STODI AATIKL 39
Yu Naym Deh Eena “di Buk a Laif”?
“Wahn buk mi geh rait op fronta Gaad weh gat een di naym a aal hoo fyaa Jehoava.”—MAL. 3:16.
SANG 61 Ga Korij fi Witnis fi Jehoava!
WEH WI WAHN DISKOS? a
Jehoava di ad peepl naym tu “di buk a laif” fahn di taim a Aybl (Paragraaf 1-2)
1. Akaadn tu Malachi 3:16, weh buk Jehoava di rait ahn weh ih gat een?
FI TOWZNZ a yaaz, Jehoava di rait wahn speshal buk. Dis buk gat een wahn lis a naym, ahn di fers wan da Aybl, hoo da-mi wahn faytful witnis. b (Look 11:50, 51) Sins den, Jehoava kip aan di ad moa naym, ahn tudeh da buk gat een milyanz a naym. Di Baibl rifaa tu dis buk az di “buk a laif.”—Reed Malachi 3:16; c Rev. 3:5; 17:8.
2. Fi hoo naym deh rait dong eena di buk a laif, ahn weh wee need fi du soh dat wi naym ku geh rait dong eena di buk a laif?
2 Dis speshal buk gat een di naym a aal dehn wan weh mi shoa lov ahn rispek fi Jehoava an ih naym. Dehn ga di apachooniti fi liv fareva. Tudeh, fi wee naym ku geh rait dong eena da buk if wi ga wahn kloas rilayshanship wid Jehoava bays pahn Jeezas ransom sakrifais. (Jan 3:16, 36) Aala wi waahn mek wi naym geh rait dong eena da buk—weda wi ga di hoap fi liv da hevn er pahn ert.
3-4. (a) If fi wee naym deh eena di buk a laif rait now, yu tink ih meen dat wi wahn liv fareva? Pleez eksplayn yu ansa. (b) Weh wi wahn taak bowt eena dis aatikl ahn di neks wan?
3 Yu tink dehn wan weh ga dehn naym rait dong eena di buk a laif ku bee shoar dat dehn wahn geh evalastin laif? Di ansa tu da kweschan da weh Jehoava mi tel Moaziz eena Exodus 32:33. Jehoava mi seh: “Di persn weh sin gens mi, da fi hihn naym Ah wahn irays fahn owta mai buk.” Soh dat meenz dat Jehoava ku irays eni naym weh deh eena da buk rait now. Da laik if Jehoava rait dong di naym dehn eena pensl fers. (Rev. 3:5, ftn.) Soh wi need fi mek shoar dat fi wee naym stay eena da buk til Jehoava rait it wid ink weh kyaahn irays.
4 Dis mait bring op sohn kweschan. Fi egzampl, weh di Baibl seh bowt dehn wan weh gat dehn naym rait dong eena di buk a laif ahn bowt dehn wan weh noh ga dehn naym deh yet? Wen dehn wan weh ga dehn naym eena di buk a laif wahn geh evalastin laif? Wat bowt dehn wan weh ded ahn neva ga di apachooniti fi laan bowt Jehoava? Ih pasabl dat fi dehn naym deh eena di buk a laif? Dis aatikl ahn di neks wan wahn help wi fi ansa dehnya kweschanz.
FI HOO NAYM DEH EENA DI BUK?
5-6. (a) Akaadn tu Filipiyanz 4:3, fi hoo naym deh eena di buk a laif? (b) Wen dehn naym wahn geh rait dong eena ink fi stay eena di buk fareva?
5 Fi hoo naym deh eena di buk a laif? Fi ansa da kweschan, mek wi taak bowt faiv difrent groop a peepl. Som peepl eena dehnya groop don geh dehn naym rait dong eena di buk, wail adaz noh ga dehn naym een deh yet.
