1. Weh Jeezas wahn soon du?

 WI DI liv joorin wahn taim wen big chaynjiz wahn soon hapm. Soon, Jeezas wahn joj evribadi weh liv pahn ert. Ahn Jeezas mek wi noa how di werl wahn stan bifoa hihn staat tu joj. Hihn mi giv ih disaiplz wahn “sain” weh wahn shoa wen ih kohn bak ahn wen “di en a di sistem a tingz” wahn kohn. (Mach. 24:3) Wi ku fain da sain da Machyu chapta 24 ahn 25, Maak chapta 13, ahn Look chapta 21.

2. Weh wi wahn diskos eena dis aatikl, ahn how dis wahn help wi?

² Jeezas mi yooz chree iloschrayshan fi help wi bee redi. Dehndeh iloschrayshan da laik wahn waanin fi wi. Dehn da di iloschrayshan bowt di sheep ahn di goat dehn, di ten verjin, ahn di talent dehn. Eech wan a dehndeh iloschrayshan help wi andastan dat Jeezas wahn joj eech persn bays pahn weh dehn du. Eena dis aatikl, wi wahn diskos dehnya chree iloschrayshan ahn si weh wi ku laan fahn dehn. Mek wi staat diskos di iloschrayshan bowt di sheep ahn di goat dehn.

DI SHEEP AHN DI GOAT DEHN

3. Wen Jeezas wahn joj peepl?

³ Jeezas mi seh dat hihn wahn joj peepl bays pahn how dehn rispan tu di gud nyooz an if dehn sopoat ih anointid bradaz. (Mach. 25:​31-46) Rait bifoa Armagedon, joorin di “grayt chribyulayshan,” hihn wahn joj dehn az sheep er goat. (Mach. 24:21) Jos laik how wahn shepad separayt di sheep fahn di goat dehn, Jeezas wahn separayt  dehn wan weh sopoat ih anointid bradaz fahn dehn wan weh noh sopoat dehn.

4. Akaadn tu Isaiah 11:​3, 4, wai wi ku bee shoar dat Jeezas wahn joj peepl eena wahn fyaa way? (Koment pahn di picha.)

⁴ Di Baibl seh dat wen Jeezas joj fi Jehoava, hihn wahn aalwayz joj eena wahn fyaa way. (Reed Isaiah 11:​3, 4.) a Hihn noatis evriting weh peepl du, weh dehn tink, weh dehn seh, ahn how dehn chreet ih anointid bradaz. (Mach. 12:​36, 37; 25:40) Jeezas wahn noa hoo mi sopoat ih anointid bradaz ahn di werk dehn geh asain fi du. b Wan a di moas impoatant wayz how wi ku sopoat wi anointid bradaz da wen wi help dehn preech di gud nyooz. Jeezas wahn joj hoosoeva sopoat di anointid az “raichos” ahn dehn wahn ku geh “evalastin laif” rait ya pahn ert. (Mach. 25:46; Rev. 7:​16, 17) Dat da wahn wandaful riwaad fi dehn wan weh stay laayal. If dehn stay faytful joorin an afta di grayt chribyulayshan, dehn naym wahn stay eena “di buk a laif.”—Rev. 20:15.

5. Weh wi laan fahn di iloschrayshan bowt di sheep ahn di goat dehn, ahn hoo aal ku benifit fan it?

⁵ Proov dat yu faytful ahn laayal. Jeezas iloschrayshan bowt di sheep ahn di goat dehn da moasli fi dehn wan weh hoap fi liv fareva pahn ert. How dehn shoa dat dehn ga fayt ahn dat dehn laayal? Wen dehn sopoat Krais bradaz eena di preechin werk ahn wen dehn stay laayal az dehn obay di inschrokshanz weh kohn fahn di faytful ahn waiz slayv weh Jeezas apoint. (Mach. 24:45) Bot dehndeh bradaz ahn sistaz weh ga di hoap fi liv da hevn aalso need fi lisn tu di waanin eena di iloschrayshan bowt di sheep ahn di goat dehn. Wai wi seh dat? Bikaaz Jeezas aalso noatis weh dehn du, tink, ahn seh. Soh dehn tu need fi stay faytful. In fak, Jeezas mi menshan too ada iloschrayshan eena Machyu chapta 25 weh ga waanin fi anointid Kristyanz. Now mek wi diskos di iloschrayshan bowt di waiz ahn di foolish verjin dehn.

