Ai baan eena 1934. Mi payrents da-mi fahn Switzerland ahn dehn moov tu Timmins, wahn tong da Ontario, Canada. Eena 1939, mi ma staat tu reed di Wachtowa magazeen an ih staat tu goh da di meetin dehn weh Jehoava Witnisiz mi gat. Shee mi kehr mee ahn mi chree breda ahn mi chree sista lang wid ahn. Eena no taim, shee tek di chroot ahn geh baptaiz.

Mi pa neva hapi dat mi ma ton wahn Witnis, bot mai ma mi lov di chroot an ih mek op ih main fi neva lef Jehoava. Shee mi stay laayal eevn wen di werk mi deh anda ban da Canada eena di 1940ʼs. Eevn doa mi pa yoostu taak tu mi ma eena wahn rof way, shee mi aalwayz chreet ahn kain ahn shoa ahn rispek. Fi shee gud egzampl mi help mee ahn mi breda ahn sista dehn fi tek di chroot tu. Ih mi tek mi pa wahn wail, bot ih atichood mi chaynj an ih staat tu chreet wi famili kain.

Eena Aagas 1950, Ah gaahn da di Theocracyʼs Increase Asembli da New York Siti. Ah geh fi meet bradaz ahn sistaz fahn aal rong di werl, an Ah lisn tu sohn eksaitin intavyoo fahn bradaz weh grajuayt fahn Gilyad. Dat mi mek Ah waahn du moa eena Jehoava servis, an Ah mek op mi main fi serv Jehoava ful taim. Az Ah get bak hoam, Ah ful owt mi aplikayshan fi regyula painyaa. Bot di Canada branch aafis mi rait bak di seh dat Ah shuda geh baptaiz fers. Ah geh baptaiz pahn Aktoaba 1, 1950, ahn wan mont layta Ah staat tu regyula painyaa. Mi fers asainment da-mi Kapuskasing, wahn tong weh mi deh faar fahn wehpaat Ai mi-di liv.

Eena 1951, di branch aafis mi invait bradaz ahn sistaz weh taak French fi moov da Quebec kaaz dehn mi need lata poblishaz  fi goh preech deh. Ai groa op di taak French an English, soh Ah aksep di invitayshan an Ah geh asain tu Rouyn. Laik weh Ah menshan erliya, Ah neva noa enibadi deh; Ah jos gaahn da di hows weh dehn tel mi fi goh. Bot evriting gaahn gud. Mee ahn Marcel geh fi bee gud frenz, an Ah mi injai mi foa yaaz a servis da Quebec. Ah mi aalso geh fi serv az wahn speshal painyaa deh.

Wen Ah mi deh da Quebec, Ah mi soh hapi dat Ah geh invaitid fi aten di 26th klaas a Gilyad Skool da South Lansing, New York. Ah grajuayt fahn Gilyad pahn Febiweri 12, 1956, an Ah geh asain tu weh wi noa tudeh az Ghana, b West Africa. Bot bifoa Ah kuda moov tu Ghana, Ah mi haftu gaahn bak da Canada fi geh mi paypaz redi. Ah mi figa dat ih mi wahn tek bowt too er chree weeks.

Ah en op di wayt sevn monts fi dehndeh paypaz da Toronto. Joorin da hoal wail, Ah mi stay wid di Cripps famili, an Ah geh fi meet dehn daata, Sheila. Wi faal in lov wid eech ada. Ah geh mi veesa jos bifoa Ah aks ahn fi marid mi. Mee ahn Sheila mi pray bowt di mata ahn wi mi disaid dat Ah shuda goh da mi asainment. Bot wi mi aalso disaid dat wi wuda rait letaz tu eech ada ahn wayt fi si if wi ku geh marid eena di fyoocha. Dat da neva wahn eezi disizhan fi mek, bot laytaraan wi mi fain owt dat da-mi di rait disizhan.

Ah mi chravl fi wan mont pahn chrayn, ship, ahn playn fi reech da Accra, Ghana. Rait deh Ah mi geh asain fi serv az wahn dischrik oavaseeya. Soh Ah mi haftu chravl aal oava Ghana ahn weh wi noa tudeh az Togo ahn Côte dʼIvoire. Moas a di taim, Ah mi chravl bai miself eena di jeep weh di branch mi provaid. Dat da-mi fon an Ah mi reeli injai vizit di bradaz!

