1-2. Sins Jehoava mek wi fi feel hapiya wen wi giv tu adaz, how wee benifit?

 WEN Gaad mi mek hyoomanz, ih mek dehn eena wahn way fi feel hapiya wen dehn giv tu adaz dan wen dehn get tingz fahn ada peepl. (Aks 20:35) Bot dis noh meen dat wi noh laik geh gif fahn adaz. In fak, wi feel hapi wen wi geh wahn gif fahn sohnbadi. Bot wi feel eevn hapiya wen wi gi sohnbadi wahn gif. Sins Jehoava mek wi dis way, how wee benifit?

² Jehoava mek wi eena wahn speshal way. Hihn alow wee fi kanchroal wi oan hapinis. Wi ku bee hapiya wen wi luk fi moa wayz how wi ku giv tu adaz. Jehoava reeli mek wi eena wahn wandaful way!—Saa. 139:14.

3. Wai Jehoava da “di hapi Gaad”?

³ Di Baibl tel wi dat peepl weh giv tu adaz hapi. Noh wanda Jehoava da “di hapi Gaad”! (1 Tim. 1:11) Jehoava da-mi di fers wan fi giv tu adaz ahn nobadi ku giv moa dan hihn. Jehoava gi wi laif, ahn “sayka hihn wee ku moov an egzis.” (Aks 17:28) Da chroo, “evri gud ahn perfek gif” kohn fahn Jehoava.—Jay. 1:17.

4. Weh wahn help wi feel moa hapiya?

⁴ Aala wi wuda waahn feel moa hapiya az wi giv tu adaz. Wi ku feel dis way wen wi jenaros laik Jehoava. (Ifee. 5:1) Eena dis aatikl, wi wahn laan how jenaros Jehoava jenaros ahn weh wee ku du wen wi feel laik adaz noh tankful fi weh wi du fi dehn. Dis wahn help wi fi noh giv op ahn kantinyu giv tu adaz ahn bee moa hapiya.

BEE JENAROS LAIK JEHOAVA

5. Wat da sohn tingz Jehoava gi wi?

⁵ How Jehoava shoa dat ih jenaros? Tink bowt sohn  tingz hihn hapi fi gi wi. Fi egzampl, Jehoava gi wi weh wi need. Hihn mait noh aalwayz mek wi laif veri komfatabl, bot tanks tu hihn wi aalwayz ga weh wi need. Fi egzampl, da bikaaz a hihn wi ga food fi eet, kloaz fi wayr, ahn wahn plays fi liv. (Saa. 4:8; Mach. 6:​31-33; 1 Tim. 6:​6-8) Nobadi noh foas Jehoava fi gi wi dehndeh tingz. Soh wai hihn du dat fi wi?

6. Weh wi laan fahn Machyu 6:​25, 26?

⁶ Jehoava gi wi weh wi need bikaaz ih lov wi. Noatis weh Jeezas mi seh da Machyu 6:​25, 26. (Reed.) Jeezas mi yooz egzamplz bowt kriyayshan fi teech wi how Jehoava feel bowt wi. Dis da weh ih seh bowt di berd dehn: “Dehn noh plaant no seed ner reep ner stoar op no food.” Bot noatis weh ih seh afta dat: “Unu hevnli Faada feed aala dehn.” Den Jeezas aks dis kweschan: “Unu noh tink dat unu wert moa dan dehndeh berd?” Weh lesn wi laan? Jehoava faytful servant dehn moch moa preshos tu hihn dan animalz. Soh if hihn ku gi di animal dehn weh dehn need, wee ku bee shoar dat hihn wahn gi wi weh wee need! Wi lovin hevnli Faada, Jehoava, gi wi weh wi need bikaaz ih lov wi.—Saa. 145:16; Mach. 6:32.

7. Wat da wan way how wi ku bee jenaros laik Jehoava? (Koment pahn di picha.)

⁷ Jos laik Jehoava, wi ku giv adaz weh dehn need bikaaz wi lov dehn. Fi egzampl, yoo noa wahn brada er sista weh need food er kloaz? Jehoava ku yooz yoo fi help dehn geh weh dehn need. Jehoava peepl noh hoal bak fahn help adaz, espeshali wen wahn dizaasta hapm. Fi egzampl, joorin di COVID-19 pandemik, bradaz ahn sistaz mi shayr food, kloaz, an ada tingz wid dehn wan weh mi need help. Lata bradaz mi aalso doanayt moni tu di werlwaid werk. Dat mi help fi sopoat bradaz aal oava di werl weh mi need help bikaaz a wahn dizaasta. Dehndeh jenaros bradaz ahn sistaz mi du weh Heebrooz 13:16 seh: “Unu mosn ferget fi du gud ahn fi shayr weh unu gat wid adaz, kaaz Gaad pleez wid dehndeh kaina sakrifais.”

