1-2. (a) Weh mi-di hapm da Judeeya wen di apasl Paal mi rait wahn leta tu di Heebroo Kristyanz? (b) Wai wi ku seh dat Paal mi sen da leta egzakli wen di Kristyanz mi need it?

 AFTA Jeezas mi ded, di Heebroo Kristyanz mi gaahn chroo haad taimz. Persikyooshan mi staat op gens di nyoo Kristyan kangrigayshan. (Aks 8:1) Den 20 yaaz layta, di Heebroo Kristyanz gaahn chroo moni prablemz ahn di lan neva mi-di projoos inof food, soh peepl mi-di staav. (Aks 11:​27-30) Eevn doa rong 61 C.E. tingz mi kaina kaam fi wahn lee wail, tingz mi wahn geh wers eena di fyoocha. Soh joorin da taim, di apasl Paal rait wahn leta tu dehn weh da-mi egzakli weh dehn mi need.

² Jeezas mi prafesai dat Jeroosalem mi wahn geh dischrai, ahn nobadi mi noa wen dis mi wahn hapm. (Look 21:20) Bot ih mi wahn hapm soon, soh di Heebroo Kristyanz mi wahn haftu yooz di taim weh mi lef fi pripyaa. (Heeb. 10:25) Ahn Paal leta mi kohn egzakli wen dehn mi need it bikaaz eena da leta ih gi dehn advais bowt how fi schrentn dehn fayt ahn bayr op chroo weh mi bowt fi hapm.—Heeb. 12:​1, 2.

3. Wai wi shuda kay bowt weh di buk a Heebrooz ku teech wi?

³ Wai wi shuda kay bowt weh di buk a Heebrooz ku teech wi? Wee bowt fi goh chroo di grayt chribyulayshan, weh wahn wers dan weh di Heebroo Kristyanz mi  gaahn chroo. (Mach. 24:21; Rev. 16:​14, 16) Mek wi si how di advais weh Jehoava giv ih peepl chroo da leta ku help wi tudeh.

“WERK HAAD FI BEE MACHOAR”

4. Wat da sohn prablemz di Jooish Kristyan dehn mi fays? (Koment pahn di picha.)

⁴ Fi yaaz, Jeroosalem da-mi wahn impoatant plays. Di king weh mi reprizent Jehoava yoostu rool fahn deh. Ahn di peepl weh mi waahn serv Jehoava mi haftu wership hihn da di templ da Jeroosalem. Di faytful Jooz mi haftu fala di Laa weh Gaad gi Moaziz. Da Laa mi ga roolz bowt weh fi eet ahn weh noh fi eet. Da Laa mi aalso ga roolz bowt serkomsizhan ahn how fi chreet peepl weh da neva Joo. Bot afta Jeezas ded, Jehoava neva mi wahn aksep sakrifais weh dehn aafa op da di templ nohmoh. Di Jooz weh ton Kristyan mi haftu mek lata chaynjiz, ahn dat neva eezi. (Heeb. 10:​1, 4, 10) Eevn machoar Kristyanz, laik di apasl Peeta, mi fain it haad fi mek dehndeh chaynjiz. (Aks 10:​9-14; Gal. 2:​11-14) Ahn bikaaz a dehn nyoo bileef dehn, di Jooish rilijos leedaz mi staat persikyoot dehn.

5. Wai di Heebroo Kristyanz mi haftu bee kyaaful?

⁵ Di Heebroo Kristyan dehn mi-di geh atak fahn too said. Di Jooish rilijos leedaz mi-di chreet dehn laik apastayts, ahn som a dehn oan bradaz ahn sistaz mi-di seh dat dehn need fi kantinyu fala di Laa weh Gaad gi Moaziz. Maybi dehn mi du dis fi chrai get weh fahn persikyooshan. (Gal. 6:12) Soh weh mi wahn help di faytful Kristyanz fi stik tu di chroot?