6 Di fers groop mek op a dehn wan weh geh pik fi rool wid Jeezas da hevn. Yu tink fi dehn naym deh eena di buk a laif? Yes. Akaadn tu weh di apasl Paal mi tel di bradaz ahn sistaz da Filipai, aal di naym a dehn wan weh geh pik fi rool wid Jeezas deh eena di buk a laif. (Reed Filipiyanz 4:3.) Bot fi kip dehn naym eena di buk, dehn need fi stay faytful. Afta dehn geh dehn fainal maak, dehn naym wahn geh rait dong wid ink an ih wahn stay fareva eena di buk. Dis wahn eeda hapm bifoa dehn ded er bifoa di grayt chribyulayshan staat.—Rev. 7:3.
7. Akaadn tu Revilayshan 7:16, 17, wen di big krowd weh da di ada sheep wahn geh dehn naym rait dong wid ink weh kyaahn irays eena di buk a laif?
7 Di sekant groop da di big krowd a peepl weh da di ada sheep. Yu tink fi dehn naym deh eena di buk a laif? Yes. Yu tink dehn naym wahn stil deh eena di buk a laif afta dehn servaiv Armagedon? Yes. (Rev. 7:14) Jeezas mi seh dat di ada sheep wahn “get evalastin laif.” (Mach. 25:46) Bot dehn wan weh servaiv Armagedon noh wahn geh evalastin laif rait away. Fi dehn naym wahn deh eena di buk a laif, bot ih ku stil geh irays bikaaz da laik if ih deh rait dong eena pensl. Joorin Jeezas Towzn-Yaa Rool, hihn “wahn leed dehn laik wahn shepad ahn gaid dehn tu waata springz weh gi laif.” Dehn wan weh fala Jeezas gaidans ahn weh proov dat dehn faytful tu Jehoava wahn geh dehn naym rait dong wid ink weh kyaahn irays.—Reed Revilayshan 7:16, 17.
8. Wich groop a peepl noh deh eena di buk a laif, ahn weh wahn hapm tu dehn?
8 Di terd groop a peepl da di goat dehn, weh wahn geh dischrai joorin Armagedon. Fi dehn naym noh deh eena di buk a laif. Jeezas seh dat dehn “wahn geh di wers ponishment, weh da evalastin det.” (Mach. 25:46) Anda di dairekshan a di hoali spirit, Paal mi seh: “Wi Laad wahn joj dehn, ahn hihn wahn dischrai dehn fareva.” (2 Tes. 1:9; 2 Peet. 2:9) Peepl weh sin gens di hoali spirit, weda dehn di liv now er dehn mi liv eena di paas, wahn geh dischrai fareva insteda geh evalastin laif. Fi shoar, dehn noh wahn geh rezorek. (Mach. 12:32; Maak 3:28, 29; Heeb. 6:4-6) Mek wi diskos moa bowt di too groop a peepl weh wahn geh rezorek pahn ert.
DEHN WAN WEH WAHN GEH REZOREK
9. Akaadn tu Aks 24:15, wich too groop a peepl wahn geh rezorek pahn ert, ahn wat da di difrens bitween dehnya too groop?
9 Di Baibl taak bowt too groop a peepl weh wahn geh rezorek fi liv pahn ert fareva. Di Baibl kaal dehndeh too groop a peepl di wan dehn “weh mi raichos” ahn di wan dehn “weh neva raichos.” (Reed Aks 24:15.) Di wan dehn “weh mi raichos” mi faytful tu Jehoava wen dehn mi alaiv. Bot dehn wan “weh neva raichos” neva serv Jehoava. Wahn lata di tingz weh dehn mi du noh goh lang wid Jehoava standadz. Soh if dehnya too groop a peepl wahn geh rezorek, yu tink ih meen dat fi dehn naym deh eena di buk a laif? Fi ansa da kweschan, mek wi kansida eech groop wan bai wan.
10. Wai di wan dehn “weh mi raichos” wahn geh rezorek, ahn weh privilij som a dehn wahn get? (Si di “Kweschanz Weh Peepl Aks” aatikl eena dis magazeen weh taak bowt di rezorekshan pahn ert.)
