1-2. Wai Jehoava peepl hapi? (Jaymz 1:​22-25)

 JEHOAVA ahn Jeezas waahn mek wi bee hapi. Saam 119:2 seh: “Enibadi weh lisn tu [Jehoava] rimaindaz ahn saach far ahn wid dehn hoal haat wahn bee hapi.” Ahn Jeezas mi pramis dat “Gaad wahn bles dehn wan weh lisn tu hihn ahn du weh ih seh!”—Look 11:28.

² Jehoava servants hapi. Wai? Dehn ga lata reeznz, bot wan a di bigis reezn da bikaaz dehn reed di Baibl evri day ahn dehn yooz weh dehn laan eena dehn laif.—Reed Jaymz 1:​22-25.

3. How wee benifit wen wi du weh Gaad Werd seh fi du?

³ Dehn ga lata wayz how wee benifit wen wi “du weh Gaad werd seh fi du.” Fi egzampl, wi mek Jehoava hapi, ahn dat mek wee hapi tu. (Ikl. 12:13) Wi aalso ga wahn beta rilayshanship wid wi famili ahn wi bradaz ahn sistaz eena di kangrigayshan. Fi shoar, yu praabli geh fi si dis eena yu oan laif. Bikaaz wi du weh Jehoava waahn, wi noh ga az moch prablemz az peepl weh noh obay Jehoava. Sayka dis, wi agree wid weh King Dayvid seh. Afta hihn lis aaf Jehoava laa, inschrokshan, ahn jojment dehn, hihn seh: “Wahn big riwaad  deh fi enibadi weh obay dehn.”—Saa. 19:​7-11.

4. Wai ih noh eezi fi du weh Gaad Werd tel wi fi du?

⁴ Ih noh aalwayz eezi fi du weh Gaad Werd tel wi fi du. Eevn doa wi ga wahn bizi laif, wi haftu mek taim fi reed di Baibl ahn stodi it soh dat wi ku andastan weh Jehoava waahn fahn wi. Dis aatikl wahn gi wi sojeshanz weh wahn help wi reed di Baibl evri day, tink bowt weh wi reed, ahn yooz weh wi laan fahn di Baibl eena wi laif.

MEK TAIM FI REED DI BAIBL

5. Wai wi soh bizi?

⁵ Jehoava servants da bizi peepl. Fi egzampl, moas a wi haftu werk haad fi put food pahn di taybl fi wiself ahn wi famili. (1 Tim. 5:8) Som a wi mait haftu tek kayr a wahn famili memba weh sik er oal. An eech wan a wi need fi tek kayr a wi oan helt, ahn dat tek taim tu. Pahn tap a dat, wi ga rispansabilitiz eena di kangrigayshan. Fi egzampl, az Kristyanz, ih impoatant fi mek wi du wi bes fi preech. Aala dehnya tingz da tingz weh di Baibl seh wi sopoas tu du. Laik how wi soh bizi wid aala dehndeh tingz, how wi ku mek taim fi reed wi Baibl evri day, tink bowt weh wi reed, ahn du weh ih teech wi?

6. How wee ku mek shoar wi reed wi Baibl evri day? (Koment pahn di picha.)

⁶ Fi Kristyanz, wan a “di moa impoatant tingz” da Baibl reedin. (Fil. 1:10) Soh wi haftu mek shoar wi reed wi Baibl evri day noh mata wat. Saam 1 seh dat wahn hapi man “lov Jehoava laa wahn lat, an ih reed da laa eena wahn loa vais evri day an evri nait.” (Saa. 1:​1, 2) Dat teech wi dat wi haftu mek taim fi reed di Baibl. Wen da di bes taim fi du dis? Eech persn difrent, soh yu ku du it weneva da di bes taim fi yoo. Wahn brada weh naym Victor seh: “Ah noh laik get op erli da maanin, bot dat da di  bes taim fi mek Ah reed mi Baibl, bikaaz noh moch dischrakshan deh ahn mi main fresh.” Yu tink di maanin ku werk fi yoo tu? Aks yuself, ‘Wat da di bes taim fi mek Ai reed di Baibl?ʼ

TINK BOWT WEH YU REED

7-8. Aala wi waahn benifit fahn wi Baibl reedin, bot weh ku stap wi fahn dat? Yooz di egzampl eena di paragraaf.

