1. Bifoa Peeta mi ded, weh Jehoava mi yooz ahn fi du?

 DI APASL Peeta mi faytful tu Jehoava an ih mi gaahn lang wid Jeezas wen ih mi-di preech. Peeta mi eevn preech tu peepl weh da neva Joo, ahn hihn da-mi wahn memba a di govanin badi. Bot dis da neva aal weh hihn mi du. Wen Peeta mi wahn soon ded, ahn hihn mi noa dat ih wahn soon ded, Jehoava mi giv ahn moa werk fi du. Bitween 62-64 C.E., Jehoava mi yooz Peeta fi rait too letaz. Dehnya letaz deh eena di Baibl az 1 Peeta ahn 2 Peeta. Peeta mi-di hoap dat dehndeh letaz ku help ih Kristyan bradaz ahn sistaz eevn afta ih ded.—2 Peet. 1:​12-15.

2. Wai wi ku seh dat Peeta mi rait dehndeh too leta da jos di rait taim?

² Wen Peeta mi-di rait dehndeh too letaz, di bradaz ahn sistaz mi-di ‘sofa sayka di chraiyalz weh dehn mi-di goh chroo.ʼ (1 Peet. 1:6) Joorin da taim, som peepl eena di kangrigayshan mi-di teech faals tingz ahn dehn mi-di du wikid tingz. (2 Peet. 2:​1, 2, 14) Di “en [mi] deh kloas” fi di Kristyanz weh mi-di liv eena Jeroosalem, bikaaz di Roamanz mi wahn soon dischrai di hoal siti. (1 Peet. 4:7) Fi shoar, di letaz weh Peeta mi rait mi help dehndeh Kristyanz fi si how dehn kuda mi kantinyu bayr op ahn pripyaa fi chraiyalz weh dehn mi wahn fays eena di fyoocha. b

3. Wai wi need fi stodi Peeta too letaz?

³ Eevn doa Peeta mi rait dehndeh too letaz fi di Kristyanz weh mi liv eena di fers senchri, Jehoava mi mek shoar dat dehndeh letaz da-mi paat a di Baibl soh dat wee ku benifit fan dehn tudeh tu. (Roam. 15:4) Wi liv eena wahn werl  weh peepl du wikid tingz weh goh gens Jehoava standadz. Pahn tap a dat, wi fays chraiyalz weh mek it haad fi serv Jehoava. Soon wi gwehn chroo di grayt chribyulayshan, weh wers dan weh mi hapm eena Peeta taim wen di Roamanz mi dischrai Jeroosalem. Peeta too leta ga sohn impoatant lesn weh ku help wi fi kip pahn di lukowt fi Jehoava day, noh feel frayd er shaym fi weh peepl mait seh er du, ahn ga deep lov fi wan anada. Eldaz ku aalso laan how fi help di bradaz ahn sistaz eena di kangrigayshan fi stay schrang.

4. Bays pahn 2 Peeta 3:​3, 4, weh ku mek wi fayt geh week?

⁴ Wi liv eena wahn werl weh ful op a peepl weh noh bileev weh di Baibl seh bowt di fyoocha. Sohn peepl mek fon a wi bikaaz fi wahn lang taim wi di preech dat di en soon kohn, ahn som noh bileev dat di en wahn eva kohn. (Reed 2 Peeta 3:​3, 4.) If wi kip di hyaa koments laik dat fahn sohnbadi weh wi preech tu, wahn werkmayt, er wahn famili memba, ih ku mek wi fayt geh week. Bot Peeta tel wi weh ku help wi.

5. Weh ku help wi fi si dat Jehoava noh di tek tu lang fi bring di en a dis sistem a tingz? (2 Peeta 3:​8, 9)

⁵ Som peepl mait feel laik Jehoava di tek lang fi bring wahn en tu dis wikid werl. Bot weh Peeta seh ku help wi bikaaz ih rimain wi dat di way Jehoava si taim difrent fahn di way wee seeʼt. (Reed 2 Peeta 3:​8, 9.) Wahn towzn yaaz da jos laik wan day fi Jehoava. Jehoava payshent ahn hihn noh waahn mek nobadi geh dischrai. Jehoava don set di day wen hihn wahn bring wahn en tu dis sistem ahn notn wahn stap dat fahn hapm. Soh wee ga di privilij fi yooz di taim weh lef fi preech tu peepl aal oava di werl.

