1-2. Wai ih gud fi mek wi stodi Samson laif stoari?

 WEH yoo tink bowt wen yu hyaa di naym Samson? If yu tink bowt wahn man weh mi schrang, den yu karek. Bot dis man mi mek wahn bad disizhan an ih mi sofa sayka dat. Stilyet, Jehoava mi foakos pahn evriting weh Samson mi du fi stay faytful tu hihn. An ih mi put Samson egzampl eena di Baibl soh dat wi ku laan fan it.

² Jehoava mi yooz Samson fi du wahn lata amayzin tingz fi help di Izrelaits. Di Baibl gat een wahn lis a peepl weh mi ga schrang fayt. Lang afta Samson mi don ded, Jehoava mi yooz di apasl Paal fi rait Samson naym eena da lis. (Heeb. 11:​32-34) Samson mi chros Jehoava eevn wen ih mi-di goh chroo sohn tof sichuwayshan. Mek wi si how Samson egzampl ku inkorij wi ahn weh ada lesn wi ku laan fahn ih laif stoari.

3. Wat da-mi Samson asainment fahn Jehoava?

³ Samson mi baan wen di Filisteen dehn mi-di rool oava di Izrelaits. (Judg. 13:1) Dehn mi sofa wahn lat bikaaz di Filisteen dehn mi chreet dehn bad. Soh Jehoava mi chooz Samson fi “bee di wan fi tek di leed ahn sayv Izrel fahn owta di han a di Filisteen dehn.” (Judg. 13:5) Dis da-mi wahn haad asainment. Fi du dis asainment, hihn mi haftu chros eena Jehoava.

4. How Jehoava mi help Samson? (Judges 15:​14-16)

⁴ Mek wi luk pahn wahn egzampl a how Samson mi shoa dat ih chros eena Jehoava. Wahn taim, sohn Filisteen  soalja mi gaahn da Leehai, weh mi praabli deh da Jooda, fi kech Samson. Di peepl da Jooda mi frayd fi di Filisteen dehn, soh dehn mi tai ahn op wid too nyoo roap ahn han ahn oava tu di Filisteen dehn. Da mi Samson oan peepl giv ahn tu ih enimiz. (Judg. 15:​9-13) Bot “Jehoava spirit ful ahn op wid powa” ahn Samson bos di roap. Den hihn “mi fain wahn dongki jaa boan weh mi stil fresh,” an ih grab it ahn kil 1,000 Filisteen man wid it!—Reed Judges 15:​14-16. b

5. Wen Samson mi yooz wahn dongki jaaboan, weh dat mi shoa bowt hihn?

⁵ Wahn dongki jaa boan da noh wahn wepan fi fait wid eena waar. Soh wai Samson mi yooz it? Bikaaz hihn mi chros dat Jehoava mi wahn help ahn, soh ih neva mata weh wepan hihn mi yooz. Samson mi yooz weh hihn mi fain fi du weh Jehoava mi waahn mek ih du. Dis onli pasabl bikaaz hihn mi shoa fayt ahn chros eena Jehoava!

6. Wat da wan way how Samson egzampl ku help wi wen wi di du difrent asainments?

⁶ Tudeh, Jehoava ku help wi fi du wi asainment, espeshali if wee feel laik wi kyaahn du it. Jehoava ku help wi eena sohn amayzin wayz weh wi wuda neva ekspek. Memba, doh, dat az lang az yoo chros Jehoava, hihn wahn help yu fi du weh hihn waahn, jos laik how ih mi help Samson.—Prov. 16:3.

7. Weh di egzampl eena di paragraaf teech wi?

⁷ Di bradaz ahn sistaz weh help bil Kingdom Haal an ada bildinz fi di aaganaizayshan shoa dat dehn chros Jehoava. Fi egzampl, eena di paas di aaganaizayshan yoostu bil bran nyoo Kingdom Haal an ada bildinz. Bot sins di aaganaizayshan di groa, di bradaz dehn mi haftu  staat du tingz eena wahn nyoo way. Soh di bradaz weh tek di leed mi pray tu Jehoava fi help dehn mek wahn waiz disizhan. Insteda bil sohnting nyoo, dehn mi staat tu bai bildinz ahn fiks dehn op tu di way dehn need it fi bee. Wahn brada weh naym Robert werk pahn wahn lata kanschrokshan proajeks fi di aaganaizayshan eena difrent paats a di werl. Hihn seh: “At fers, di nyoo chaynjiz da neva sohnting eezi fi mek di bradaz ahn sistaz du. Ih mi reeli difrent fahn weh wee doz du eena di paas. Bot di bradaz ahn sistaz mi redi fi mek di chaynjiz. Wee kuda mi si how Jehoava mi bles di nyoo araynjment.” Dis da jos wan egzampl weh shoa wi dat Jehoava di gaid ih peepl fi du weh hihn waahn. Evri now ahn den, ih wuda gud fi mek wi aks wiself, ‘Ai di alow Jehoava fi gaid mi? Ai redi fi mek chaynjiz soh dat Ah ku serv Jehoava eena wahn beta way?ʼ

8. Weh Samson mi du wahn taim wen hihn mi geh reeli tersti?

⁸ Yu praabli don reed bowt ada amayzin tingz weh Samson mi du, laik wen hihn mi kil wahn laiyan wid ih too han, ahn laytaraan wen ih mi kil 30 Filisteen man fahn Ashkelon. (Judg. 14:​5, 6, 19) Samson mi noa dat hihn mi kyaahn du non a dehndeh tingz pahn ih oan. Fi egzampl, wahn taim hihn mi tersti bad afta ih mi kil wahn towzn Filisteen man. Weh hihn mi du? Insteda pen pan ihself fi fain waata, hihn mi aks Jehoava fi help.—Judg. 15:18.