⁷ Sohntaim wi mait reed wahn pail a infamayshan ahn noh memba evriting wi mi reed. Dis eva hapm tu yoo? Di saym ting ku hapm wen yu di reed yu Baibl. If yu don di mek taim fi reed di Baibl evri day, dat gud. Bot yu haftu mek shoar yu noh di reed jos fi reed sayk. Maybi yu set di goal fi reed wahn kopl chaptaz eech day. Wi need fi set goalz ahn chrai stik tu dehn, bot if yu waahn benifit fahn yu Baibl reedin yu haftu du moa dan jos reed it.—1 Kor. 9:26.

⁸ Tink bowt dis egzampl: Plaants need waata. Bot if ih rayn tu moch, di grong wahn kyaahn soak op aala di waata ahn di plaants wahn kyaahn yooz it. Bot if plaants geh di rait amonk a waata, dehn wahn groa helti. Saym way soh, wen wi reed wi Baibl, wi need fi tek wi taim soh dat wi ku soak op weh wi di reed ahn yooz it eena wi laif.—Jay. 1:24.

9. Weh wi ku du if wi fain wiself di reed tu faas?

⁹ Weh yoo ku du if yu fain yuself di reed tu faas? Sloa dong. Tek taim fi tink bowt weh yu reed. Maybi wen yu reed yu Baibl yu ku tek wahn lee ekschra taim fi tink bowt weh yu reed. Er maybi yu ku reed les vers ahn den yooz di res a di taim fi tink bowt weh yu reed. Brada Victor, weh wi mi menshan erliya, seh: “Wen Ah reed di Baibl, Ah wuda onli reed wan chapta. Ah chrai kip it shaat. Ahn sins Ah reed it da maanin, Ah ku tink bowt it fi di res a di day.” Wateva yoo disaid fi du, jos  mek shoar yu tek taim ahn noh reed tu faas soh dat yu ku tink bowt weh yu reed.—Saa. 119:97; si di baks weh naym “ Kweschanz Yu Ku Aks Yuself.”

10. Gi wahn egzampl a how yu ku yooz weh yu laan fahn di Baibl eena yu laif. (1 Tesaloanyanz 5:​17, 18)

¹⁰ Noh mata wen yu reed yu Baibl er how moch yu reed, aks yuself, ‘How Ai ku yooz di infamayshan weh a laan eena mi laif now er laytaraan?ʼ Lesgoh seh yu Baibl reedin da 1 Tesaloanyanz 5:​17, 18. (Reed.) Afta yu reed dehndeh vers, yu ku aks yuself kweschanz laik: ‘How moch taimz Ai pray fi di day? Ahn wen Ai pray, Ai reeli pray fahn mi haat?ʼ Maybi yu kud aalso tink bowt di tingz yu tankful tu Jehoava fa. Az yu di tink bowt dehndeh vers, yu disaid fi tank Jehoava fi chree spesifik tingz eena yu neks pryaa. Eena jos wahn fyoo minits, yu noh onli wahn hyaa weh Gaad Werd seh, bot yu wahn aalso du weh Gaad Werd tel yu fi du. Imajin humoch yu wahn laan if yu du dis evri taim yu reed yu Baibl. Fi shoar yu wahn geh fi bee wahn beta persn. Bot wat if yu staat noatis dat yu ga lata tingz fi werk pan?

SET GOALZ WEH YU KU REECH

11. Weh ku mek yu feel diskorij? Yooz di egzampl eena di paragraaf.

¹¹ Wen yu reed yu Baibl ahn yu fain tingz weh yu need fi werk pan, sohntaim yu mait feel diskorij. Fi egzampl, maybi yu Baibl reedin tudeh taak bowt how yu noh fi chreet som peepl beta dan adaz. (Jay. 2:​1-8) Yu riyalaiz dat yu ku chreet peepl beta soh yu disaid fi mek sohn chaynjiz. Dat gud! Den tumaaro maybi yu reed bowt wai ih impoatant fi tink bifoa yu taak. (Jay. 3:​1-12) Ahn sohntaim yu fain yuself di seh tingz weh noh kain, soh yu disaid fi bee moa inkorijin tu adaz. Den di day afta dat, maybi yu reed bowt wai yu noh fi bee fren wid di werl. (Jay. 4:​4-12) Soh yu disaid yu wahn bee moa kyaaful wid yu entataynment. Bai di neks day, yu mait feel laik yu jos ga tu moch fi werk pan, ahn yu geh diskorij.