6. Weh di apasl Paal mi inkorij di Kristyanz fi du? (Heebrooz 5:14–6:1)

⁶ Paal mi inkorij di Heebroo Kristyanz fi stodi di Baibl gud. (Reed Heebrooz 5:14–6:1.) Hihn mi yooz di Heebroo Skripchaz fi eksplayn wai di way  dehn mi-di wership Jehoava now mi beta dan how dehn yoostu du it. a Paal mi noa dat di moa dehn stodi Gaad Werd an andastan di chroot, di moa dehn mi wahn ku tel faals teechinz fahn di chroot ahn noh mek notn stap dehn fahn serv Jehoava.

7. Weh chalenjiz wee fays tudeh?

⁷ Jos laik di Heebroo Kristyanz, lata peepl rong wi spred infamayshan weh goh gens Jehoava standadz. Sohn peepl seh dat Jehoava Witnisiz rang bikaaz wi obay di Baibl koman bowt seks. Dehn aalso seh dat wi kruwil bikaaz wen wahn persn noh fala Jehoava standadz dehn kyaahn bee paat a di kangrigayshan. Di way peepl tink nowadayz faar fahn di way how Jehoava si tingz. (Prav. 17:15) Soh dat da wai wi haftu stodi di Baibl gud soh dat wi ku tel rait fahn rang ahn rijek faals teechinz weh ku diskorij wi er mek wi lef Jehoava.—Heeb. 13:9.

8. Weh wahn help wi fi kantinyu groa fi bee wahn machoar Kristyan?

⁸ Ih waiz fi mek wi tek di advais weh di apasl Paal gi di Heebroo Kristyanz ahn fi werk haad fi bee machoar. Wi need fi stodi di Baibl fi geh fi noa Jehoava ahn di way hihn tink. Wi haftu reed ahn stodi di Baibl eevn afta wi geh baptaiz, er eevn if wi deh eena di chroot fi wahn lang taim. (Saa. 1:2) Wi wahn schrentn wi fayt if wi aalwayz du wi persnal stodi. Fayt da wahn impoatant kwaliti fi aal Kristyanz.—Heeb. 11:​1, 6.

“GA FAYT, KAAZ DIS WAHN HELP WI SAYV WI LAIF”

9. Wai di Heebroo Kristyanz mi need fi ga schrang fayt?

⁹ Di inschrokshanz weh di Heebroo Kristyanz mi get wen Jeroosalem mi bowt fi geh dischrai kuda mi song laik ih noh mek sens. Soh fi mek dehn servaiv, dehn mi need fi ga lata fayt. (Heeb. 10:​37-39) Yoozhwali wen enimiz atak, di peepl weh liv owtsaida wahn siti wuda luk fi wahn siti wid wahn waal rong it, laik Jeroosalem, fi geh protekshan. Bot Jeezas inschrokshanz mi difrent fahn weh dehn wuda naamali du. Hihn mi tel di Kristyanz dehn fi ron tu di mongtin dehn az soon az dehn si di soaljaz kyamp rong Jeroosalem. Dis inschrokshan da-mi fi aal Kristyanz, weda dehn mi liv eena di siti er rong di siti.—Look 21:​20-24.

10. How schrang fayt mi wahn help di Heebroo Kristyanz? (Heebrooz 13:17)

¹⁰ Di Heebroo Kristyanz mi wahn aalso need fi chros di bradaz weh Jeezas mi-di yooz fi tek di leed eena di kangrigayshan. Dehndeh bradaz praabli mi gi spesifik inschrokshanz fi help di bradaz ahn sistaz fala Jeezas advais eena wahn aaganaiz way ahn da di rait taim. (Reed Heebrooz 13:17.) Di Greek werd fi “obay” meenz dat sohnbadi wuda wilin fi obay bikaaz ih chros di persn weh di giv ahn dairekshan er inschrokshanz. Soh ih noh jos obay bikaaz di persn ga atariti. Dis meenz dat di Heebroo Kristyanz mi haftu bil dehn chros eena di bradaz weh mi-di tek di leed bifoa Jeroosalem mi geh dischrai. Soh if dehn mi chros an obay di bradaz weh mi-di  tek di leed wail tingz mi kaam, ih mi wahn eeziya fi du it wen tingz geh haad.

