1. Wai wi noh sopraiz fi si dat peepl eena di werl noh chros eech ada?

 PEEPL eena Saytan werl noh noa hoo dehn ku chros. Dehn kyaahn chros nobadi, kaaz di leedaz eena bizniz, palitiks, ahn rilijan lai ahn cheet dehn. Dehn kyaahn chros dehn frenz, naybaz, an eevn famili membaz. Dis noh fi sopraiz wi, bikaaz di Baibl mi prafesai dat eena “di laas dayz . . . , peepl . . . noh wahn bee laayal. . . . Dehn wahn slanda eech ada, . . . Dehn wahn bichray wan anada.” Dat meenz dat peepl wahn bee laik Saytan, di gaad a dis werl, weh nobadi ku chros.—2 Tim. 3:1-4; 2 Kor. 4:4.

2. (a) Hoo wi ku reeli chros? (b) Weh som a wi mait wanda bowt?

² Az Kristyanz, wee noa dat wee ku chros Jehoava eena evriting. (Jer. 17:7, 8) Wee kanvins dat hihn lov wi ahn dat hihn “wahn neva abandan” fi hihn frenz. (Ps. 9:10) Wi ku aalso chros Jeezas Krais bikaaz hihn mi giv op ih laif fi wi. (1 Peet. 3:18) Ahn wi don laan fahn wi oan ekspeeryens dat wi ku chros di gaidans weh wi geh fahn di Baibl. (2 Tim. 3:16, 17) Soh wee noa dat wi ku chros Jehoava, Jeezas, ahn di Baibl. Bot wi mait wanda if wi ku aalwayz chros di bradaz ahn sistaz eena di kangrigayshan. An if wi kud chros dehn, den di kweschan da wai wi ku chros dehn.

3. Weh speshal privilij wi gat? (Maak 10:29, 30)

³ Jehoava chooz wee fi bee paat a fi hihn werlwaid famili weh wership ahn. Dat da wahn reeli speshal privilij weh bring lata benifits! (Reed Maak 10:29, 30.) Aal oava di werl, wi ga bradaz ahn sistaz weh lov Jehoava jos laik wee ahn weh di chrai dehn bes fi liv di way hihn waahn  dehn liv. Wi mait kohn fahn difrent kolcha, taak difrent langwij, ahn wayr difrent kloaz, bot wi lov bradaz ahn sistaz eevn wen wi jos di meet dehn fi di fers taim. Wi lov fi prayz ahn wership wi lovin hevnli Faada lang wid dehn.—Ps. 133:1.

4. Wai wi need wi bradaz ahn sistaz?

⁴ Now moa dan eva, wi need fi stay kloas tu wi bradaz ahn sistaz. Sohntaim, dehn wahn dehdeh fi help wi bak wi berdn. (Roam. 15:1; Gal. 6:2) Dehn inkorij wi fi kip bizi di serv Jehoava ahn fi kip wiself spirichwali schrang. (1 Tes. 5:11; Heeb. 10:23-25) Tink bowt how wi wuda feel if wi neva ga di kangrigayshan fi protek wi ahn help wi stan op schrang gens wi enimi dehn—Saytan di Devl ahn fi hihn wikid werl. Soon Saytan ahn dehn wan weh hihn kanchroal wahn atak Gaad peepl. Imajin how tankful wi wahn bee fi ga wi bradaz ahn sistaz fi help wi wen dat hapm!

5. Wai som a wi mait fain it haad fi chros wi bradaz ahn sistaz?

⁵ Som a wi mait fain it haad fi chros wi bradaz ahn sistaz, maybi bikaaz wan a dehn du sohnting fi brok wi chros er neva kip wahn pramis. Er maybi bikaaz sohnbadi eena di kangrigayshan seh er du sohnting weh hert wi bad. Wen tingz laik dat hapm, ih ku mek it haad fi mek wi chros ada peepl. Soh, weh wi ku du fi mek wi ku chros wi bradaz ahn sistaz moa?