DI WAIZ AHN DI FOOLISH VERJIN DEHN

6. How di faiv verjin mi proov dat dehn waiz? (Machyu 25:​6-10)

⁶ Eena di iloschrayshan bowt di verjin dehn, Jeezas mi taak bowt ten verjin weh gaahn meet wahn braidgroom. (Mach. 25:​1-4) Aala dehn mi hoap fi goh lang wid ahn da ih marij fees. Jeezas mi seh dat faiv a dehn mi “waiz” ahn di ada faiv mi “foolish.” Di waiz verjin dehn mi redi ahn dehn mi stay alert wail dehn mi-di wayt fi di braidgroom, eevn if ih mi reech layt da nait. Dat da wai dehn mi bring dehn lamp in kays ih geh daak. Dehn mi eevn bring ekschra ail soh dat dehn lamp noh owt aaf wail dehn mi-di wayt far ahn. (Reed Machyu 25:​6-10.) Wen di braidgroom mi reech, di waiz verjin dehn gaahn lang wid ahn tu di marij fees. Sayhn way soh, anointid Kristyanz weh proov dat dehn faytful, dat dehn redi, ahn dat dehn di wayt til Krais  kohn bak wahn geh dehn riwaad fi jain di Braidgroom, Jeezas, fi rool da hevn. c (Rev. 7:​1-3) Weh mi hapm tu di foolish verjin dehn?

7. Weh mi hapm tu di faiv foolish verjin, ahn wai?

⁷ Di faiv foolish verjin neva redi wen di braidgroom mi reech. Dehn lamp mi bowt fi owt aaf, ahn dehn neva ga no ekschra ail wid dehn. Wen dehn fain owt dat di braidgroom soon reech, dehn mi haftu chrai fain wehpaat dehn ku bai sohn ail. Dehn neva kohn bak yet wen di braidgroom reech. Bot “di verjin dehn weh mi redi gaahn lang wid ahn tu di marij fees, an aftawodz, dehn lak di doa.” (Mach. 25:10) Aftawodz, wen di foolish verjin dehn reech, dehn mi waahn jain eena di fees, bot di braidgroom mi tel dehn: “Ai noh noa da hoo unu.” (Mach. 25:​11, 12) Dehndeh verjin neva redi fi wayt fi di braidgroom, eevn if ih mi reech layt. Weh lesn anointid bradaz ahn sistaz ku laan?

8-9. Weh di anointid ku laan fahn di iloschrayshan bowt di verjin dehn? (Koment pahn di picha.)

⁸ Proov dat yu redi ahn stay alert. Jeezas neva mi-di seh dat wan groop a anointid bradaz mi-di wayt fi di en ahn dat wahn neks groop neva mi-di wayt. Soh hihn neva mi-di taak bowt too groop a anointid bradaz. Insted, hihn mi-di eksplayn weh wuda hapm tu di anointid if dehn mi giv op ahn stap bee faytful bifoa di en kohn. If dehn neva redi, dehn wudn geh dehn riwaad. (Jan 14:​3, 4) Dat veri seeryos! Kaaz noh mata if wi ga di hoap fi liv da hevn er pahn ert, aala wi shuda lisn tu di waanin eena di iloschrayshan bowt di verjin dehn. Eech wan a wi shuda kip pahn di lukowt ahn bee redi fi stay faytful tu di en a dis sistem a tingz.—Mach. 24:13.

⁹ Afta Jeezas mi taak bowt di iloschrayshan  a di ten verjin dehn fi shoa dat ih impoatant fi bee redi ahn stay alert, hihn mi taak bowt di iloschrayshan a di talent dehn. Da iloschrayshan foakos pahn how impoatant ih impoatant fi bee haad-werkin.

