohn food. Wen Ah mi finish bai, wahn man kohn aks mi: “Yu waahn wahn jab? Ah wahn pay yu dala fi di owa.” Hihn mi mek Ah werk fi chree dayz di kleen op wahn kanschrokshan sait. Ih mi klayr fi si dat Jehoava mi-di help mi fi mek Ah stay da Edgefield. An Ah mi stil get fi gaahn da di 1958 intanashanal kanvenshan da New York City.

Pahn di sekant day a di kanvenshan, sohnting speshal mi hapm. Ah meet Ruby Wadlington, weh mi-di serv az wahn regyula painyaa da Gallatin, Tennessee. Di too a wi mi waahn bee mishineri, soh wi mi gaahn da di Gilyad meetin da di kanvenshan. Laytaraan, wi staat tu rait letaz tu eech ada. Den dehn mi invait mi da Gallatin fi gi wahn poblik taak. Ah mi tek da apachooniti fi aks Ruby if ih waahn marid mi. Ah mi moov tu Ruby kangrigayshan, ahn wi geh marid eena 1959.

Ah mi geh apointid fi serv az di kangrigayshan servant (dat da weh wi yoostu kaal di koardinayta a di badi a eldaz) da Gallatin wen Ah mi 23 yaaz oal. Wee da-mi di fers  kangrigayshan weh Brada Charles Thompson mi vizit az wahn serkit oavaseeya. Hihn mi ga lata ekspeeryens, bot hihn yoostu stil aks mi weh di bradaz dehn need ahn how ada serkit oavaseeya weh mi kohn bifoa mi deel wid dehndeh tingz. Ah mi laan fahn hihn dat ih gud fi aks kweschanz ahn geh aala di deetaylz bifoa yu mek wahn disizhan bowt wahn sertn mata.

Eena May 1964, dehn mi invait mi fi goh da di Kingdom Ministry School weh dehn mi ga da South Lansing, New York. Dis skool mi tek wan mont fi finish. Di bradaz weh mi kandok dis skool mi mek Ah waahn laan eevn moa bowt Jehoava ahn jraa kloasa tu hihn.

Eena Janiweri 1965, di branch mi invait mee ahn Ruby fi bee paat a di serkit werk. Fi wee serkit mi kova wahn big ayrya fahn Knoxville, Tennessee, aalmoas aal di way tu Richmond, Virginia. Ih mi aalso inklood kangrigayshanz da North Carolina, Kentucky, ahn West Virginia. Ah mi vizit onli di blak bradaz ahn sistaz bikaaz di segregation laa dehn eena di sowt a di United States neva alow blak peepl fi meet tugeda wid wait peepl. Di bradaz dehn mi poa, soh wi laan fi shayr weh wi mi gat wid dehn wan weh need. Wahn serkit oavaseeya weh ga lata ekspeeryens mi teech mi wahn veri impoatant lesn. Hihn mi seh: “Bee wahn brada tu di bradaz ahn sistaz. Noh goh vizit dehn ahn bee laik wahn baas. Yoo ku help dehn onli if dehn si yu az dehn brada.”

Wail wi mi-di vizit wahn smaal kangrigayshan, Ruby mi staat wahn stodi wid wahn yong laydi weh mi ga wahn lee daata weh wan yaa oal. Wen nobadi eena di kangrigayshan kuda mi kandok di stodi, Ruby mi du it chroo letaz. Di neks taim wi mi vizit, di yong laydi mi staat kohn da aala di meetin dehn. Laytaraan, too speshal painyaa sistaz mi geh asain tu da kangrigayshan, ahn dehn mi kantinyu stodi wid ahn. Ahn noh lang afta dat, shee mi geh baptaiz. Den 30 yaaz layta, eena 1995, da Patterson Betel, wahn yong sista inchrojoos ihself tu Ruby. Shee da-mi di daata a di laydi weh Ruby mi stodi wid. Di yong sista an ih hozban da-mi paat a di 100th klaas a Gilyad Skool.

Wi sekant serkit da-mi Central Florida. Joorin da taim wi mi need wahn kaar, soh wi en op di bai wahn cheep wan. Bot pahn da saym week di waata pomp gaan een. Ahn wi mi brok, soh wi kudn fiks it. Soh Ah mi kaal wahn brada weh Ah tink kuda mi fiks it, an ih mi aks wan a ih werkaz fi fiks it. Afta dat, hihn neva waahn mek wi pay far it. Hihn mi seh: “Yu noh oa mi notn.” Pahn tap a dat, hihn mi gi wi moni az wahn gif! Dat da-mi wahn byootiful egzampl a how Jehoava tek kayr a ih peepl. Ih mi rimain wi dat wi need fi giv tu adaz.

Evritaim wi wuda vizit wahn kangrigayshan, wi geh fi stay da wahn brada hows. Ahn bikaaz a dis, wi mi geh fi mek wahn lata gud frenz. Wan day, Ah staat taip mi ripoat bowt di kangrigayshan, bot den Ah neva finish it an Ah mi haftu goh owt. Wen Ah mi kom bak eena di eevnin, Ah mi fain owt dat di lee chree-yaa-oal son a di famili weh wi mi-di stay wid mi “help” mi finish taip di ripoat. Ah mi teez ahn bowt dat fi yaaz.

