STODI AATIKL 38
Yong Peepl—Weh Kaina Laif Yu Waahn fi Yuself?
“Andastandin wahn protek yu.”—PROV. 2:11.
SANG 135 Weh Jehoava Waahn fi Yong Peepl
WEH WI WAHN DISKOS? a
1. Weh big rispansabiliti Jehoawash, Yuzaiya, ahn Josaiya mi gat?
IMAJIN yu mi haftu rool oava Gaad peepl wen yu da-mi wahn lee pikni er wahn teenayja. How yu wuda mi yooz yu atariti er powa fi rool oava Gaad peepl? Eena di Baibl wi ku reed bowt sohn pikni ahn teenayja weh mi rool az king oava Jooda. Fi egzampl, Jehoawash mi sevn yaaz oal, Yuzaiya mi 16 yaaz oal, ahn Josaiya mi ayt yaaz oal wen dehn mi ton king. Dis mosi mi haad fi dehn, noh chroo? Eevn doa dis da-mi wahn big rispansabiliti, Jehoava mi mek shoar dehn mi ga di help weh dehn mi need fi du lata gud tingz.
2. Wai ih gud fi stodi Jehoawash, Yuzaiya, ahn Josaiya egzampl?
2 Wee ku laan sohn impoatant lesn fahn Jehoawash, Yuzaiya, ahn Josaiya, eevn doa wi noh haftu bee king er kween. Wi ku laan fahn di gud ahn bad disizhanz weh dehn mi mek. Wen wi fala fi dehn egzampl, ih teech wi wai ih impoatant fi chooz gud frenz, stay hombl, ahn kantinyu geh fi noa Jehoava beta.
CHOOZ GUD FRENZ
Wee ku fala Jehoawash egzampl if wi lisn tu di gud advais weh wi bradaz ahn sistaz gi wi (Paragraaf 3, 7) j
3. How Jehoyada mi help King Jehoawash fi mek waiz disizhanz?
3 Mek gud disizhanz laik Jehoawash. Wen Jehoawash da-mi wahn lee bwai, ih pa mi ded ahn Jehoyada di hai prees mi rayz ahn op ahn teech ahn bowt Jehoava. Jehoawash mi waiz bikaaz ih mi lisn tu Jehoyada advais. Soh Jehoawash mi disaid fi serv Jehoava, an ih mi aalso help di peepl fi serv Jehoava tu. Pahn tap a dat, Jehoawash mi mek shoar dat dehn fiks op bak Jehoava templ.—2 Chron. 24:1, 2, 4, 13, 14.
4. How wee benifit wen wi lov an obay Jehoava komanment dehn? (Proverbs 2:1, 10-12)
4 If yu payrents er sohnbadi di teech yu fi serv ahn lov Jehoava, den dat da di bes gif dehn kuda eva gi yu. (Reed Proverbs 2:1, 10-12.) b Dehn ga lata wayz how payrents ku chrayn dehn pikni. Noatis how Katya pa mi help shee fi mek gud disizhanz. Evri day fi shee pa wuda taak tu ahn bowt di dayli teks wail ih kehr ahn da skool. Katya seh, “Dehndeh kanvasayshan help mi fi du weh rait wen prablemz kom op joorin di day.” Yu payrents mait set roolz weh bays pahn di Baibl, bot wat if yu feel laik dehndeh roolz noh alow yu fi du tingz weh yu laik? Wat wahn help yu fi lisn tu yu payrents advais? Wahn sista weh naym Anastasia memba wen fi shee payrents wuda tek taim fi eksplayn wai dehn set sertn roolz fi shee. Shee seh, “Dat help mi fi si dat dehn noh mek op roolz fi chrai kanchroal mi. Insted da fi protek mi bikaaz dehn lov mi.”
5. How di disizhanz weh yu mek afek yu payrents ahn Jehoava? (Proverbs 22:6; 23:15, 24, 25)
5 Yu wahn mek yu payrents hapi wen yu lisn tu di advais weh dehn gi yu fahn di Baibl. Bot moa dan dat, yu wahn mek Jehoava hapi ahn yu wahn ga wahn schrang frenship wid ahn. (Reed Proverbs 22:6; 23:15, 24, 25.) c d Yu noh tink dat dehnya da gud reezn wai wi shuda kapi di egzampl weh Jehoawash set wen ih mi smaal?
