1. How Peeta mi feel bowt di mirakl weh Jeezas mi du?

 PEETA mi gaahn fishin hoal nait, bot ih neva kech notn. Soh Peeta mi sopraiz wen Jeezas tel ahn: “Mek wi goh wehpaat ih deep, ahn chroa yu net dehn eena di waata.” (Look 5:4) Peeta neva feel laik ih wahn kech eniting, bot ih mi stil lisn tu weh Jeezas tel ahn fi du. Hihn ahn di ada man dehn weh werk wid ahn mi kech soh moch fish dat di net dehn staat tu bos anaal. Wen dehn kech op dat Jeezas mi jos du wahn mirakl, “dehn kudn bileev weh dehn mi jos si.” Ahn Peeta seh: “Laad, Ai noh dizerv fi deh kloas tu yoo, bikaaz Ai da wahn sinful man.”—Look 5:​6-9.

2. Wen wi tink bowt Peeta egzampl, how dat ku help wi?

² Peeta mi seh dat hihn da-mi wahn “sinful man,” ahn dat da-mi chroo. Eena di Baibl, wi ku reed bowt som a di tingz weh Peeta wish hihn neva seh er du. Yoo eva feel laik Peeta? Yoo di chrai werk haad fi bee wahn beta persn? Er yoo di schrogl fi geh rid ahn wahn bad habit? If yu ansa da yes, den Peeta egzampl ku komfert yu. How? Tink bowt dis: Jehoava kuda mi tek owt Peeta mistayk dehn fahn di Baibl, bot hihn neva du dat bikaaz ih waahn wi laan fahn dehn. (2 Tim. 3:​16, 17) Wen wi laan bowt weh Peeta mi-di schrogl wid ahn dat hihn mi-di goh chroo som a di saym tingz weh wee di goh chroo rait now, dat help wi fi andastan dat Jehoava noh ekspek wi fi bee perfek. Jehoava noh waahn mek wi giv op. Insted, hihn waahn mek wi kantinyu  du wi bes, eevn doa wi mek lata mistayk.

3. Wai ih impoatant fi mek wi noh giv op?

³ Wai ih impoatant fi mek wi noh giv op? Bikaaz di moa yu du sohnting, di beta yu wahn get. Fi egzampl, ih mait tek yaaz fi mek wahn persn laan fi play wahn gitaar. Joorin dehndeh yaaz, hihn mait mek wahn lata mistayk. Bot if ih kantinyu praktis, ih wahn du beta. Eevn afta ih don laan how fi play di gitaar gud, evri now an agen ih mait stil mek mistayk. Stilyet, ih noh giv op. Ih kantinyu praktis soh dat ih ku geh beta ahn beta. Saym way soh, eevn if wi feel laik wi don get oava wahn prablem, wi ku stil mek wahn mistayk agen. Bot wi noh fi mek dat stap wi fahn reech wi goal. Aala wi seh ahn du tingz weh wi mait sari fa laytaraan, bot if wi noh giv op, Jehoava wahn help wi fi kantinyu du beta. (1 Peet. 5:10) Peeta neva giv op, soh mek wi si how hihn mi set wahn gud egzampl fi wee. Ahn Jeezas mi shoa Peeta kompashan eevn doa hihn mi mek sohn mistayk. Dis ku inkorij wi fi kantinyu serv Jehoava.

4. Bays pahn Look 5:​5-10, weh Peeta mi seh bowt ihself ahn weh Jeezas mi tel ahn?

⁴ Di Baibl noh tel wi wai Peeta mi seh hihn da “wahn sinful man” er weh kaina sin hihn mi-di tink bowt. (Reed Look 5:​5-10.) Bot ih pasabl dat Peeta mi mek sohn seeryos mistayk. Jeezas mi noa dat Peeta mi feel frayd bikaaz ih mi praabli feel laik ih noh gud inof. Jeezas mi aalso noa dat Peeta kuda bee wan a ih faytful disaipl, soh ih tel ahn fi “noh bee frayd.” Peeta laif mi chaynj bikaaz Jeezas mi shoa dat ih chros ahn. Peeta an ih breda Anjru mi lef dehn fishin bizniz ahn dehn mi jain Jeezas eena ih minischri. Dehn mi en op di geh wahn lata blesinz bikaaz a da disizhan.—Maak 1:​16-18.