Ah mi ga asainments pahn di serkit asembli dehn pahn di weeken. Wi neva ga  no Asembli Haal. Soh di bradaz wuda bil wahn shelta weh mek owta bambu ahn paam branch fi protek di aadyans fahn di son hat. Bikaaz dehn neva ga no rifrij eena di kafiteerya, dehn wuda kip sohn animal kloas bai fi bucha fi provaid food fi di peepl weh mi dehdeh.

Wi mi ga sohn foni ekspeeryens da dehndeh asembli. Wahn taim, Brada Herb Jennings, c weh da-mi wahn mishineri, mi-di gi wahn taak ahn wahn kow eskayp fahn di kafiteerya. Ih dash bitween di platfaam ahn di aadyans. Brada Herb mi stap taak ahn di kow mi luk kanfyooz. Bot foa schrang bradaz mi manij fi kech ahn an kehr ahn bak wehpaat ih bizniz, ahn di aadyans staat tu klap.

Joorin di week bifoa di asembli dehn, Ah mi shoa wi moovi The New World Society in Action da di vilij dehn kloas bai. Ah mi heng wahn wait klaat bitween too poas er too chree ahn play di moovi pan it. Di peepl da di vilij dehn mi lov it! Jos imajin. Fi lata dehn, dis da-mi di fers taim dehn mi eva si wahn moovi. Dehn mi klap lowd wen dehn si peepl di geh baptaiz. Dat mi reeli help dehn riyalaiz dat Jehoava Witnisiz mi yoonaitid ahn dat dehn mi deh aal rong di werl.

Afta bowt too yaaz da Africa, Ah mi soh eksaitid fi goh da di 1958 intanashanal kanvenshan da New York Siti. Sins wi neva stap rait letaz tu eech ada, Ah mi soh hapi fi si Sheila agen. Shee mi kohn dong fahn Quebec, wehpaat shee mi-di serv az wahn speshal painyaa. Ah mi aks ahn if ih waahn marid mi, ahn shee mi seh yes. Soh Ah mi rait tu Brada Knorr d an Ah mi aks if Sheila kuda goh da Gilyad ahn jain mi da Africa. Hihn mi agree. Den shee reech Ghana ahn wi geh marid da Accra, pahn Aktoaba 3, 1959. Wi mi feel dat Jehoava mi reeli bles wi bikaaz wi put hihn fers eena wi laif.

Eena 1961 wi mi geh asain fi serv da Cameroon. Sins di bradaz aks mi fi set op wahn nyoo branch aafis, Ah mi reeli bizi. Ah mi geh asain fi luk afta di werk da Cameroon an Ah mi ga wahn lat fi laan. Den eena 1965  Sheila mi geh pregnant. Ah haftu admit dat wi mi feel nervos fi bee nyoo payrents. Bot az wi mi-di geh redi fi dis nyoo rispansabiliti ahn mek planz fi goh bak da Canada, sohnting terabl mi hapm.

Sheila mi looz di baybi. Di dakta tel wi dat wi baybi da-mi wahn lee bwai. Dat hapm 50 yaaz agoa, bot wi neva ferget it. Eevn doa dis mi mek wi feel veri sad, wi mi stay eena wi asainment weh wi mi lov wahn lat.

Di bradaz da Cameroon mi aalwayz fays persikyooshan bikaaz dehn neva tek said eena politikal mataz. Ih mi eevn wers joorin ilekshan taim. Pahn May 13, 1970, sohnting hapm weh wi mi wish neva hapm. Di govament ban di werk a Jehoava Witnisiz ahn dehn mi tek oava di branch aafis. Wi mi jos moov deh faiv monts erliya. Eena jos wan week, aala di mishineriz, inkloodin mee ahn Sheila, geh kik owta di konchri. Ih mi soh haad fi lef di bradaz ahn sistaz, bikaaz wi mi lov dehn wahn lat ahn wi mi wori bowt weh mi wahn hapm tu dehn.

Wi mi spen di neks siks monts da di branch aafis da France. Eevn doa Ah mi dehdeh, Ah stil mi-di luk afta di needz a di bradaz da Cameroon. Da saym yaa eena Disemba, wi mi geh asain tu di branch da Nigeria. Da branch mi staat tu luk afta di werk da Cameroon. Di bradaz ahn sistaz mi welkom wi, ahn wi mi injai serv deh fi lata yaaz.

