Mek wi si how di Baibl ansa dehnya kweschan.

Aks 24:15 tel wi dat “Gaad wahn rayz op bak fahn di ded di peepl weh mi raichos ahn di peepl weh neva raichos.” Di raichos peepl da dehn wan weh mi obay Gaad wail dehn mi stil alaiv, soh fi dehn naym deh eena di buk a laif. (Mal. 3:16) Di peepl weh neva raichos inklood dehn wan weh neva geh wahn chaans fi laan bowt Jehoava, soh fi dehn naym noh deh eena di buk a laif.

Jan 5:28, 29 taak bowt di saym too groop a peepl weh Aks 24:15 taak bowt. Jeezas mi seh dat “di peepl weh du gud tingz wahn geh evalastin laif, bot di peepl weh du bad tingz wahn geh joj.” Di raichos peepl mi du gud tingz bifoa dehn mi ded. Wen dehn geh rezorek dehn wahn geh evalastin laif bikaaz fi dehn naym stil deh eena di buk a laif. Bot di peepl weh neva raichos mi du bad tingz bifoa dehn mi ded. Soh wen dehn geh rezorek dehn wahn geh joj. Fi dehn naym noh deh eena di buk a laif yet, ahn soh Jeezas ahn di anointid wahn wach dehn gud fi si how dehn bihayv. Joorin da taim, dehn wahn geh wahn chaans fi laan bowt Jehoava ahn geh dehn naym eena di buk a laif.

Revilayshan 20:12, 13 eksplayn dat evribadi weh geh rezorek wahn haftu obay “di ting dehn weh mi rait dong eena di skroal dehn.” Dis di taak bowt di nyoo laa dehn weh Gaad wahn gi wi eena di nyoo werl. Jehoava wahn dischrai enibadi weh noh obay.—Isa. 65:20.

Daniel 12:2 prafesai dat som a di peepl weh di sleep eena det wahn wayk op ahn “geh evalastin laif, ahn som wahn en op wid evalastin shaym.” Dis vers di taak bowt di fainal jojment fi dehn wan weh geh rezorek. Eeda dehn wahn geh “evalastin laif” er dehn wahn geh “evalastin shaym.” Soh da di en a di 1,000 yaaz, som peepl wahn geh evalastin laif ahn di res wahn geh dischrai fareva.—Rev. 20:15; 21:3, 4.

Lesgoh seh di too groop a peepl weh geh rezorek da laik farinaz weh waahn liv eena wahn nada konchri. Di raichos peepl da laik sohnbadi weh geh wahn werk permit er rezidensi ahn dat gi dehn sertn raits ahn benifits. Bot di peepl weh neva raichos da laik sohnbadi weh jos kohn da di konchri az wahn vizita. Peepl laik dat wahn haftu kwalifai fi stay eena di konchri langa. Saym way soh, peepl weh neva raichos wahn haftu aksep Jehoava laa dehn ahn proov dat dehn raichos fi mek dehn ku stay eena Paradais. Soh ih noh mata weh kaina permit er veesa wahn farina get wen dehn kohn eena wahn nyoo konchri, som a dehn mait en op di geh dehn sitiznship ahn som a dehn mait geh kik owta di konchri. Di govament eena di nyoo konchri wahn disaid weh fi du wid dehn bays pahn how dehn goh aan ahn di tingz weh dehn du. Saym way soh, di fainal disizhan fi evribadi weh geh rezorek eena di nyoo werl wahn dipen pahn dehn fayt ahn how dehn goh aan.

Jehoava da wahn Gaad weh shoa kompashan ahn wahn Gaad weh lov jostis. (Deut. 32:4; Ps. 33:5) Ih wahn shoa ih lov wen ih rezorek peepl weh raichos ahn peepl weh neva raichos. Bot hihn wahn ekspek aala dehn fi obay fi hihn standadz a weh rait ahn weh rang. Onli dehn wan weh lov hihn an obay fi hihn standadz wahn ku kantinyu liv eena di nyoo werl.