5. Weh kaina blesinz Peeta mi get bikaaz hihn neva alow ih negitiv feelinz fi stap ahn fahn bee wan a Jeezas disaipl?

⁵ Peeta mi ga wahn lata wandaful ekspeeryens wail hihn da-mi wan a Jeezas disaipl. Hihn mi geh fi si Jeezas heel sik peepl, bring peepl bak tu laif, ahn jraiv deemonz owta peepl. b (Mach. 8:​14-17; Maak 5:​37, 41, 42) Hihn mi eevn si wahn vizhan a Jeezas az di King a Gaad Kingdom. Peeta neva ferget da vizhan. (Maak 9:​1-8; 2 Peet. 1:​16-18) Peeta mi si tingz  weh ih neva wuda mi si if hihn da neva wan a Jeezas disaipl. Hihn mosi mi reeli hapi dat ih neva alow ih negitiv feelinz fi mek ih giv op ahn mis owt pahn dehnya blesinz!

6. Yu tink Peeta mi geh rid a ih weeknis rait away? Pleez eksplayn yu ansa.

⁶ Eevn doa Peeta mi si ahn hyaa bowt di wandaful miraklz weh Jeezas mi du, hihn mi stil di schrogl wid ih oan weeknis. Fi egzampl, Peeta mi rayl op wid Jeezas wen Jeezas mi seh dat ih mi wahn haftu ded fi mek Baibl prafesi kohn chroo. (Maak 8:​31-33) Ahn moa dan wan taim, Peeta ahn di ada apaslz mi aagyu bowt wich wan a dehn mi moa impoatant dan di ada. (Maak 9:​33, 34) Di nait bifoa Jeezas mi ded, Peeta mi chap aaf wahn man ayz. (Jan 18:10) Da saym nait, Peeta mi dinai Jeezas chree taimz bikaaz ih mi frayd fi weh peepl mi wahn tink bowt ahn. (Maak 14:​66-72) Dat mi mek Peeta baal.—Mach. 26:75.

7. Weh apachooniti Peeta mi get afta Jeezas mi geh rayz op bak?

⁷ Peeta mi geh diskorij, bot Jeezas stil neva giv op pan ahn. Afta Jeezas mi geh rayz op bak, hihn mi giv Peeta di apachooniti fi shoa ahn dat ih stil lov ahn. Jeezas mi aks Peeta fi help ahn tek kayr a ih sheep, ahn hihn mi redi fi du weh Jeezas tel ahn fi du. (Jan 21:​15-17) Hihn mi aalso deh monks di fers set a Kristyanz weh mi geh anointid da Jeroosalem pahn di day a Pentikaas.

8. Weh mistayk Peeta mi mek da Antiyak?

⁸ Eevn afta Peeta mi geh anointid, hihn mi haftu kantinyu werk haad fi geh rid a ih weeknis. Eena 36 C.E., Kerneelyos, wahn man weh da neva wahn Joo, mi geh anointid wid hoali spirit, ahn Peeta mi deh rait deh. Dis da-mi proof dat “Gaad chreet evribadi di saym way” ahn dat peepl weh da neva Joo ku bee paat a di Kristyan kangrigayshan. (Aks 10:​34, 44, 45) Afta dat, Peeta mi staat eet wid dehn wan weh da neva Joo. Dat da sohnting weh hihn wuda neva du bifoa. (Gal. 2:12) Bot dehn mi stil ga sohn Jooish Kristyanz weh mi feel laik ih neva rait fi mek dehn eet wid peepl weh da neva Jooz. Wen som a di Kristyanz weh mi tink laik dat mi gaahn da Antiyak, Peeta mi stap eet wid di bradaz weh da neva Jooz. Hihn praabli mi du dat bikaaz ih mi frayd fi weh som a di Jooish Kristyanz mi wahn seh er tink bowt ahn. Wen di apasl Paal mi si dat Peeta di goh aan laik wahn hipokrit, hihn mi karek ahn. (Gal. 2:​13, 14) Eevn doa Peeta mi mek wahn nada mistayk, hihn neva giv op.