10 Di foat groop da dehn wan “weh mi raichos.” Jehoava mi rait fi dehn naym eena di buk a laif bifoa dehn ded. Sins dehn ded, yu tink Jehoava mi irays dehn naym fahn di buk a laif? No, bikaaz dehn stil “livin” eena Jehoava memri. Jehoava “da di Gaad a di livin, kaaz aala dehn livin tu hihn. Hihn da noh wahn Gaad a di ded.” (Look 20:38) Dis meenz dat wen dehn wan weh mi raichos geh rezorek bak pahn ert, fi dehn naym wahn stil deh eena di buk a laif. Bot fi dehn naym deh “eena pensl” ahn ku stil geh irays. (Look 14:14) Som a dehn wan weh geh rezorek wahn geh di privilij fi serv az “prins pahn di ert.”—Ps. 45:16.
11. Weh di peepl “weh neva raichos” need fi laan soh dat dehn naym ku deh eena di buk a laif?
11 Di fif groop da “di peepl weh neva raichos.” Maybi bikaaz dehn neva noa Jehoava laa, dehn neva liv wahn laif weh Jehoava mi pleez wid bifoa dehn ded. Soh fi da reezn dehn naym noh deh eena di buk a laif. Bot wen Gaad rezorek dehn, hihn wahn gi dehn wahn apachooniti fi mek dehn naym ku deh eena di buk a laif. Dehnya “peepl weh neva raichos” wahn need wahn lata help. Bifoa dehn ded, som a dehn mi du sohn terabl tingz. Soh dehn wahn need fi laan di way Gaad waahn dehn liv. Fi mek dehn ku du dat, Gaad Kingdom wahn dairek di bigis teechin proagram pahn ert.
12. (a) Hoo wahn teech “di peepl weh neva raichos”? (b) Weh wahn hapm tu dehn wan weh noh aksep di apachooniti weh Gaad gi dehn?
12 Hoo wahn teech di peepl weh neva raichos? Ih wahn bee di big krowd a peepl ahn di raichos wan dehn weh geh rezorek. Di peepl weh neva raichos wahn need fi bee frenz wid Jehoava ahn dedikayt dehn laif tu hihn fi mek dehn ga dehn naym eena di buk a laif. Jeezas Krais ahn di anointid wan dehn wahn wach di peepl weh noh raichos fahn hevn fi si how dehn di rispan tu weh dehn di laan. (Rev. 20:4) An enibadi weh noh waahn aksep di apachooniti weh Gaad gi dehn wahn geh dischrai, noh mata if dehn 100 yaaz oal. (Isa. 65:20) Jehoava ahn Jeezas ku reed peepl haat, ahn dehn wahn mek shoar dat dehn noh alow nobadi fi kaaz prablemz eena di nyoo werl.—Isa. 11:9; 60:18; 65:25; Jan 2:25.
SOM PEEPL WEH GAAD REZOREK WAHN GEH EVALASTIN LAIF AN ADAZ WAHN GEH JOJ
13-14. (a) Eena di paas, how wi mi andastan Jeezas werdz da Jan 5:29? (b) Weh wi need fi andastan bowt dehndeh werdz eena da skripcha?
13 Jeezas mi aalso taak bowt dehn wan weh wahn kom bak tu laif pahn ert. Fi egzampl, hihn mi seh: “Unu noh geh sopraiz bikaaz a weh Ah jos seh, kaaz di taim di kohn wen aala di wan dehn weh deh eena di toom dehn wahn hyaa fi hihn vais ahn kom owt. Di peepl weh du gud tingz wahn geh evalastin laif, bot di peepl weh du bad tingz wahn geh joj.” (Jan 5:28, 29) Weh Jeezas mi meen?