DI TALENT DEHN

10. How di too slayv mi shoa dat dehn faytful? (Machyu 25:​19-23)

¹⁰ Eena di iloschrayshan bowt di talent dehn, Jeezas mi taak bowt too slayv weh mi faytful tu dehn maasta ahn wan weh neva faytful. (Mach. 25:​14-18) Bifoa di maasta gaahn pahn wahn lang chrip, ih tel ih slayv dehn fi tek kayr a wahn big amonk a moni. Di too slayv weh mi faytful mi werk haad fi mek moa moni fi dehn maasta. Bikaaz dehn mi waiz, dehn geh gud rizolts ahn dehn dobl di amonk a moni weh dehn maasta mi gi dehn. Dehn maasta mi komen dehn ahn dehn mi “rijais wid [dehn] maasta.” (Reed Machyu 25:​19-23.) How bowt di neks slayv? Weh hihn du wid di moni weh ih maasta giv ahn?

11. Weh mi hapm tu di “layzi” slayv, ahn wai?

¹¹ Di neks slayv mi geh wan talent, bot hihn mi “layzi.” Wai wi seh dat? Bikaaz hihn beri di moni eena di grong, ahn wen ih maasta kohn bak, hihn jos giv ahn bak di wan talent weh hihn lef ahn wid. Bot ih maasta mi ekspek ahn fi yooz ih moni eena wahn waiz way. Insteda bee sari fi noh mek moa moni fi ih maasta, hihn kaal ahn “wahn dimandin man.” Da slayv neva ga wahn gud atichood ataal! Ih maasta neva hapi wid ahn, an bikaaz a dat, dehn chroa di slayv owta di maasta hows.—Mach. 25:​24, 26-30.

12. Hoo di too faytful slayv reprizent tudeh?

¹² Di too faytful slayv reprizent faytful anointid Kristyanz. Dehn Maasta, Jeezas, invait dehn fi “rijais wid [dehn] maasta.” Chroo di fers rezorekshan, dehn wahn geh dehn riwaad fi goh da hevn. (Mach. 25:​21, 23; Rev. 20:5a) How  di bad egzampl a di layzi slayv da wahn waanin fi anointid Kristyanz tudeh?

13-14. Weh di anointid ku laan fahn di iloschrayshan bowt di talent dehn? (Koment pahn di picha.)

¹³ Proov fi bee haad-werkin. Eena di iloschrayshan bowt di talent ahn di wan bowt di verjin dehn, Jeezas neva mi-di seh dat anointid bradaz wahn bee layzi. Insted, hihn mi-di eksplayn weh wuda hapm if dehn neva eega laik bifoa. Dehn noh wahn ku “kantinyu fi bee monks di wan dehn weh Gaad kaal ahn chooz,” ahn soh dehn wahn kyaahn enta eena di Kingdom da hevn.—2 Peet. 1:10.

¹⁴ Eena Jeezas iloschrayshan bowt di verjin ahn di wan bowt di talent dehn, wi ku laan dat anointid Kristyanz need fi bee redi, dehn fi stay alert, ahn dehn fi bee haad-werkin. Yu tink Jeezas mi seh eniting els weh da wahn waanin fi di anointid? Yes, wi ku fain dis waanin, weh ga fi du wid di fainal jojment, da Machyu 24:​40, 41.

HOO “GAAD WAHN KEHR”?

15-16. How Machyu 24:​40, 41 help anointid Kristyanz fi si dat dehn need fi kip pahn di lukowt?

¹⁵ Bifoa Jeezas mi menshan di chree iloschrayshan dehn, hihn mi diskraib di fainal jojment a di anointid. Da fainal jojment wuda shoa hoo mi reeli anointid ahn faytful. Hihn mi taak bowt too man weh di werk eena wahn feel ahn bowt too laydi weh di werk da di mil. Ih luk laik di man dehn mi-di du di saym werk, ahn di laydi dehn mi-di du di saym werk, bot Jeezas mi seh: “Gaad wahn kehr wan a dehn an ih wahn lef di neks wan.” (Reed Machyu 24:​40, 41.) Soh hihn mi tel ih falowaz: “Kip pahn di lukowt, bikaaz unu noh noa pahn wich day di Laad wahn kom.” (Mach. 24:42) Jeezas mi seh sohnting simila afta ih menshan di iloschrayshan bowt di ten verjin. (Mach. 25:13) Soh wat da di point a aala dis weh Jeezas mi seh? Gaad onli wahn kehr dehn wan weh chrooli anointid ahn faytful da hevn fi rool lang wid Jeezas.—Jan 14:3.