9. How Jan 6:​68, 69 shoa dat Peeta mi laayal?

⁹ Peeta mi laayal an ih neva alow eniting fi mek ih giv op. Wan taim Jeezas mi seh sohnting weh ih disaipl dehn neva andastan. (Reed Jan 6:​68, 69.) Sayka dat, wahn lata dehn mi stap fala Jeezas, kaaz dehn neva eevn chrai andastan weh Jeezas mi meen. Bot Peeta mi stay laayal tu Jeezas bikaaz hihn mi noa dat evriting weh Jeezas teech “leed tu evalastin laif.”

10. How Jeezas mi shoa dat ih kanfident dat Peeta neva mi wahn giv op? (Koment pahn di picha.)

¹⁰ Jeezas neva abandan Peeta eevn doa ih mi noa dat Peeta ahn di ada apaslz mi wahn lef ahn pahn ih oan di nait bifoa ih ded. Hihn mi eevn tel Peeta dat ih mi shoar Peeta mi wahn stay faytful eevn afta weh mi hapm. (Look 22:​31, 32) Jeezas mi andastan dat “eevn doa wahn persn  eega fi du sohnting, ih badi mait noh ga di schrent fi du it.” (Maak 14:38) Eevn doa Peeta mi dinai Jeezas, Jeezas stil neva giv op pan ahn. Afta Jeezas mi rayz op bak tu laif, hihn mi gaahn si Peeta wen Peeta mi deh bai ihself. (Maak 16:7; Look 24:34; 1 Kor. 15:5) Dat mosi mi reeli inkorij Peeta!

11. How Jeezas mi mek Peeta noa dat Jehoava mi wahn help ahn?

¹¹ Jeezas mi help Peeta fi chros dat Jehoava wahn help ahn. Afta Jeezas kohn bak tu laif, hihn mi du wahn nada mirakl. Hihn mi help Peeta ahn di ada apaslz fi kech sohn fish agen an ih mi yooz dat fi teech dehn wahn lesn. (Jan 21:​4-6) Da mirakl mi shoa Peeta dat Jehoava mi wahn mek shoar dehn aalwayz gat weh dehn need. Dat mosi mi rimain di apasl bowt weh Jeezas mi seh wen ih tel dehn dat if dehn “mek shoar dat di Kingdom . . . kohn fers eena unu laif,” den Jehoava mi wahn tek kayr a dehn. (Mach. 6:33) Dat da egzakli weh Peeta mi du. Hihn neva foakos pahn ih fishin bizniz. Insted, hihn mi foakos pahn di minischri. Pahn Pentikaas 33 C.E., hihn mi preech wid korij, ahn dat mi help towznz a peepl fi aksep di gud nyooz. (Aks 2:​14, 37-41) Hihn mi help di Samaritan peepl fi laan bowt Jeezas ahn laytaraan ih mi aalso help di peepl weh da neva Joo. (Aks 8:​14-17; 10:​44-48) Peeta mi bring aal kaina peepl eena kangrigayshan. Dis mi onli pasabl bikaaz Jehoava mi-di help ahn.

12. How Peeta egzampl ku help wi wen wi di fait gens wahn weeknis?

¹² Jehoava ku help wi fi noh giv op. Ih ku bee reeli haad fi noh giv op, espeshali wen wi di fait gens wahn weeknis fi wahn lang taim. Sohntaim di prablemz weh wi di goh chroo mait feel haada dan di prablemz weh Peeta mi gaahn chroo. Bot Jehoava ku gi wi di schrent weh wi need fi noh giv op. (Ps. 94:​17-19) Fi egzampl, wahn brada weh yoostu bee wahn homosekshwal fi wahn lang taim mi laan di chroot, ahn dat mi help ahn fi lef da laif bihain. Bot sohntaim ih stil fain ihself di fait wid sohn rang dizaiyaz. Weh mi help ahn fi noh giv op? Hihn seh: “Jehoava gi wi di schrent weh wi need. Wid Jehoava help . . . , Ah laan  dat ih pasabl fi [kantinyu] liv wahn laif weh pleez Jehoava . . . Eevn doa Ah noh perfek, Jehoava stil di yooz mi an ih kantinyu gi mi schrent.”