6. How lov ku help wi chros wi bradaz ahn sistaz? (1 Korintyanz 13:4-8)

⁶ Widowt lov wi kyaahn chros nobadi. Fers Korintyanz chapta 13 taak bowt lata  wayz how lov ku help wi chros adaz er help wi chros adaz agen if dehn brok wi chros. (Reed 1 Korintyanz 13:4-8.) Fi egzampl, vers 4 seh dat “lov payshent ahn kain.” Jehoava payshent wid wi eevn wen wi sin gens ahn. Soh wee need fi bee payshent wid wi bradaz ahn sistaz if dehn seh er du sohnting weh bada wi er hert wi. Vers 5 seh: “Lov noh eezi fi geh beks, an ih noh hoal malis.” Wi wuda neva waahn “hoal malis,” er kip chrak a weh aal weh wi bradaz du wi. Ecclesiastes 7:9 seh dat wi shudn “hori fi geh beks.” Ih wuda bee moch beta fi fala di kongsl da Ifeezhanz 4:26: “Noh mek di son goh dong an unu stil beks”!

7. How di prinsipl dehn da Machyu 7:1-5 ku help wi fi chros wi bradaz ahn sistaz?

⁷ Wahn nada way how wi ku chros wi bradaz ahn sistaz da fi si dehn di way Jehoava si dehn. Gaad lov dehn an ih noh kip chrak a dehn sinz. Ahn wee shudn du dat needa. (Ps. 130:3) Insteda foakos pahn dehn mistayk, wi shuda chrai haad fi si di gud eena dehn ahn tink bowt aal di gud tingz dehn ku du. (Reed Machyu 7:1-5.) Wi bileev dat dehn lov wi ahn dat dehn wuda neva du sohnting fi hert wi, bikaaz lov “bileev evriting.” (1 Kor. 13:7) Dat noh meenz dat Jehoava ekspek wi fi chros adaz widowt gud reezn; bot hihn waahn mek wi chros dehn bikaaz dehn shoa dat dehn dizerv wi chros. b

8. How yoo ku laan fi chros yu bradaz ahn sistaz?

⁸ Ih tek taim fi mek wi chros wi bradaz ahn sistaz. How yoo ku du dat? Geh fi noa dehn gud. Tek taim fi taak tu dehn da di meetinz. Mek planz fi werk wid dehn pahn feel servis. Bee payshent wid dehn, ahn gi dehn di chaans fi shoa yu dat yu ku chros dehn. At fers, yu noh mait waahn shayr persnal infamayshan wid dehn. Bot az yu rilayshanship groa, yu mait bee moa wilin fi tel dehn how yu feel. (Look 16:10) Bot weh yu ku du if wahn brada brok yu chros? Noh bee kwik fi giv op pan ahn. Insteda dat, mek sohn taim paas. Ahn noh mek sohnting weh wan persn du stap yu fahn chros di res a yu bradaz ahn sistaz. Mek wi luk pahn sohn egzampl fahn som a Jehoava faytful servants weh mi kip di chros adaz eevn doa som peepl mi hert dehn.

9. (a) How Hana mi shoa dat shee chros Jehoava araynjment eevn doa som a di peepl weh reprizent Jehoava mek mistayk? (b) How Hana ekspeeryens help wi fi chros Jehoava araynjment? (Koment pahn di picha.)

⁹ Wahn rispansabl brada eva du sohnting weh mek it haad fi chros ahn? If dat eva hapm tu yoo, maybi Hana egzampl ku help yu. Eena fi shee taim, Hai Prees Eelai mi-di tek di leed eena chroo wership eena Izrel. Bot fi hihn famili neva set wahn gud egzampl. Ih son dehn, hoo da-mi prees, yoostu aalwayz du shaymful an imoaral tingz, bot dehn pa neva reeli du notn fi karek dehn. Wan taim wen Hana mi opset an ih mi-di pray haad, Eelai si ahn, an ih mi tink shee jronk. Hihn gaan ahn rayl op wid Hana widowt eevn chrai fain owt weh reeli mi-di goh aan. (1 Sam. 1:12-16) Now, Jehoava neva tek weh Eelai pozishan rait away. Stilyet, Hana mi kantinyu fala Gaad araynjment ahn neva stap gaahn da di templ  eevn wail Eelai da-mi hai prees. Hana eevn mek wahn vow dat if shee mi ga wahn son, ih mi wahn kehr ahn fi mek ih serv da di tabernakl. Dat meenz Eelai mi wahn bee di wan fi tek kayr a ahn. (1 Sam. 1:11) Yu tink dehn mi need fi put wahn stap tu di sichuwayshan wid Eelai son dehn? Yes, ahn Jehoava mi deel wid it laytaraan. (1 Sam. 4:17) Meenwail, Gaad mi riwaad Hana wid wahn son, Samwel.—1 Sam. 1:17-20.