6. Weh wi ku du fi mek shoar wi “deh pahn [wi] gyaad ahn noh ferget” dat Jehoava day soon kohn? (2 Peeta 3:​11, 12)

⁶ Peeta tel wi fi mek wi “deh pahn [wi] gyaad ahn noh ferget” dat Jehoava day deh kloas. (Reed 2 Peeta 3:​11, 12.) How wi ku du dat? Wi need fi tek taim evri day fi tink bowt di wandaful tingz weh wi wahn injai eena di nyoo werl. Fi egzampl, wi wahn ku eet nais ahn helti food, ahn wi wahn ku breed fresh ayaa. Ahn tink bowt how hapi yu wahn bee wen yu welkom bak famili ahn frenz weh mi ded. An ih wahn aalso bee eksaitin fi teech peepl weh mi liv lang taim agoa bowt di Baibl prafesi dehn weh mi kohn chroo. Wen yu tek taim fi meditayt pahn dehndeh tingz, ih ku help yu fi deh pahn yu gyaad ahn bee redi fi Jehoava day weh wahn soon kohn. Sins Jehoava help wi fi noa di fyoocha “heda taim,” peepl wahn kyaahn ‘leed wi aschrayʼ wid dehn faals teechinz.—2 Peet. 3:17.

7. Weh ku hapm if wi feel frayd fi weh peepl mait seh er du tu wi?

⁷ Sins wi noa dat Jehoava day soon kohn, wi waahn du evriting weh wi kud fi help peepl hyaa di gud nyooz. Bot sohntaim ih mait bee haad fi du dat. Wai? Wi mait feel frayd fi weh peepl mait seh er du tu wi. Dis da egzakli weh mi hapm tu Peeta. Di nait wen dehn mi ares Jeezas, Peeta neva waahn peepl noa dat hihn da-mi wan a Jeezas disaipl. In fak, chree taimz ih mi dinai dat ih noa Jeezas. (Mach. 26:​69-75) Bot laytaraan Peeta mi stap feel frayd, ahn soh hihn kuda mi seh: “Noh frayd fi weh adaz frayd fa, ahn noh mek notn wori unu needa.” (1 Peet. 3:14) Peeta egzampl ku help wi fi si dat wee, tu, ku stap feel frayd fi weh peepl mait seh er du tu wi.

8. Weh ku help wi fi stap bee frayd fi weh peepl mait seh er du? (1 Peeta 3:15)

 ⁸ How wi ku stap feel frayd fi weh peepl mait seh er du tu wi? Peeta tel wi dat wi need fi “aana di Krais az wi Laad eena [wi] haat.” (Reed 1 Peeta 3:15.) Wan way how wi ku du dis da wen wi tek taim fi meditayt pahn di pozishan ahn powa weh Jeezas gat az wi Laad ahn King. Soh if wahn apachooniti kom op fi mek wi preech tu sohnbadi ahn wi feel nervos er frayd, wi jos haftu memba Jeezas, wi King weh di rool op eena hevn wid milyanz a aynjelz di serv ahn. Hihn ga “aal atariti da hevn ahn pahn di ert” ahn hihn wahn deh “wid [wi] evri day til di en a dis sistem a tingz.” (Mach. 28:​18-20) Peeta inkorij wi fi “aalwayz bee redi” fi shayr weh wi bileev wid adaz. Yoo wuda waahn preech da werk, da skool, er eena eni ada sichuwayshan weh mait kom op? Tink bowt difrent sichuwayshanz weh mait kom op ahn den pripyaa weh yu wahn seh. Pray an aks Jehoava fi korij ahn chros dat ih wahn help yu fi noh feel frayd.—Aks 4:29.

9. Giv wahn egzampl a wahn taim wen Peeta neva shoa lov. (Koment pahn di picha.)

⁹ Peeta mi laan how fi shoa lov. Hihn mi deh wid Jeezas wen Jeezas seh: “Ai di giv unu wahn nyoo komanment: Lov wan  anada. Unu mos lov wan anada di saym way Ai lov unu.” (Jan 13:34) Bot laytaraan, Peeta neva waahn eet wid di bradaz ahn sistaz weh da neva Joo bikaaz hihn mi frayd fi weh di Jooish bradaz ahn sistaz mi wahn seh er tink bowt ahn. Paal mi kongsl Peeta ahn tel ahn dat ih di goh aan laik wahn “hipokrit.” (Gal. 2:​11-14) Peeta mi aksep Paal kongsl an ih mi laan fan it. Soh eena Peeta too letaz, hihn mi rait dat wi noh onli need fi ga lov fi wan anada, bot wi aalso need fi shoa it.