¹⁶ Kip pahn di lukowt. If eni a di anointid noh kip pahn di lukowt eena wahn spirichwal way, den Gaad noh wahn gyada dehn wid “di wan dehn weh hihn pik.” (Mach. 24:31) An evribadi weh hoap fi liv fareva pahn ert shuda aalso tek Jeezas werdz az wahn waanin fi kip pahn di lukowt ahn stay faytful.

17. Wai wi noh fi wori if Jehoava chooz fi anoint peepl joorin di taim weh wi di liv eena?

¹⁷ Wee noa Jehoava soh gud dat wi shoar dat evriting weh hihn du fyaa. Soh wi noh wori if Jehoava chooz fi anoint sohn faytful bradaz er sistaz joorin di taim weh wi di liv eena. d Memba Jeezas iloschrayshan bowt di grayp aachad? Weh hihn mi seh bowt di werkaz weh mi staat werk rong faiv aklak eena di eevnin? (Mach. 20:​1-16) Di werkaz weh mi geh invaitid fi werk layta eena di day mi geh di saym pay az di werkaz weh mi werk di hoal day. Sayhn way soh, ih noh mata wen Jehoava anoint wahn persn, bikaaz dehn wahn geh di saym riwaad fi goh da hevn wans dehn stay faytful.

LISN TU DI WAANIN DEHN

18-19. Weh wi laan fahn dehnya iloschrayshan?

¹⁸ Weh wi laan soh faar? Di iloschrayshan bowt di sheep ahn di goat dehn shoa dat ih impoatant fi mek dehn wan  weh hoap fi liv fareva pahn ert stay faytful ahn laayal tu Jehoava now ahn joorin di grayt chribyulayshan. Rait bifoa Armagedon, Jeezas wahn joj peepl ahn dehn wan weh faytful wahn geh “evalastin laif” az dehn riwaad.—Mach. 25:46.

¹⁹ Wi mi aalso diskos too iloschrayshan weh gi waanin tu di anointid. Eena di iloschrayshan bowt di ten verjin dehn, faiv a dehn mi waiz. Dehn mi redi ahn dehn mi stay alert wail dehn mi-di wayt fi di braidgroom noh mata how lang ih tek. Bot di foolish verjin dehn neva redi. Soh di braidgroom neva alow dehn fi jain ahn eena ih marij fees. Jos laik di waiz verjin dehn, wee need fi bee redi fi wayt noh mata how lang ih tek fi mek di en a dis sistem kohn. Aalso, eena Jeezas iloschrayshan bowt di talent dehn, wi mi diskos bowt di too faytful slayv weh mi haad-werkin. Dehn mi werk haad fi mek dehn maasta hapi. Bot di maasta neva hapi wid di layzi slayv an ih chroa ahn owta ih hows. Jos laik di too faytful slayv, wi need fi stay bizi eena Jehoava servis op tu di en. Ahn wi laan dat anointid Kristyanz need fi kip pahn di lukowt soh dat Gaad ku kehr dehn da hevn fi rool lang wid Jeezas. Dehn luk faawod tu wen Gaad gyada dehn op tugeda wid Jeezas. Afta Armagedon, dehn wahn bee Jeezas braid eena di marij a di Lam.—2 Tes. 2:1; Rev. 19:​7, 9.

20. Weh Jehoava wahn du fi dehn wan weh lisn tu di waanin dehn?

²⁰ Jeezas wahn soon staat tu joj peepl, bot wi noh ga no reezn fi feel frayd. If wi stay faytful, wi hevnli Faada wahn gi wi “di powa weh hyoomanz noh naamali gat” soh dat wi ku “stan op fronta di Son a man.” (2 Kor. 4:7; Look 21:36) Weda wi ga di hoap fi liv da hevn er pahn ert, wi wahn mek Jehoava hapi if wi lisn tu di waanin dehn eena Jeezas iloschrayshanz. Bikaaz a Jehoava grayt kainis, fi wee naym wahn deh “rait dong eena di buk” a laif.—Dan. 12:1; Rev. 3:5.