11. Wai ih impoatant fi mek wee ga schrang fayt?

¹¹ Wi need fi ga fayt, jos laik di Heebroo Kristyanz. Wahn lata peepl noh bileev weh di Baibl seh bowt di en a dis wikid werl ahn dehn eevn mek fon a it. (2 Peet. 3:​3, 4) Eevn doa di Baibl tel wi som a di tingz weh wahn hapm joorin di grayt chribyulayshan, wi noh noa evriting. Soh wi need fi ga schrang fayt dat di en wahn kohn pahn taim ahn dat wen ih hapm Jehoava wahn tek kayr a wi.—Hab. 2:3.

12. Weh wahn help wi servaiv di grayt chribyulayshan?

¹² Wi need fi mek shoar wi chros “di faytful ahn waiz slayv,” kaaz da dehn Jehoava di yooz fi gaid wi. (Mach. 24:45) Wen di grayt chribyulayshan staat, wi wahn geh spesifik inschrokshanz weh wahn sayv wi laif, jos laik how di Heebroo Kristyanz mi geh inschrokshanz fi sayv dehn laif. If wi noh di obay now, wi kyaahn ekspek fi fala inschrokshanz joorin di grayt chribyulayshan. Soh now da di taim fi bil op wi chros eena di bradaz weh Jehoava di yooz fi leed ih aaganaizayshan.

13. Wai Heebrooz 13:5 da gud advais?

¹³ Wail di Heebroo Kristyanz mi-di wayt fi wahn sain fi mek dehn noa wen fi ron tu di mongtinz, dehn mi haftu mek shoar deh mi-di kip dehn foakos pahn Jehoava ahn noh pahn moni. (Reed Heebrooz 13:5.) Som a dehn mi bayr op wen dehn gaahn chroo moni prablemz ahn wen di nayshan mi bayli ga food fi mek dehn servaiv pan. (Heeb. 10:​32-34) Eena di paas, dehn mi wilin fi goh chroo haad taimz bikaaz di gud nyooz mi moa impoatant tu dehn. Bot afta dat, maybi som a dehn mi staat feel laik moni ku sayv dehn. Bot no amonk a moni wuda sayv dehn fahn weh mi-di kohn. (Jay. 5:3) If eniting, dat wuda jos mek it haada fi mek dehn lef evriting bihain.

14. How schrang fayt ku help wi mek gud disizhanz bowt mateeryal tingz?

¹⁴ If wi ga fayt dat di en soon kohn, wi noh wahn di chrai geh rich. Wen di en kohn, peepl wahn di “dash weh dehn silva pan di schreet” bikaaz dehn wahn riyalaiz dat “needa dehn silva ner dehn goal wahn ku sayv dehn pahn di day a Jehoava grayt anga.” (Ezek. 7:19) Insteda foakos pahn geh rich, wi waahn liv wahn simpl laif weh wahn help wi tek kayr a wiself, wi famili, ahn wi rilayshanship wid Jehoava. Dat meenz dat wi noh wahn baro moni weh wi noh need er geh tai dong wid mateeryal tingz. (Mach. 6:​19, 24) Wi noh waahn geh tu atach tu di tingz weh wi oan, bikaaz az di en geh kloasa wi fayt wahn geh tes ahn wi wahn haftu proov dat wi lov Jehoava moa dan moni. Schrang fayt wahn help wi servaiv di en a dis sistem.

“UNU WAHN NEED FI BAYR OP”

15. Wai di Kristyanz mi need fi bayr op?

¹⁵ Paal mi tel di Kristyanz dat dehn mi wahn haftu bayr op bikaaz tingz mi wahn geh wers ahn wers da Judeeya. (Heeb. 10:36) Eevn doa som a di Heebroo Kristyanz mi gaahn chroo terabl persikyooshan, wahn lata dehn neva yet ekspeeryens dat. Paal tel dehn dat  dehn mi wahn haftu bee redi fi goh chroo eevn moa haad taimz ahn maybi eevn haftu giv op dehn laif, laik Jeezas. (Heeb. 12:4) Di moa di Kristyan kangrigayshan mi-di groa, di moa dehn wan weh mi deh gens Jehoava mi-di geh beks ahn vailent. Sohn yaaz bifoa Paal mi rait di buk a Heebrooz, moa dan 40 Jooz mi get tugeda ahn plan wahn way fi kil ahn wen ih mi-di preech da Jeroosalem. Dehn mi “mek wahn vow dat dehn noh wahn eet er jrink notn til dehn kil ahn.” (Aks 22:22; 23:​12-14) Eevn wen dehn mi-di goh chroo schrang persikyooshan laik dat, dehn mi wahn haftu kantinyu meet tugeda, preech, ahn kip dehn fayt schrang.