10. Weh ku help wi fi shoa “chroo chroo lov fi wan anada”? (1 Peeta 1:22)

¹⁰ Peeta mi seh dat wi fi ga “chroo chroo lov fi wan anada.” (Reed 1 Peeta 1:22.) Wi wahn ku shoa dis kaina lov if wi “obay di chroot” weh wi laan fahn di Baibl. Wan a di tingz weh wi laan fahn di Baibl da dat “Gaad chreet evribadi di saym way.” (Aks 10:​34, 35) Bot if wi onli shoa lov tu som a wi bradaz ahn sistaz eena di kangrigayshan, wi noh wahn di obay Jeezas koman fi lov wan anada. Af koars, notn rang if wi feel kloasa tu som a wi bradaz ahn sistaz moa dan adaz. In fak, Jeezas mi feel kloasa tu som a ih disaipl moa dan adaz tu. (Jan 13:23; 20:2) Soh eevn doa wi mait feel kloasa tu som, Peeta rimain wi dat wi fi stil werk haad fi shoa chroo chroo lov fi aala wi bradaz ahn sistaz bikaaz aala wi da paat a wan big famili.—1 Peet. 2:17.

11. Weh ih meen fi shoa “deep lov fi wan anada”?

¹¹ Peeta inkorij wi fi “ga deep lov fi wan anada.” Soh if wahn brada er sista ofen wi er hert wi, weh wi wuda du? Ih nachral fi waahn chreet dehn di saym way dehn chreet wee. Bot fi shoa dat wi ga “deep” lov fi wan anada meen dat wi wahn shoa da persn lov eevn if ih haad fi du dat. Aalso, Peeta mi laan fahn Jeezas dat wi noh fi chreet adaz bad if dehn ofen er hert wi bikaaz Jehoava noh wahn pleez wid wi. (Jan 18:​10, 11) Peeta mi seh: “Noh pay bak eevl fi eevl, er if sombadi insolt yu, noh insolt dehn bak. Insteda dat, du sohnting gud fi dehn.” (1 Peet. 3:9) Wen yu ga da kaina deep lov, ih wahn help yu fi shoa kainis ahn fi bee kansidarayt tu adaz eevn wen dehn hert er ofen yu.

12. (a) If wi lov wan anada fahn wi haat, weh dat wahn help wi fi du? (b) Laik weh wi si eena di veedyo naym Protek di Preshos Gif a Yooniti, weh aala wi need fi werk haad fi du?

¹² Eena Peeta fers leta, ih mi seh wi fi “lov wan anada fahn [wi] haat.” Dis kaina lov noh wahn limit humoch taim wi fergiv adaz. Insted, wi fi “aalwayz wilin fi fergiv adaz.” (1 Peet. 4:8) Maybi Peeta mi-di tink bowt di lesn weh Jeezas mi teech bowt fergivnis sohn yaaz erliya. Da taim deh, Peeta mi tink dat ih mi-di bee jenaros wen ih tel Jeezas dat ih mi wilin fi fergiv sohnbadi “op tu sevn taimz.” Bot Jeezas mi help ahn fi si dat no limit deh pahn humoch taimz wi fi fergiv adaz wen ih tel Peeta “noh jos op tu sevn taimz, bot op tu 77 taimz.” (Mach. 18:​21, 22) Noh feel diskorij if yu fain it haad fi du weh Jeezas seh. Non a wi noh perfek, soh ih noh eezi fi mek wi fergiv adaz. Di impoatant ting da fi du evriting wi kud fi fergiv wi bradaz ahn mek pees wid dehn. c

13. Wai ih noh aalwayz eezi fi mek eldaz tek kayr a di bradaz ahn sistaz eena di kangrigayshan?

¹³ Afta Jeezas mi geh rezorek, hihn mi tel Peeta: “Leed mi lee sheep dehn di way wahn shepad wuda leed dehn.” Fi shoar,  Peeta neva ferget weh Jeezas mi tel ahn. (Jan 21:16) If yoo da wahn elda, yoo noa dat ih impoatant fi fala dehnya inschrokshanz tu. Dis da wahn impoatant asainment, bot ih noh eezi fi tek kayr a di sheep. Eldaz need fi tek kayr a dehn famili fers. Dat meenz dat dehn need fi mek shoar dehn famili ga evriting weh dehn need, dehn spen taim wid dehn, ahn help dehn jraa kloasa tu Jehoava. Pahn tap a dat, dehn need fi tek di leed eena di preechin werk ahn pripyaa fi gi taak da di meetin, asembli, ahn kanvenshan dehn. Som eldaz da membaz a di Hospital Liaison Committee er dehn help eena di Local Design/Construction Department. Dis shoa wi dat di eldaz reeli bizi!