12. Wai yu noh fi feel diskorij if yu ga lata tingz fi werk pan? (Koment pahn di futnoat.)

¹² Noh feel diskorij if yu ga lata tingz fi werk pan, bikaaz dat jos shoa dat yu  ga wahn gud haat, yu hombl, ahn yu aanis wid yuself. Onli if yu gat dehndeh kwalitiz yu wahn ku noa weh yu need fi werk pan. a Ih aalso impoatant fi memba dat fi put aan di “nyoo persn” noh wahn hapm oava nait. Insted, da sohnting weh yu haftu kantinyu werk pan. (Kol. 3:10; kompyaa di stodi noat pahn “is being made new” eena di Study Bible.) Soh weh ku help yu fi noh geh diskorij wen yu ga lata tingz fi werk pan?

13. Weh wi ku du if wi feel laik wi ga tu moch tingz fi werk pan? (Koment pahn di picha.)

¹³ Insteda chrai werk pahn evriting wan lik, maybi yu ku rait dong aal di tingz weh yu need fi werk pan, ahn den pik owt wan er too tingz yu shuda werk pan fers. (Prav. 11:2) An afta dat, yu ku werk pahn di res wan bai wan. How yu ku noa wich wan fi werk pan fers?

14. Wich goal yu ku staat werk pan fers?

¹⁴ Yu mait chooz fi werk pahn di eeziyes goal fers, er yu mait pik sohnting weh yu feel laik yu haftu werk pan di moas. Wans yu don disaid weh yu wahn werk pan, yu ku du risaach pan it eena di Watch Tower Publications Index er di Risaach Gaid fi Jehoava Witnisiz. Yu mos aalso memba fi pray bowt it an aks Jehoava fi gi yu di “dizaiya ahn di powa fi du weh hihn waahn.” (Fil. 2:13) Den, yu wahn ku yooz weh yu laan fahn fi hihn Werd eena yu laif. Afta yu don reech yu fers goal, yu wahn feel hapi bowt it, ahn dis wahn mek yu waahn werk pahn wahn nada goal. Az  taim paas, yu wahn fain it eeziya fi mek chaynjiz er fi werk pahn yu Kristyan kwalitiz.

MEK GAAD WERD “WERK EENA UNU”

15. Wai Jehoava peepl difrent fahn adaz weh klaym seh dehn reed di Baibl? (1 Tesaloanyanz 2:13)

¹⁵ Wahn lata peepl klaym seh dehn reed di Baibl wahn lat. Bot yu tink dehn reeli bileev weh deh eena di Baibl? Yu tink dehn du weh di Baibl teech an alow it fi help dehn liv wahn beta laif? No, moas peepl noh fala weh di Baibl seh. Jehoava servants reeli difrent. Jos laik di Kristyanz eena di fers senchri, wi aksep di Baibl “az di werd a Gaad,” noh di werd a man. Soh wi du wi bes fi yooz weh wi laan fahn di Baibl eena wi laif.—Reed 1 Tesaloanyanz 2:13.

16. Weh ku help wi yooz weh wi laan fahn di Baibl eena wi laif?

¹⁶ Ih noh aalwayz eezi fi reed di Baibl ahn du weh ih teech wi. Sohntaim ih mait eevn bee haad fi fain taim fi reed di Baibl evri day. Er wi mait reed it soh faas dat bai di taim wi don, wi noh memba weh wi mi reed. An if wi doo reed di Baibl evri day, wi mait feel diskorij bikaaz wi fain owt wi ga lata tingz fi werk pan. Noh mata wich wan a dehnya prablemz yu di fays, Jehoava ku help yu du weh ih Werd teech wi. Mek wi alow Jehoava fi help wi. Den wi noh wahn ferget weh wi hyaa, wi wahn obay di Werd a Gaad. Di moa wi reed di Baibl ahn yooz weh wi laan fan it eena wi laif, di hapiya wi wahn bee.—Jay. 1:25.