16. How di leta tu di Heebroo Kristyanz ku help wi si di benifit a di chraiyalz wi di goh chroo? (Heebrooz 12:7)

¹⁶ Weh mi wahn help di Heebroo Kristyanz noh giv op wen dehn fays chraiyalz? Paal mi waahn di Kristyanz si di benifits a di chraiyalz dehn fays. Ih help dehn fi si dat Gaad alow wi fi fays tes ahn hihn yooz dehndeh tes fi chrayn wi. (Reed Heebrooz 12:7.) Dehndeh chraiyalz ku help wi laan fi shoa kwalitiz weh pleez Jehoava. If di Heebroo Kristyanz mi foakos pahn di gud weh kohn fahn di chraiyalz weh dehn fays, dehn mi wahn fain it eeziya fi bayr op.—Heeb. 12:11.

17. Weh Paal mi laan bowt persikyooshan?

¹⁷ Paal mi help di Kristyanz fi si dat dehn mi need fi ga korij ahn dehn mi need fi bayr op wen dehn mi-di goh chroo chraiyalz. Hihn da-mi di rait persn fi gi dehn advais, bikaaz hihn yoostu persikyoot Kristyanz bifoa ih ton Kristyan. Ahn den afta hihn ton Kristyan, hihn gaahn chroo aal kaina persikyooshan tu. (2 Kor. 11:​23-25) Hihn mi noa  how ih feel fi goh chroo dat ahn how fi bayr op anda da kaina chreetment. Soh hihn rimain dehn dat wen dehn goh chroo chraiyalz dehn shuda pen pahn Jehoava, noh dehnself. If dehn mi memba dat, dehn mi wahn ga korij ahn seh: “Jehoava da di wan weh help mi, soh Ah noh wahn frayd.”—Heeb. 13:6.

18. Weh wahn hapm tu aala wi eena di fyoocha, ahn weh wi haftu du?

¹⁸ Som a wi bradaz di goh chroo persikyooshan rait now. Wan way fi shoa dat wi lov dehn da wen wi pray fi dehn. Ahn wen pasabl, wi ku help dehn owt wid tingz weh dehn need. (Heeb. 10:33) Bot di Baibl schrayt op tel wi: “Evribadi weh waahn wership Gaad wid aala dehn haat az wahn disaipl a Krais Jeezas wahn fays persikyooshan.” (2 Tim. 3:12) Soh dat da wai aala wi need fi bee redi fi di haad taimz weh di kohn. Wi need fi chros Jehoava eena evriting ahn noa dat hihn wahn help wi goh chroo eni chraiyal. Ahn wen di rait taim kohn, fi hihn peepl noh wahn sofa nohmoh.—2 Tes. 1:​7, 8.

19. Weh wi ku du fi pripyaa fi di grayt chribyulayshan? (Koment pahn di picha.)

¹⁹ Di leta weh di apasl Paal mi rait tu di Heebroo Kristyanz mi help dehn pripyaa fi di chraiyalz weh dehn mi bowt fi fays. Paal mi advaiz di Kristyanz fi reed ahn stodi di Baibl soh dat dehn ku noa di difrens bitween di chroot ahn faals teechinz weh kuda mek dehn fayt geh week. Paal mi aalso inkorij di Heebroo Kristyanz fi schrentn dehn fayt eena Jeezas ahn chros di bradaz weh mi-di tek di leed eena di kangrigayshan. An ih help dehn fi andastan how dehn ku benifit fahn chraiyalz ahn si dehn az wahn way how dehn lovin Pa mi-di chrayn dehn. Mek aala wi mek op wi main fi tek di apasl Paal advais. Da way wi wahn ku stay faytful ahn bayr op til di en.—Heeb. 3:14.