Eena 1971, Ah mi geh wahn leta weh asain mi fi serv az dischrik oavaseeya da New York City. Wi mi sopraiz! Ah mi jos 34 yaaz oal wen wi moov deh. Di bradaz dehn mi welkom mi. Ai da-mi dehn fers blak dischrik oavaseeya.

Az wahn dischrik oavaseeya, Ai mi injai teech adaz da di serkit asembli evri weeken. Wahn lata di serkit oavaseeya mi ga moa ekspeeryens dan mee. Wan a dehn mi gi di baptizm taak wen Ai mi geh baptaiz. Laytaraan, wahn nada brada, weh naym Theodore Jaracz, mi geh fi bee paat a di Govanin Badi. Dehn mi aalso ga bradaz wid lata ekspeeryens weh mi-di serv da Brooklyn Betel. Ah soh tankful dat di serkit oavaseeya dehn ahn di Betelait dehn mi mek Ah feel komfatabl. Ah mi geh fi si how dehnya lovin shepad mi sopoat di aaganaizayshan ahn how dehn mi rilai  pahn Jehoava. Bikaaz dehn mi hombl, ih mi mek it eeziya fi serv az di dischrik oavaseeya.

Eena 1974 di Govanin Badi mi asain wahn neks groop a serkit oavaseeya fi bee dischrik oavaseeya. Soh Ah mi geh asain fi bee wahn serkit oavaseeya agen, bot dis taim Ah mi gaahn serv da South Carolina. Bai dis taim, di blak ahn wait kangrigayshan dehn kuda mi meet tugeda, an aala di bradaz mi hapi bowt it.

Rong di en a 1976, Ah mi geh asain fi du serkit werk da Georgia bitween Atlanta ahn Columbus. Ah stil rimemba wen Ah mi gi di finaral taak fi faiv blak pikni weh mi ded bikaaz wahn groop a peepl mi bon dong dehn hows. Dehn ma mi en op da haaspital kaaz shee mi geh hert bad. Wen shee mi deh eena haaspital, wahn lata blak ahn wait bradaz ahn sistaz mi kip aan di kohn vizit dehn fi komfert dehn. Ah mi reeli geh fi si humoch lov di bradaz ahn sistaz mi gat. Wen Jehoava peepl dehn shoa dis kaina lov tu wan anada, ih help dehn fi bayr op chroo eni sichuwayshan.

Eena 1977 dehn mi asain wi fi goh da Brooklyn Betel fi wahn fyoo monts fi help owt wid wahn proajek. Wen da proajek mi soon finish, too membaz fahn di Govanin Badi mi meet op wid mee. Ahn dehn aks if wi wuda bee wilin fi stay ahn kantinyu werk da Betel. Soh wi mi aksep di invitayshan.

Ah mi werk eena di Servis Dipaatment, wehpaat di bradaz yoozhwali haftu ansa sohn reeli komplikaytid kweschanz. Fi soh moch yaaz now, di Govanin Badi di gaid wi bays pahn Baibl prinsiplz. Dis da weh di bradaz eena di Servis Dipaatment yooz fi ansa kweschanz, an ih aalso geh yooz fi chrayn serkit oavaseeyaz, eldaz, ahn painyaaz. Dis chraynin help wahn lata bradaz fi groa spirichwali. Sayka dis, Jehoava aaganaizayshan geh schranga.

Fahn 1995 tu 2018, Ah mi vizit di difrent branch aafis az wahn reprizentativ a di hedkwaataz. Bak den, dehn yoostu kaal it wahn zoan oavaseeya. Ah mi meet op wid di Branch Komiti dehn, sohn Betelait, ahn mishineriz fi inkorij ahn help dehn wid eni kansaan weh dehn mi gat. Di bradaz ahn sistaz weh shayr dehn ekspeeryens wid mee ahn Ruby mi inkorij wi wahn lat. Fi egzampl, wi mi vizit Rwanda eena 2000. Ih mi reeli toch wi haat fi hyaa how di bradaz ahn di Betel famili mi servaiv chroo di waar eena 1994. Eevn doa wahn lata dehn famili membaz ded, dehn mi ga fayt ahn hoap, ahn dehn mi stil hapi.

Wi don oava 80 yaaz oal now, ahn fi di paas 20 yaaz Ah di serv wid di United States Branch Komiti. Ah neva gaahn da yooniversiti, bot Ah geh di bes ejukayshan fahn Jehoava ahn fi hihn aaganaizayshan. Dis chrayn mi fi teech peepl di chroot fahn di Baibl weh wahn help dehn now an eena di fyoocha. (2 Kor. 3:5; 2 Tim. 2:2) Ah geh fi si how di Baibl help wahn lata peepl fi ga wahn beta laif ahn fi ga wahn rilayshanship wid dehn Kriyayta. (Jay. 4:8) Mee ahn Ruby wuda yooz evri apachooniti weh wi geh fi inkorij adaz fi valyu di privilij weh dehn ga fi serv Jehoava ahn teech adaz bowt di Baibl. Dis da wan a di graytis privilij weh wahn servant a Jehoava ku injai!