6. Afta Jehoyada mi ded, hoo Jehoawash mi staat lisn tu, ahn weh mi hapm sayka dat? (2 Chronicles 24:17, 18)
6 Laan fahn Jehoawash bad egzampl. Afta Jehoyada mi ded, Jehoawash mi chooz frenz weh neva inkorij ahn fi du gud tingz. (Reed 2 Chronicles 24:17, 18.) e Jehoawash mi lisn tu di hai ofishal dehn a Jooda weh neva lov Jehoava. Hihn shuda mi stay faar fahn dehn, noh chroo? (Prov. 1:10) Bot insted, ih mi lisn tu fi dehn bad advais. Jehoawash mi eevn kil ih kozn Zekaraiya weh mi-di chrai karek ahn. (2 Chron. 24:20, 21; Mach. 23:35) Weh hihn mi du mi terabl ahn foolish! Jehoawash mi staat owt gud az wahn faytful king, bot den ih mi en op di merda ahn bee wahn apastayt. Ahn laytaraan ih oan servant dehn mi kil ahn. (2 Chron. 24:22-25) If onli Jehoawash mi kantinyu lisn tu Jehoava ahn tu peepl weh mi lov Ahn, ih laif mi wahn bee difrent. Weh wi ku laan fahn dis?
7. Hoo wee shuda pik az frenz? (Koment pahn di picha.)
7 Eena dis kays, Jehoawash egzampl teech wi dat wi need fi chooz gud frenz. If wi ga frenz weh lov Jehoava ahn weh mek hihn hapi, den dehn wahn inkorij wi fi du gud tingz. Wi frenz noh haftu bee di saym ayj az wee. Fi egzampl, Jehoyada mi way oalda da Jehoawash. Tink bowt di frenz weh yu ga, an aks yuself dehnya kweschan: ‘Mai frenz help mi fi ga schranga fayt eena Jehoava? Dehn inkorij mi fi du tingz Jehoava way? Wi taak tugeda bowt Jehoava ahn di Baibl? Dehn rispek Jehoava hai standadz a weh rait ahn weh rang? Mai frenz ga di korij fi karek mi wen Ah rang?ʼ (Prov. 27:5, 6, 17) Yu noh need frenz weh noh lov Jehoava. Bot if dehn lov Jehoava, stay kloas tu dehn kaaz dehn wahn help yu fi liv wahn gud laif!—Prov. 13:20.
8. If wi yooz soashal meedya, weh wi shuda tink bowt?
8 Soashal meedya da wahn gud way fi kamyoonikayt wid wi famili ahn frenz. Bot lata peepl yooz it fi bregin bowt dehnself. Fi egzampl, dehn mait yooz it fi poas pichaz ahn veedyoz a di tingz weh dehn gat, er di tingz weh dehn du. If yu yooz soashal meedya, yu ku aks yuself dehnya kweschanz: ‘Di tingz weh Ai poas inkorij adaz, er Ai jos di chrai mek miself luk gud? Di tingz weh ada peepl poas afek weh Ai du er di way Ai taak er tink?ʼ Brada Nathan Knorr, hoo da-mi wahn memba a di Govanin Badi, mi gi sohn gud advais: “If yu chrai pleez peepl, nobadi wahn hapi. Bot wen yu pleez Jehoava, evribadi weh lov hihn wahn hapi.”
WI MOS KANTINYU BEE HOMBL
9. How Jehoava mi help Yuzaiya? (2 Chronicles 26:5)
9 Mek gud disizhanz laik Yuzaiya. Wen King Yuzaiya mi yong, ih mi hombl. (2 Chronicles 26:1-4.) Ih mi aalso laan fi ga “lata rispek” fi Gaad. Hihn mi liv til ih 68 yaaz oal an ih mi faytful fi moas a ih laif. Jehoava mi bles ahn wahn lat. (Reed 2 Chronicles 26:5.) f King Yuzaiya mi win wahn lata waar gens ih enimi dehn an ih mi mek shoar fi kip Jeroosalem sayf. (2 Chron. 26:6-15) Yuzaiya mosi mi hapi bikaaz a aal di tingz weh Jehoava mi help ahn du.—Eccl. 3:12, 13.