9. How Jehoava mi ansa Samson pryaa? (Judges 15:19)

⁹ Jehoava mi du wahn mirakl fi ansa Samson pryaa. Hihn mi mek waata kom owta wahn hoal fi Samson. Di waata mi “rifresh [Samson] an ih mi geh bak ih schrent.” (Reed Judges 15:19.) c Yaaz layta, ih luk laik waata mi stil di kom owt fahn deh rong di taim wen Jehoava mi yooz Samwel fi rait di buk a Judges. Dis mosi mi rimain di Izrelaits dat Jehoava ku help ih faytful servants wid wateva dehn need az lang az dehn pen pan Ahn.

10. Fi mek wi aalwayz pen pahn Jehoava, weh wi need fi riyalaiz? (Koment pahn di picha.)

¹⁰ Eevn if wee mait feel laik wi ga skilz er ekspeeryens, wi need fi pen pahn Jehoava fi help. Soh wi need fi bee hombl an aksep dat tingz wahn onli werk owt gud wen wi pen pahn Jehoava. Samson mi geh di help weh ih mi need wen ih mi jrink di waata weh Jehoava gi ahn. Saym way soh, wee need fi aksep Jehoava help ahn yooz evriting weh ih gi wi fi bil op wi fayt.—Mach. 11:28.

11. How wi ku mek gud yoos a evriting weh Jehoava gi wi fi help wi? Yooz di egzampl eena di paragraaf.

¹¹ Mek wi luk pahn Aleksey egzampl. Hihn da wahn brada weh liv da Russia ahn hihn di goh chroo sohn seeryos persikyooshan. Weh help hihn fi stay schrang noh mata wat? Brada Aleksey an ih waif mek shoar dat dehn kip op wid dehn spirichwal skejul. Hihn seh: “Ah wuda reed mi Baibl evri day ahn kip op wid mi persnal stodi. Evri maanin mee ahn mi waif wuda du di dayli teks ahn pray tugeda.” Weh dis teech wi? Wel, dat wi noh fi pen pahn wiself. Insted, wi haftu  pen pahn Jehoava. How wi ku du dat? Wi need fi du wi persnal stodi an ada spirichwal tingz fi bil op wi fayt. Jehoava wahn bles wi wen wi du wi bes. Saym way laik how Jehoava mi help Samson, hihn wahn help wee tu.

12. Weh mistayk Samson mi mek, ahn how dis mi difrent fahn aala ih ada disizhanz?

¹² Wahn taim, Samson mi ingayj tu wahn Filisteen laydi. Dis “da-mi paat a Jehoava plan” bikaaz Jehoava “mi-di luk fi wahn apachooniti fi ponish di Filisteen dehn.” Laytaraan, Samson mi aalso stay da wahn prastichoot hows da Gaza, wahn Filisteen siti. Wail hihn mi dehdeh, Jehoava mi gi ahn di powa fi haal owt di doa dehn a di siti gayt weh mi-di protek di siti. (Judg. 14:​1-4; 16:​1-3) Bot Samson neva perfek, soh ih mi mek sohn bad disizhanz. Wahn taim, hihn mi sofa wahn lat sayka wahn bad disizhan weh ih mek. Afta ih mi serv az wahn joj fi wahn wail, ih mi “faal in lov wid wahn laydi fahn di Soarek Vali weh mi naym Dilaila.” (Judg. 16:4) Dis sichuwayshan wid Dilaila mi difrent bikaaz shee da-mi praabli wahn Izrelait ahn dis rilayshanship neva ga notn fi du wid Jehoava wil.

13. How Dilaila mi mek Samson en op eena wahn bad sichuwayshan?

¹³ Di Filisteen dehn mi gi Dilaila wahn lata moni fi mek shee bichray Samson. Hihn mosi mi soh in lov wid Dilaila dat ih kudn si how chriki shee mi chriki. Dilaila mi kip di presha Samson fi tel ahn di seekrit a how hihn mi soh schrang. Wel bikaaz shee mi presha ahn soh moch, hihn mi did tel ahn di seekrit. Bikaaz a dat, hihn mi looz ih powa ahn Jehoava neva  pleez wid ahn fi wahn lee wail.—Judg. 16:​16-20.