10. How King Dayvid mi shoa dat ih wilin fi chros peepl eevn doa sohn peepl mi bichray ahn?

¹⁰ Wahn gud fren eva bichray yu? If dat eva hapm tu yoo, King Dayvid egzampl ku help yu. Hihn mi ga wahn fren weh naym Ahitofel. Bot wen King Dayvid son Absalom mi chrai tek weh di chroan fan ih pa, Ahitofel mi tek said wid Absalom. Ih mosi mi reeli hert Dayvid wen fi hihn son ahn wan a ih fren ton gens ahn! Bot Dayvid neva mek dat stap ahn fahn chros ada peepl. Hihn mi ga wahn nada fren, weh naym Hooshai, hoo mi rifyooz fi tek said wid Absalom gens di king. Dayvid mi kantinyu chros Hooshai, ahn fi gud reezn. Hooshai da-mi wahn gud fren, an ih eevn ris ih laif fi help Dayvid.—2 Sam. 17:1-16.

11. How wan a Naybal servant mi shoa chros?

¹¹ Mek wi luk pahn wan a Naybal servant egzampl. Naybal da-mi wahn rich Izrelait man. Dayvid ahn fi hihn soalja dehn yoostu protek Naybal servants. Laytaraan, Dayvid mi aks Naybal if ih ku sen sohn food fi hihn an ih soalja dehn, wateva ih kuda mi gi ahn. Dayvid neva aks fi wahn lat, bot Naybal mi rifyooz fi sen eniting. Dayvid geh soh beks dat hihn disaid ih wahn kil evri man weh liv eena Naybal hows. Wan a Naybal servant gaahn tel Naybal waif, Abigayl, bowt di sichuwayshan. Hihn mi liv eena Naybal hows, an ih mi noa Abigayl kuda sayv ih laif. Insteda ron weh, hihn mi chros dat Abigayl wahn fiks di sichuwayshan. Hihn mi chros ahn bikaaz evribadi mi noa dat shee mi waiz. Weh mi hapm afta dat mi shoa dat hihn mi ga gud reezn fi chros Abigayl. Abigayl mi ga korij fi goh taak tu  Dayvid ahn kanvins ahn fi noh du weh ih mi plan fi du. (1 Sam. 25:2-35) Shee mi chros dat Dayvid mi wahn bee reeznabl.

12. How Jeezas mi shoa dat ih chros ih disaipl dehn eevn doa dehn neva perfek?

¹² Jeezas mi chros ih disaiplz eevn doa dehn neva perfek. (Jan 15:15, 16) Wen Jaymz ahn Jan mi aks Jeezas fi wahn speshal pozishan eena di Kingdom, Jeezas neva tink dat dehn mi-di serv Jehoava fi di rang reezn, an ih mi stil aksep dehn az fi hihn apasl. (Maak 10:35-40) Laytaraan, aala Jeezas disaipl dehn mi lef ahn pahn di nait wen dehn ares ahn. (Mach. 26:56) Stilyet, Jeezas neva stap chros dehn. Hihn mi wel noa dat dehn neva perfek, bot hihn mi “lov dehn til di en.” (Jan 13:1) Afta Jeezas geh rezorek, hihn mi eevn giv ih 11 faytful apasl wahn impoatant rispansabiliti. Dehn mi fi tek di leed eena di minischri ahn tek kayr a fi hihn preshos sheep. (Mach. 28:19, 20; Jan 21:15-17) Hihn mi ga gud reezn fi chros dehn eevn doa dehn neva perfek. Aala dehn mi faytful til dehn ded. Fi shoar, Hana, Dayvid, Naybal servant, Abigayl, ahn Jeezas set wahn gud egzampl weh shoa wi how fi chros peepl.

13. Wat da wahn reezn wai wi mait fain it haad fi chros ada peepl?

¹³ Yu eva chros wahn brada wid praivit infamayshan ahn den yu fain owt laytaraan dat ih tel sohnbadi els? Dat ku bee sohnting haad fi goh chroo. Wahn taim, wahn sista mi tel wahn elda bowt wahn persnal mata, ahn shee mi chros dat hihn wudn tel nobadi els. Di neks day, di elda waif kaal fi inkorij di sista, ahn di sista kuda mi tel dat di elda waif mi noa bowt di praivit kanvasayshan weh shee mi ga wid di elda. Soh af koars di sista mi fain it haad fi chros da elda afta dat. Bot di sista mi du di rait ting ahn gaahn aks fi help. Shee mi taak tu wahn nada elda, ahn hihn mi help ahn fi chros di eldaz agen.