Eena 1973, wi mi fays wahn disizhan weh neva eezi fi mek. Sheila mi-di fait sohn seeryos helt prablemz. Wail wi mi deh da New York fi wahn kanvenshan, shee staat tu krai an ih tel mi: “Ai kyaahn kantinyu du weh Ah di du! Ai taiyad an Ah sik moas a di taim.” Shee mi-di serv langsaid mi da West Africa fi 14 yaaz. Ah mi soh prowd a shee ahn how faytful shee mi faytful, bot wi mi need fi chaynj op sohn tingz. Afta wi mi taak bowt wi sichuwayshan ahn wi poar owt wi haat tu Jehoava, wi mi disaid dat wi shuda goh bak tu Canada fi luk afta ih helt. Di haadis disizhan weh wi mi haftu mek da-mi fi lef wi mishineri asainment ahn wi ful-taim servis.

Afta wi mi reech Canada, wahn fren weh Ah mi noa fahn lang taim gi mi wahn jab. Hihn yoostu sel kaar da wahn tong naat a Toronto. Wi mi rent wahn apaatment, bai sekanhan fernicha, ahn wi kuda staat da nyoo chapta a wi laif widowt mek wahn loan. Wi neva waahn looz wi foakos, bikaaz wi mi-di hoap dat wan day wi kuda staat serv Jehoava ful taim agen. An ih mi hapm soona dan wi mi tink.

Ah mi staat tu valantyaa pahn Satideh fi di kanschrokshan a wahn nyoo Asembli Haal da Norval, Ontario. Afta sohn taim, dehn aks mi serv az di Asembli Haal oavaseeya. Sheila mi-di staat tu feel beta ahn wi mi feel laik shee kuda mi handl dis nyoo asainment. Soh eena Joon 1974, wi mi moov da di Asembli Haal apaatment. Wi mi  reeli hapi dat wi kuda mi serv Jehoava ful taim agen!

Tanks tu Jehoava, Sheila mi-di feel beta ahn beta. Too yaaz layta, wi kuda mi aksep wahn asainment eena di serkit werk. Di serkit mi deh da Manitoba, wahn dischrik da Canada weh veri koal joorin winta taim. Di bradaz ahn sistaz mi veri lovin ahn kain. Wi mi laan dat ih noh mata wehpaat wi serv Jehoava, bikaaz ih impoatant dat wi kantinyu serv Jehoava noh mata wehpaat wi deh.

Eena 1978, afta wi mi serv fi lata yaaz eena di serkit werk, wi mi geh invaitid fi serv da di Canada Betel. Noh tu lang afta dat, Ah laan wahn impoatant lesn di haad way. Ah mi geh asain fi gi wahn owa-an-a-haaf taak eena French da wahn speshal meetin da Montreal. Sad fi seh, di aadyans neva shoa inchres eena di taak, ahn wahn brada fahn di Servis Dipaatment kongsl mi. Fi tel yu di chroot, Ai da noh wahn gud speeka, an Ah shuda noa dat fahn way bak. Ah neva aksep di kongsl weh di brada gi mi. Wi mi ga difrent persnaliti. Ah mi feel laik hihn mi-di pik pahn mi an ih neva did komen mi. Ai mek di mistayk fi joj di brada ahn how ih mi kongsl mi.

Wahn fyoo dayz layta, wahn memba a di Branch Komiti taak tu mi bowt di mata. Ai mi aksep dat Ah neva rispan di prapa way an Ah mi feel sari bowt it. Afta dat, Ah gaahn taak tu di brada weh kongsl mi an ahn tel ahn how sari Ah sari. Hihn mi kain an ih fergiv mi. Da ekspeeryens teech mi dat ih veri impoatant fi bee hombl, an Ah wahn neva ferget it. (Prav. 16:18) Ah pray wahn lat tu Jehoava bowt dis, an Ah mek op mi main fi neva ga wahn bad atichood wen sohnbadi kongsl mi.

Ai di serv da di Canada Betel fi moa dan 40 yaaz now, an Ah ga di privilij fi serv az wahn memba a di Branch Komiti sins 1985. Eena Febiweri 2021, mi dyaa waif Sheila mi ded. Ai mis shee wahn lat, an Ah ga mi oan helt prablemz weh Ah di deel wid. Bot Ah soh hapi ahn soh bizi di serv Jehoava dat Ah “noh noatis” how taim flai. (Ikl. 5:20) Eevn doa Ah fays lata chalenjiz eena mi laif, lata tingz mek mi hapi. Ah feel Jehoava bles mi fi put ahn fers eena mi laif ahn fi serv ahn ful taim fi 70 yaaz. Ah pray dat wi yong bradaz ahn sistaz kantinyu put Jehoava fers eena dehn laif tu, bikaaz Ai noa fi shoar dat dehn wahn ga wahn eksaitin ahn hapi laif weh onli pasabl eena Jehoava servis.