14. Weh mi hapm tu Samson afta hihn mi staat chros Dilaila?

¹⁴ Sayka weh Samson mi chros Dilaila insteda a Jehoava, ih mi sofa wahn lat. Di Filisteen dehn mi kech Samson ahn dehn mi dig owt ih too aiy. Hihn mi deh da prizn da Gaza, di saym plays weh ih mi haal owt di doa dehn a di siti gayt. Pahn tap a dat, dehn mi put ahn fi mash grayn eena prizn laik wahn slayv. Ahn joorin wahn selibrayshan weh di Filisteen dehn mi gat fi dehn faals gaad, dehn bring owt Samson fi tek ahn mek papishoh ahn fi “entatayn” dehnself. Dehn mi aalso aafa wahn big sakrifais tu dehn faals gaad Daygon, laik if da sayka hihn dehn mi kech Samson.—Judg. 16:​21-25.

15. How Samson mi shoa dat ih pen pahn Jehoava agen? (Judges 16:​28-30) (Koment pahn di picha pahn di kova.)

¹⁵ Samson mi mek wahn big mistayk, bot ih neva giv op. Ih mi stil waahn du weh Jehoava aks ahn fi du, soh ih mi chrai fain wahn nada way how ih kuda mi fait gens di Filisteen dehn. (Reed Judges 16:​28-30.) d Samson mi beg Jehoava fi help ahn wan laas taim, an ih seh: “Mek Ah tek rivenj pahn di Filisteen dehn.” Jehoava mi ansa Samson pryaa an ih giv ahn bak di saym powa weh ih yoostu gat. Dis taim Samson mi kil moa Filisteen dan eva bifoa.

16. Weh wi ku laan fahn di mistayk weh Samson mi mek?

¹⁶ Samson mi sofa di kansikwens a ih mistayk, bot dat neva stap ahn fahn serv Jehoava. If wi mek wahn mistayk ahn need karekshan er looz wahn privilij, wi noh fi giv op. Memba dat Jehoava noh giv op pahn wi, bot hihn redi fi fergiv wi. (Ps. 103:​8-10) Eevn if wi mek mistayk, Jehoava ku stil yooz wi fi du fi hihn wil  jos laik how hihn mi kantinyu yooz Samson.

17-18. Eena weh way Michael egzampl ku inkorij wi? (Koment pahn di picha.)

¹⁷ Mek wi luk pahn di egzampl a wahn yong brada weh naym Michael. Hihn mi bizi di serv Jehoava az wahn ministeeryal servant ahn wahn regyula painyaa. Bot hihn mi mek wahn mistayk an ih mi en op di looz ih privilij dehn eena di kangrigayshan. Michael mi seh: “Ah mi veri bizi di serv Jehoava, bot afta Ah mi looz mi privilij, Ah mi feel laik Ah kudn du notn moa far ahn. Ah neva did feel laik Jehoava wuda lef mi, bot Ah mi wori dat mi rilayshanship wid Jehoava kudn get bak laik how ih mi deh er dat Ah kudn serv eena di kangrigayshan az moch az Ah yoostu.”

¹⁸ Gud ting Michael neva giv op. Hihn seh: “Ah mi werk pahn mi rilayshanship wid Jehoava. Ah mi pray aal di taim ahn poar owt mi haat tu ahn. Ah mi aalso tek taim fi stodi ahn meditayt.” Layta, Michael mi geh bak ih privilij dehn, ahn now ih di serv az wahn elda ahn regyula painyaa. Hihn seh: “Di sopoat an inkorijment Ah get, espeshali fahn di eldaz, mi help mi fi si dat Jehoava reeli lov mi. Now, Ah ku serv eena di kangrigayshan wid wahn kleen kanshans. Dis ekspeeryens teech mi dat Jehoava wilin fi fergiv enibadi weh reeli ripent fahn dehn sin.” Wi ku bee shoar dat Jehoava wahn yooz wi ahn bles wi eevn if wi mek mistayk, az lang az wi du evriting wi kud fi chaynj wi bad wayz ahn kantinyu pen pahn Jehoava.—Ps. 86:5; Prov. 28:13.

19. How Samson egzampl schrentn yoo?

¹⁹ Eena dis aatikl, wi mi luk pahn sohn inchrestin tingz weh mi hapm eena Samson laif. Hihn neva perfek, bot eevn afta ih mi mek mistayk wid Dilaila, ih neva giv op. Samson mi kantinyu serv Jehoava, ahn Jehoava neva giv op pahn hihn needa. Insted, Jehoava mi kantinyu yooz ahn, an ih mi eevn yooz ahn eena wahn speshal way. Jehoava mi stil si hihn az wahn man weh ga schrang fayt. Jehoava mi inklood hihn eena di lis a faytful peepl weh deh eena Heebrooz chapta 11. Ih inkorij wi fi noa dat wi di serv wahn lovin hevnli Faada hoo waahn schrentn wi, espeshali wen wi di goh chroo chraiyalz ahn need ih help. Soh jos laik Samson, mek wi beg Jehoava: “Pleez memba mi ahn pleez gi mi schrent.”—Judg. 16:28.