14 Eena di paas, wi yoostu andastan dat Jeezas mi-di taak bowt di tingz weh di peepl weh geh rezorek wahn du afta dehn kom bak tu laif. In ada werdz, wi mi tink dat hihn mi-di seh dat som wuda du gud tingz ahn som wuda du bad tingz. Bot noatis dat Jeezas neva seh dat di peepl weh kom owta di toom dehn wahn du gud tingz er wahn du bad tingz. Eena di orijinal langwij, Jeezas mi yooz di paas tens wen ih seh dat di peepl mi “du gud tingz” ahn di peepl mi “du bad tingz.” Dis meenz dat dehn mi du dehndeh tingz bifoa dehn ded. Dat mek sens, noh chroo? Aftaraal, eena di nyoo werl Jehoava noh wahn alow nobadi fi du bad tingz. Soh wi si dat di peepl weh neva raichos mi du dehndeh bad tingz bifoa dehn ded. Soh weh Jeezas werdz mi meen wen hihn seh “di peepl weh du gud tingz wahn geh evalastin laif” ahn “di peepl weh du bad tingz wahn geh joj”?
15. Hoo aal wahn geh “evalastin laif,” ahn wai?
15 Di raichos peepl, weh mi du gud tingz bifoa dehn ded, wahn geh “evalastin laif” bikaaz fi dehn naym don deh rait dong eena di buk a laif. Soh dis meenz dat da Jan 5:29 di peepl weh kom bak tu laif “weh du gud tingz” da di saym peepl weh wahn geh rezorek az “raichos” weh Aks 24:15 taak bowt. Dis andastandin goh lang wid weh Roamanz 6:7 seh: “Weneva wahn persn ded, dat set dehn free fahn dehn sin.” Soh di sinz a wahn raichos persn wahn geh kyansl owt wen ih ded, bot Jehoava wahn memba aal di gud tingz weh dehn mi du fi hihn wen dehn mi alaiv. (Heeb. 6:10) Af koars, aala di raichos peepl weh wahn geh rezorek need fi stay faytful soh dat dehn naym ku stay eena di buk a laif.
16. Weh di Baibl meen wen ih seh dat peepl wahn geh joj?
16 How bowt peepl weh mi du bad tingz bifoa dehn ded? Eevn doa dehn sin mi geh kyansl owt wen dehn ded, dehn noh ga wahn rekad a laayalti tu Gaad. Fi dehn naym noh deh eena di buk a laif. Soh, di rezorekshan a “di peepl weh du bad tingz” da di saym laik di rezorekshan a “di peepl weh neva raichos” weh Aks 24:15 taak bowt. Dehn da di peepl weh “wahn geh joj.” d Dat meenz dat Jeezas wahn di wach di peepl weh neva raichos. (Look 22:30) Ih wahn tek sohn taim fi mek Jeezas noa if dehnya peepl naym dizerv fi deh eena di buk a laif. Dehnya peepl weh neva raichos haftu chaynj dehn bad kandok ahn dedikayt dehn laif tu Jehoava if dehn waahn mek dehn naym geh rait dong eena di buk a laif.
17-18. Weh di peepl weh geh rezorek bak tu laif pahn ert need fi du, ahn wat da di tingz “weh dehn mi du” akaadn tu Revilayshan 20:12, 13?
17 Di peepl weh geh rezorek bak tu laif pahn ert, weda dehn mi raichos er neva raichos, wahn haftu obay aala di laaz weh deh eena di nyoo skroalz. Dehnya nyoo skroal wahn geh oapm joorin di 1,000 yaaz. Di apasl Jan mi eksplayn weh hihn mi si eena ih vizhan; ih mi seh: “Den Ah si di peepl weh mi ded, di grayt wan dehn ahn di kaman peepl, di stan op fronta di chroan. Ahn Gaad oapm op sohn skroal. Den ih oapm wahn nada skroal, weh da-mi di buk a laif. Di ded mi geh joj bai di ting dehn weh mi rait dong eena di skroal dehn akaadn tu weh dehn mi du.”—Rev. 20:12, 13.