10. Weh mi hapm tu Yuzaiya laytaraan eena laif?
10 Laan fahn Yuzaiya bad egzampl. King Yuzaiya mi don geh yoostu di tel peepl weh fi du. Yu tink hihn mi feel laik ih kuda du eniting weh ih waahn? Wan day, ih mi gaan eena di templ ahn chrai bon insens pahn di alta, eevn doa dis da sohnting weh ih neva ga di atariti fi du. (2 Chron. 26:16-18) Hai Prees Azaraiya mi chrai karek ahn, bot Yuzaiya mi geh beks wid ahn. Sad fi seh, Yuzaiya neva stay faytful ahn Jehoava mi ponish ahn wid leprosi. (2 Chron. 26:19-21) If Yuzaiya mi stay hombl, ih laif wuda mi bee soh moch beta!
Insteda bee boasi, wi shuda tank Jehoava ahn giv ahn di prayz fi evriting weh wi du (Paragraaf 11) k
11. Weh ku help wi fi stay hombl? (Koment pahn di picha.)
11 Wen Yuzaiya mi geh powaful, hihn mi stap apreeshiayt aal di gud tingz weh Jehoava mi du far ahn. Weh wi ku laan? Wi neva waahn ferget dat eni blesin er privilij weh wi gat kohn fahn Jehoava. Soh insteda boas bowt di tingz weh wi du, wi shuda aalwayz gi di prayz tu Jehoava. Jehoava da di wan weh di help wi eena evriting weh wi du. g (1 Kor. 4:7) Wi need fi bee hombl ahn memba dat wi noh perfek ahn dat wi need karekshan now an agen. Wahn brada weh bowt 60 yaaz oal seh: “Ah laan fi noh bee tu tin-skin er fi beet op miself oava wahn mistayk weh Ah mek. Wen enibadi karek mi fi di sili tingz weh Ah du, Ah chrai fi du beta ahn kantinyu giv Jehoava mi bes.” Wen wi obay Jehoava ahn stay hombl, wi laif wahn bee hapiya.—Prov. 22:4.
KANTINYU GEH FI NOA JEHOAVA BETA
12. Wen Josaiya mi yong, weh aal hihn mi du fi geh fi noa Jehoava beta? (2 Chronicles 34:3)
12 Mek gud disizhanz laik Josaiya. Wen Josaiya da-mi wahn teenayja, hihn mi ga wahn schrang dizaiya fi serv Jehoava. (2 Chronicles 34:1-2). Bot laif neva eezi fi Josaiya. Evribadi mi-di serv faals gaadz, soh Josaiya mi haftu ga korij fi stan op fi Jehoava. Bifoa ih reech 20 yaaz oal, hihn mi geh rid a aala di faals gaad dehn eena Jooda ahn Jeroosalem.—Reed Chronicles 34:3. h
13. If yu dedikayt yu laif tu Jehoava, weh dat meen fi yoo?
13 Eevn if yu yong, yu ku chooz fi serv Jehoava ahn laan bowt ih byootiful kwaliti dehn, jos laik Josaiya. If yu du dis, ih wahn moov yu fi dedikayt yu laif tu Jehoava. Afta dat, how yu wahn liv yu laif? Luke, weh mi geh baptaiz wen ih mi 14 seh: “Now, Ah wahn put Jehoava fers eena mai laif ahn mek ahn hapi.” (Maak 12:30) Jehoava wahn bles yu if yu serv ahn!
14. Gi wahn egzampl a how sohn yong peepl di kapi King Josaiya.
14 If yu yong ahn yu di serv Jehoava, weh kaina chalenjiz mait kom op? Johan, hoo mi geh baptaiz wen ih mi 12, seh dat ih klaasmayt dehn mi presha ahn fi vayp. Johan mi noa dat if ih vayp, dat mi wahn afek ih helt pahn di langa ron ahn damij ih rilayshanship wid Jehoava. Soh dat mi help ahn fi bee schrang ahn noh giv eena tu di presha weh ih mi-di fays. Rachel, hoo mi geh baptaiz wen ih mi 14, tel wi how shee mi bayr op wid chalenjiz da skool. Shee seh: “Ai chrai luk fi tingz weh rimain mi bowt Jehoava ahn di Baibl. Fi egzampl, if wi di laan sohnting bowt hischri, Ah chrai kanek it wid wahn Baibl stoari er prafesi. Er if Ah di taak tu sohnbadi, Ah wuda chrai tink bowt wahn skripcha weh Ah ku shayr wid dehn.” Di chalenjiz weh yoo goh chroo mait bee difrent fahn weh King Josaiya mi gaahn chroo, bot yoo ku stil bee waiz ahn faytful laik hihn. If yu handl dehnya chraiyalz az wahn yong persn rait now, yu wahn ku handl ada chraiyalz eena di fyoocha.