14. Weh ku help eldaz fi shepad di flak? (1 Peeta 5:​1-4)

¹⁴ Peeta mi beg ih felo eldaz fi bee laik shepadz ahn “tek kayr a di flak weh bilangz tu Gaad.” (Reed 1 Peeta 5:​1-4.) Wi noa dat unu eldaz lov di bradaz ahn sistaz eena di kangrigayshan an unu waahn tek kayr a dehn, bot sohntaim unu mait feel dat unu soh bizi ahn taiyad dat unu kyaahn du evriting weh unu waahn du. If yu feel laik dat, weh yoo ku du? Poar owt yu haat tu Jehoava ahn tel ahn how yu feel. Peeta mi seh: “If enibadi serv adaz, mek ih pen pahn di schrent a Gaad.” (1 Peet. 4:11) Yu bradaz ahn sistaz mait di fays prablemz weh kyaahn geh fiks til di nyoo werl. Memba dat di “cheef shepad,” Jeezas Krais, ku help dehn moa dan enibadi els. Hihn ku help dehn now an eena di nyoo werl. Aal weh Gaad aks eldaz fi du da fi lov dehn bradaz, shepad dehn, ahn fi bee “wahn egzampl” tu dehn.

15. How Brada William help ih bradaz ahn sistaz? (Koment pahn di picha.)

¹⁵ Wahn brada weh naym William di serv az wahn elda fi wahn lang taim now, ahn hihn andastan dat ih impoatant fi shepad di bradaz ahn sistaz. Wen di COVID-19 pandemik mi staat, hihn ahn di ada eldaz eena di kangrigayshan mi werk haad fi taak tu eech persn eena fi dehn feel servis groop evri week. Wai dehn mi du dat? Hihn seh: “Wahn lata di bradaz ahn sistaz deh hoam bai dehnself, an ih wuda bee eezi fi mek dehn staat tink negitiv.” Wen  wahn brada er sista ga wahn prablem, Brada William wuda lisn gud fi si weh dehn need er weh di wori dehn. Den, ih wuda goh pahn wi websait fi luk fi sohn veedyo er poblikayshan weh ku inkorij da brada er sista. Ih seh: “Wi need fi shepad wi bradaz ahn sistaz now moa dan eva bifoa. Wi werk haad fi help peepl laan bowt Jehoava. Wi need fi werk jos az haad fi shepad di flak ahn help Jehoava sheep stay eena di chroot.”

16. How wi ku yooz di lesn dehn weh wi laan fahn di too leta weh Peeta mi rait eena wi laif?

¹⁶ Dehn ga wahn lata lesn weh wi ku laan fahn Peeta too letaz, bot eena dis aatikl wi mi onli diskos som a dehn. Maybi yu mi noatis sohnting weh yoo need fi werk pan. Fi egzampl, yoo wuda waahn spen moa taim di meditayt pahn di wandaful tingz weh wi wahn injai eena di nyoo werl? Yoo waahn mek it wahn goal fi preech da werk, da skool, er eena eni ada sichuwayshan weh mait kom op? Yoo si wayz how yu ku shoa moa lov fi yu bradaz ahn sistaz? Eldaz, unu mek op unu main fi bee wilin fi werk haad fi shepad Jehoava sheep? If yu aanis wid yuself, yu mait noatis dat yu ga tingz weh yu need fi werk pan, bot noh feel diskorij. “Di Laad kain” ahn hihn wahn help yu fi du beta. (1 Peet. 2:3) Peeta tel wi: “Gaad . . . wahn finish unu chraynin. Ahn hihn wahn mek unu schrang, hihn wahn help unu fi stay faytful, ahn hihn wahn put unu pahn wahn salid fongdayshan.”—1 Peet. 5:10.

17. If wi noh giv op ahn wi mek Jehoava kantinyu chrayn wi, weh blesinz wi wahn get?

¹⁷ Peeta yoostu feel laik ih neva dizerv fi deh kloas tu Gaad Son. (Look 5:8) Bot Peeta mi aybl fi kantinyu werk haad fi fala Krais bikaaz a di lov ahn sopoat weh ih get fahn Jehoava ahn fahn Jeezas. Sayka dat, Jehoava mi alow Peeta fi goh een chroo “di doa tu di evalastin Kingdom a wi Laad ahn Sayvya Jeezas Krais.” (2 Peet. 1:11) Dat da-mi wahn wandaful blesin! If yoo du laik Peeta ahn noh giv op ahn yu mek Jehoava chrayn yu, yoo ku geh evalastin laif tu. Yu “fayt wahn giv [yu] salvayshan.”—1 Peet. 1:9.