13. How wee ku kapi weh Peeta mi du da Aks 4:​13, 29, 31? (Koment pahn di picha.)

¹³ Wi laan dat moa dan wan taim Peeta mi frayd fi weh peepl mi wahn seh er du tu ahn. Bot wen Peeta mi pray an aks Jehoava fi help ahn bee brayv, hihn mi stan op schrang fi weh rait. (Reed Aks 4:​13, 29, 31.) Wee ku aalso bee brayv laik Peeta. Tink bowt weh mi hapm tu wahn yong brada weh naym Horst, hoo mi liv da Germany joorin di taim wen di Nazi dehn mi-di rool. Hihn mi giv een tu presha da skool ahn sayka dat, moa dan wan taim, hihn mi seh: “Heil Hitler!” Bot ih payrents neva skoal ahn. Insted dehn mi pray wid ahn soh dat Jehoava ku help ahn fi bee brayv. Laytaraan, Brada Horst mi shoa korij ahn neva giv een, bikaaz ih payrents mi help ahn, an ih mi chros Jehoava. Afta dat hihn seh: “Jehoava mi aalwayz deh wid mi.” c

14. How eldaz ku help bradaz ahn sistaz weh feel diskorij?

¹⁴ Jehoava ahn Jeezas noh wahn giv op pahn wi. Afta Peeta mi dinai Jeezas, hihn neva noa weh fi du. Hihn kuda mi eeda giv op er kantinyu bee Jeezas disaipl. Weh hihn mi du? Jeezas mi beg Jehoava fi help Peeta soh dat ih fayt noh geh week. Jeezas mi aalso tel Peeta dat ih mi pray far ahn, an dat ih ga kanfidens dat laytaraan Peeta mi wahn inkorij ih bradaz. (Look 22:​31, 32) Dis mosi mi inkorij Peeta wahn lat. Wen wi noh noa weh fi du eena wi laif, di eldaz ku inkorij wi ahn  pray fi wi soh dat wi ku stay faytful. (Ifee. 4:​8, 11) Wahn brada weh naym Paal, hoo di serv az wahn elda fahn lang taim, chrai ih bes fi komfert adaz. Weneva ih taak tu sohnbadi weh feel diskorij ih wuda tel ahn fi tink bowt how Jehoava mi jraa ahn tu di chroot. An ih wuda rimain ahn dat bikaaz Jehoava lov ahn, ih wuda neva giv op pan ahn. Hihn seh, “Ah geh fi si wahn lata bradaz ahn sistaz weh mi feel diskorij neva giv op, bikaaz Jehoava mi help dehn.”

15. How Peeta ahn Brada Horst ekspeeryens ku help wi fi chros weh Machyu 6:33 seh?

¹⁵ Jehoava mi mek shoar Peeta ahn di ada apaslz mi ga weh dehn need, ahn hihn wahn du di saym ting fi wee az lang az wi put di minischri fers eena wi laif. (Mach. 6:33) Afta Werl Waar II, Horst mi-di tink bowt painyaa. Bot hihn mi poa, soh ih neva shoar if ih mi wahn ku painyaa ahn tek kayr a ihself saym taim. Weh hihn mi du? Hihn lef tingz eena Jehoava han an ih mi spen di hoal week di preech joorin serkit vizit. Bai di en a di week, di serkit oavaseeya mi han ahn wahn enviloap wid sohn moni. No naym mi deh pahn di enviloap, bot ih mi gat inof moni fi tek kayr a di brada soh dat ih ku painyaa fi di neks fyoo monts. Brada Horst mi si dis az wahn gif fahn Jehoava, an ih mi help ahn fi bee kanfident dat Jehoava mi wahn tek kayr a ahn. Fi di res a ih laif ih mi kantinyu put spirichwal tingz fers.—Mal. 3:10.

16. Wai wi shuda stodi Peeta egzampl ahn di letaz weh ih mi rait?

¹⁶ Peeta mi hapi dat Jeezas mi stay kloas tu ahn, eevn doa Peeta mi feel laik hihn noh dizerv fi deh kloas tu Jeezas! Jeezas mi kantinyu chrayn Peeta fi bee wahn faytful apasl soh dat ih ku set wahn gud egzampl fi aal Kristyanz. Di chraynin weh Jeezas giv Peeta ku teech wi wahn lata impoatant lesn. Wi ku reed bowt som a dehnya lesn eena di too letaz weh hihn mi rait eena di fers senchri. Eena di neks aatikl, wi wahn taak bowt som a dehnya impoatant lesn ahn wi wahn laan how wi ku yooz dehn eena wi laif.