15. Weh mi help Josaiya fi stay faytful tu Jehoava? (2 Chronicles 34: 18-21)
15 Wen King Josaiya da-mi wahn adolt, hihn mi mek ih peepl fiks op Jehoava templ. Joorin da taim, wahn prees mi fain “di buk weh gat een di Laa weh Jehoava mi gi Moaziz.” (2 Chronicles 34:14) Wen di king hyaa weh mi deh eena da buk, hihn mi staat tu mek chaynjiz rait away. (Reed 2 Chronicles 34:18-21.) i Yoo wuda waahn reed di Baibl evriday? If yu don di du dat, how ih di goh? Yu maak dong di vers dehn weh ku help yu? Luke, weh wi mi taak bowt erliya, rait dong di inchrestin points weh ih wuda fain eena ih Baibl reedin. If yoo du sohnting laik dat, yu tink ih ku help yu fi memba di vers dehn ahn di points weh yu laik? Di moa yu lov Gaad Werd, di moa yu wahn waahn serv Jehoava. Den yu wahn bee laik Josaiya ahn mek chaynjiz eena yu laif.
16. Wai Josaiya mi mek wahn seeryos mistayk, ahn weh lesn wi ku laan fahn dat?
16 Laan fahn Josaiya bad egzampl. Wen Josaiya mi bowt 39 yaaz oal, hihn mi chros ihself insteda Jehoava, ahn sayka dat ih en op di ded. (2 Chron. 35:20-25) Weh lesn wi ku laan fahn dis? Noh mata how oal wi er how lang wi di stodi di Baibl, wi haftu kantinyu di aks Jehoava fi gaid wi. Fi du dis, wi need fi aalwayz pray fi mek Jehoava gaid wi, stodi ih werd di Baibl, ahn geh help fahn machoar Kristyanz. Wen wi du dat, ih ku help wi fi noh mek seeryos mistayk ahn wi wahn bee moa hapiya.—Jay. 1:25.
YONG PEEPL—UNU KU GA WAHN HAPI LAIF
17. Weh impoatant lesn wi laan fahn di chree kingz a Jooda?
17 Wen yu yong, yu ga wahn lata tingz weh yu ku du. Jehoawash, Yuzaiya, ahn Josaiya egzampl shoa wi dat yong peepl ku mek waiz disizhanz ahn liv wahn laif weh pleez Jehoava. Stilyet, dehnya chree king egzampl teech wi dat bikaaz wi noh perfek, sohntaim wi mait mek sohn bad disizhanz ahn tingz mait noh aalwayz werk owt gud. Bot if yu laan fahn di gud tingz weh dehn du, ahn chrai noh mek di saym mistayk weh dehn mek, yu wahn ku ga wahn hapi laif.
Wen Dayvid mi yong, hihn mi jraa kloas tu Jehoava. Jehoava mi si ahn az wahn faytful servant, ahn hihn mi liv wahn hapi laif (Paragraaf 18)
18. Weh Baibl egzamplz shoa wi dat wi ku liv wahn gud ahn hapi laif? (Koment pahn di picha.)
18 Di Baibl gat een ada egzamplz a yong peepl weh mi chooz fi jraa kloas tu Jehoava. Dehn mi pleez ahn, an dehn laif mi ton owt gud. Dayvid da-mi wan a dehn. Hihn mi chooz fi wership Jehoava ahn laytaraan hihn da-mi wan a Jehoava laayal king. Af koars, hihn mi did mek sohn mistayk, bot Gaad mi stil si ahn az wahn faytful servant. (1 Ki. 3:6; 9:4, 5; 14:8) If yu stodi bowt Dayvid laif stoari, dat wahn inkorij yu fi bee faytful tu Jehoava. Yu ku aalso stodi ahn laan fahn Maak ahn Timoti egzampl. Dehn mi staat tu serv Jehoava wen dehn mi yong ahn dehn mi stay faytful tu Jehoava dehn hoal laif. Di disizhan weh dehn mi mek fi serv Jehoava mi mek hihn hapi, ahn dehn mi liv wahn hapi laif tu.