18 Di peepl weh geh rezorek wahn geh joj bays pahn di tingz “weh dehn mi du.” Yu tink dehn wahn geh joj bays pahn di tingz weh dehn mi du bifoa dehn mi ded? No! Memba, wen wahn persn ded ih sin geh kyansl owt. Soh den, di tingz “weh dehn mi du” kyaahn bee di tingz weh dehn mi du eena di paas bifoa dehn ded. Rada, ih rifaa tu di tingz weh dehn wahn du afta dehn geh chrayn anda Gaad Kingdom eena di nyoo werl. Eevn faytful man laik Noawa, Samwel, Dayvid, ahn Danyel wahn haftu laan bowt Jeezas Krais ahn shoa fayt eena fi hihn sakrifais. Soh di peepl weh neva raichos wahn haftu laan moch moa!
19. Weh wahn hapm tu dehn wan weh rijek dis wandaful apachooniti?
19 Weh wahn hapm tu dehn wan weh rijek disya wandaful apachooniti? Revilayshan 20:15 tel wi: “Hooeva naym neva deh rait dong eena di buk a laif, hihn chroa dehn intu di layk a faiya.” Yes, dehn wahn geh dischrai fareva. Soh ih impoatant fi mek shoar dat fi wee naym deh eena di buk a laif ahn dat ih stay deh!
Wahn brada tek paat eena di bigis teechin proagram weh wahn hapm joorin Krais Towzn-Yaa Rool (Si paragraaf 20)
20. Weh eksaitin werk wahn di hapm joorin di Towzn Yaa Rool? (Koment pahn di picha pahn di kova.)
20 Di Towzn-Yaa Rool wahn bee wahn eksaitin taim! Joorin dis taim, wi wahn ga di bigis teechin werk weh eva hapm pahn ert. Bot ih wahn aalso bee wahn taim wen di kandok a di peepl weh mi raichos ahn weh neva raichos wahn geh egzamin. (Isa. 26:9; Aks 17:31) Bot how dis teechin werk wahn hapm? Wi neks aatikl wahn help wi fi andastan ahn bee tankful fi dis wandaful gif.
SANG 147 Gaad Pramis Wi Evalastin Laif
a Dis aatikl wahn diskos wahn ajosment tu wi andastandin a weh Jeezas mi seh da Jan 5:28, 29 bowt dehn wan weh “wahn geh evalastin laif” ahn dehn wan weh “wahn geh joj” afta dehn geh rezorek. Wi wahn laan weh dehnya too rezorekshan meenz ahn hoo wahn bee paat a eech wan.
b Jehoava mi staat rait dis buk fahn sins “di biginin a di hyooman famili” fi dehn wan weh ga di apachooniti fi benifit fahn Jeezas ransom sakrifais. (Mach. 25:34; Rev. 17:8) Soh bays pahn di skripchaz, Aybl, hoo da-mi wahn raichos man, da-mi di fers persn fi geh ih naym rait dong eena di buk a laif.
c Malachi 3:16: “Joorin da taim deh, di wan dehn weh di fyaa Jehoava mi-di taak wid wan anada, eech wan wid ih fren, ahn Jehoava mi-di pay atenshan ahn lisn. Ahn wahn buk mi geh rait op fronta Gaad weh gat een di naym a aal hoo fyaa Jehoava ahn meditayt pahn fi hihn naym.”
d Eena di paas, wen di Baibl yooz “geh joj,” wi yoostu seh dat ih meenz di peepl wahn geh sentens er kandem. Akchwali, dehndeh werdz ku meen dat. Bot eena dis kanteks, ih luk laik Jeezas yooz dehndeh werdz eena wahn moa jenaral sens fi seh dat di peepl wahn geh wach moa kyaafuli fi si how dehn rispan tu weh dehn di laan. Er, laik weh wahn Greek dikshineri seh, “fi egzamin sohnbadi kandok.”