14. Weh mi help wahn brada fi chros ih eldaz agen?

¹⁴ Fi wahn lang taim, wahn brada mi ga wahn prablem wid too elda. Hihn mi feel laik hihn kudn chros dehn. Bot, ih mi staat tink bowt sohnting weh wahn brada weh hihn rispek mi seh weh reeli toch ih haat. Ih mi seh: “Saytan da di enimi, noh wi bradaz.” Di brada mi tek sohn taim fi tink bowt dat ahn bowt weh ih shuda du. Afta ih pray tu Jehoava fi help, hihn mi aybl fi mek pees wid di too eldaz.

15. Wai ih mait tek taim fi chros wi bradaz agen? Yooz di egzampl eena di paragraaf.

¹⁵ Yu eva looz wahn privilij eena di kangrigayshan? Dat ku reeli hert, noh chroo? Grete ahn fi shee ma da-mi faytful Witnisiz eena Nazi Germany joorin di 1930ʼs wen wi werk mi deh anda ban. Grete mi ga di privilij fi taip owt kapiz a The Watchtower fi ih bradaz ahn sistaz. Bot wen dehn mi fain owt dat fi shee pa mi deh gens di chroot, dehn mi tek weh da privilij, kaaz dehn mi frayd dat fi shee pa wuda bichray di kangrigayshan. Ahn dat da neva di onli prablem Grete mi haftu deel wid. Aal chroo di Sekant Werl Waar, di bradaz wudn chros Grete an ih ma wid eni kapi a di magazeen, ahn dehn mi rifyooz fi taak tu dehn wen dehn mi si dehn pahn di schreet. Dat mi reeli hert! Ih mi hert dehn soh moch dat Grete  seh ih mi tek wahn lang taim fi mek shee kuda mi fergiv dehndeh bradaz ahn chros dehn agen. Afta wahn wail, shee mi riyalaiz dat Jehoava mosi mi don fergiv dehn, soh shee shuda fergiv dehn tu. c

16. Wai wi haftu werk haad fi laan fi chros wi bradaz ahn sistaz?

¹⁶ If yoo eva gaahn chroo sohnting diskorijin laik dat, werk haad fi chros yu bradaz agen. Ih mait tek taim ahn lata haad werk, bot ih wert it. Tink bowt it laik dis: If yu eva kech food paiznin, dat noh meenz yu wahn stap eet. Yu jos wahn bee moa kyaaful bowt weh yu eet. Saym way soh, wi shudn stap chros wi bradaz ahn sistaz jos bikaaz wi gaahn chroo wan bad ekspeeryens. Wi noa dat dehn noh perfek. Bot wen wi werk haad fi chros dehn agen, wi wahn bee hapiya ahn wi wahn ku foakos pahn weh wee ku du fi promoat chros eena di kangrigayshan.

17. Wai chros soh impoatant, ahn weh wi wahn diskos eena di neks aatikl?

¹⁷ Chros noh kaman eena Saytan werl, bot wee ku chros wi bradaz ahn sistaz bikaaz wee lov dehn ahn dehn lov wee. Sayka dat wi ga jai ahn yooniti rait now, an ih wahn protek wi wen wi fays haad taimz eena di fyoocha. Weh yu ku du if yu di sofa bikaaz sohnbadi brok yu chros? Chrai luk pahn di sichuwayshan di way how Jehoava luk pan it, yooz Baibl prinsiplz fi help yu deel wid it, schrentn yu lov fi yu bradaz ahn sistaz, ahn laan fahn Baibl egzamplz. Dis wahn help wi fi get oava wi hert feelinz ahn chros adaz agen. Wen wi du dat, wi wahn bee bles wid lata frenz “weh wahn stik kloasa tu yu dan wahn breda.” (Prov. 18:24) Bot, da noh onli fi mek wee chros dehn. Dehn haftu chros wee tu. Eena di neks aatikl, wi wahn diskos how wee ku proov dat wi dizerv mek adaz chros wi.