19. Weh kaina laif yoo waahn liv?
19 Di disizhanz weh yu mek eena yu laif rait now wahn shoa weh yu laif wahn bee laik eena di fyoocha. If yu chros eena Jehoava ahn noh yuself, hihn wahn help yu fi mek waiz disizhanz. (Prov. 20:24) Yu wahn ku liv wahn gud ahn hapi laif. Jehoava noh wahn ferget weh yu du fi hihn. Di bes way yu ku yooz yu laif da fi serv Jehoava.
SANG 144 Kip Yu Aiy Pahn di Praiz!
a Jehoava noa ih ku bee haad fi mek yong wanz deel wid chraiyalz weh tes dehn frenship wid Ahn. Weh ku help unu mek waiz disizhanz weh wahn mek Jehoava hapi? Eena dis aatikl, wi wahn si di egzampl a chree yong king weh mi haftu rool oava Jooda. Mek wi si weh wi ku laan fahn di disizhanz weh dehn mi mek.
b Proverbs 2:1, 10-12: “Mi son, aksep di ting dehn weh Ah tel yu ahn chrezha mi komanment dehn. 10 Wen wizdom enta eena yu haat ahn nalij plezant tu yu soal, 11 yu tinkin wahn kip yu sayf, an andastandin wahn protek yu. 12 Ih wahn sayv yu fahn goh di rang way, fahn di man weh taak loan badnis”
c Proverbs 22:6: “Chrayn wahn chail eena di way ih fi goh; eevn wen ih groa oal ih noh wahn schray fan it.”
d Proverbs 23:15, 24, 25: “Mi son, if yu chooz fi bee wahn waiz persn, den Ai wahn bee hapi. 24 Wahn son weh du weh rait wahn mek ih pa hapi. Eni man weh ga wahn waiz son wahn bee hapi wid ahn. 25 Yu pa ahn yu ma wahn bee hapi. Ahn yu ma weh baan yu wahn bee hapi hapi.”
e 2 Chronicles 24:17, 18: “Afta Jehoyada ded di hai ofishal dehn fahn Jooda gaahn bow dong tu di king, ahn di king lisn tu dehn. 18 Dehn mi abandan di hows weh bilangz tu Jehoava di Gaad a dehn ansestaz ahn dehn staat tu wership di Ashera poas ahn di aidol dehn. Sayka di bad tingz weh di peepl a Jooda ahn Jeroosalem mi du, Jehoava mi geh beks wid dehn.”
f 2 Chronicles 26:5: “Now Zekaraiya mi teech Yuzaiya fi rispek di chroo Gaad. Wail Zekaraiya mi alaiv, Yuzaiya mi kantinyu serv Jehoava ahn joorin da taim di chroo Gaad mi bles ahn.”
g Si di baks “Beware of the ‘humble bragʼ” eena di aatikl weh naym “How Important Is Online Popularity?” pahn jw.org.
h 2 Chronicles 34:3: “Josaiya mi yong yet an ih don mi-di rool fi ayt yaaz wen ih staat tu serv di Gaad weh fi hihn ansesta Dayvid mi wership. Ahn bifoa 12 yaaz mi paas wid hihn di rool az king, ih staat tu dischrai aala di Ashera poas, di aidol, di metal stachu, ahn di plays wehpaat di peepl mi wership dehn faals gaadz eena Jooda ahn Jeroosalem.”
i 2 Chronicles 34:18-21: “Ahn den Shayfan di sekiteri tel di king: “Hilkaiya di prees mi gi mi wahn buk.” Soh Shayfan staat tu reed weh deh eena di buk tu di king. 19 Az soon az Shayfan staat tu reed di buk a di Laa ahn di king hyaa weh ih seh, ih tayr ih kloaz. 20 Den di king gi wahn koman tu Hilkaiya di prees, Shayfan son Ahaikam, Maika son Abdon, Shayfan di sekiteri, ahn di king servant Asaiya. Ih tel dehn: 21 “Goh taak tu Jehoava fi mee, fi dehn wan weh deh da Izrel, an evribadi weh deh da Jooda, ahn fain owt weh di werdz eena dis buk meen fi wi, bikaaz Jehoava beks bad wid wi sayka weh wi ansestaz dehn neva obay evriting weh deh rait dong eena dis buk laik how Jehoava mi koman dehn fi du.”