8. Weh difrent kaina tingz wi ku du wid di powa weh Jehoava gi wi? (Filipiyanz 2:13)

⁸ Jehoava gi wi powa. Jehoava ga lata powa ahn hihn hapi fi giv ih faytful servants di schrent weh dehn need. (Reed  Filipiyanz 2:13.) Yoo eva pray fi bee schrang inof fi noh giv een tu wahn temtayshan? Er yoo eva pray fi di schrent fi goh chroo wahn chraiyal? Yu praabli aalso pray fi di schrent fi mek it chroo wahn nada day. Wen yu geh di schrent yu need, yu noa dat Jehoava ansa yu pryaaz. Fi shoar yu agree wid weh di apasl Paal mi seh: “Ah geh di schrent fi fays evriting bikaaz a di wan weh gi mi powa.”—Fil. 4:13.

9. Wat da sohn wayz wi ku kapi Jehoava wen yooz wi schrent fi help adaz? (Koment pahn di picha.)

⁹ Wee da noh laik Jehoava; fi wee schrent ga limits. Noh onli dat, wi kyaahn gi schrent tu adaz di way Jehoava gi schrent. Bot wi ku kapi Jehoava wen wi yooz wi enerji fi help adaz. Fi egzampl, wi ku help wahn oalda brada er sista fi du tingz rong di hows er wi ku goh da shap fi dehn. If pasabl, wi ku valantyaa fi help wid di kleenin ahn mantaynans a di Kingdom Haal. If wi yooz wi schrent fi du dehndeh kaina tingz, wi wahn di help wi bradaz ahn sistaz.

10. How wi ku schrentn adaz wid di tingz weh wi seh?

¹⁰ Bot noh ferget dat yu werdz ga powa tu. Yu tink yu ku komen sohnbadi fi weh dehn du? Yoo noa bowt enibadi weh need komfert? Wateva di kays, fain wayz how fi tel di persn dat yu kay bowt ahn. Yu ku vizit di persn, giv ahn wahn lee kaal, er maybi sen ahn wahn kyaad, wahn eemayl, er wahn teks mesij. Noh wori tu moch bowt weh fi seh. Wahn fyoo sinsyaa ahn lovin werdz mait bee aal weh yu brada er sista need fi mek it chroo di day ahn stay faytful er bee moa pazitiv.—Prav. 12:25; Ifee. 4:29.

11. How Jehoava giv wizdom tu adaz?

¹¹ Jehoava gi wi wizdom. Di disaipl Jaymz mi rait: “If enibadi noh ga inof wizdom, mek ih kip di aks Gaad far it, ahn hihn wahn giv ahn. Bikaaz Gaad jenaros, an ih gi wizdom tu evribadi widowt fain faalt wid dehn.” (Jay. 1:5; ftn.) Dis shoa dat Jehoava noh kip ih wizdom tu ihself. Insted, hihn shayr it wid adaz. Jaymz mi aalso seh dat wen Jehoava giv wizdom, hihn du it “widowt mek [peepl] feel shaym” er “widowt fain faalt wid dehn.” Hihn noh waahn wi feel bad wen wi aks ahn fi ih gaidans. In fak, di Baibl seh dat hihn waahn wi aks ahn far it.—Prav. 2:​1-6.

12. Weh difrent apachooniti wi ga fi shayr weh wi noa wid adaz?

¹² How bowt wee? Yu tink wi ku kapi  Jehoava ahn shayr di wizdom weh wi gat? (Saa. 32:8) Jehoava peepl ga lata apachooniti fi shayr weh dehn noa. Fi egzampl, wi yoozhwali chrayn nyoo poblishaz eena di minischri. Eldaz tek di taim fi help ministeeryal servants an ada bradaz weh baptaiz fi laan how fi handl dehn asainments eena di kangrigayshan. Ahn bradaz ahn sistaz weh ga skilz pahn kanschrokshan ahn mantaynans help chrayn adaz fi werk pahn bildinz weh wi yooz eena Jehoava servis.

13. How wi ku kapi di way Jehoava shayr ih wizdom?

¹³ Chrai yu bes fi kapi Jehoava egzampl wen yu chrayn adaz. Memba dat Jehoava noh hoal bak fahn shayr ih wizdom. Soh, wee aalso shayr weh wi noa ahn wi ekspeeryens wid adaz. Wi noh frayd dat di persn wi chrayn wahn tek weh wi asainment, soh wi noh hoal bak fahn teech dehn. Sohntaim peepl mait tink dat sins nobadi mi chrayn dehn, dehn noh wahn chrayn nobadi. Non a Jehoava peepl shuda tink da way! Insted, wi hapi fi shayr aal weh wi noa ahn du aal weh wi kud fi chrayn adaz. (1 Tes. 2:8) Wi waahn dehn “kwalifai fi teech dehnya tingz tu ada peepl.” (2 Tim. 2:​1, 2) If aala wi jenaros wid wi wizdom, den aala wi wahn bee waiza ahn hapiya.

WAT IF WI FEEL LAIK ADAZ NOH TANKFUL?

14. Weh moas peepl du wen wi du sohnting fi dehn?

¹⁴ Wen wi giv er du sohnting fi adaz, espeshali wi bradaz ahn sistaz, dehn yoozhwali tel wi tanks. Dehn wuda sen wi wahn lee kyaad er shoa dat dehn graytful eena difrent wayz. (Kol. 3:15) Wen dehn shoa dat dehn graytful, wi feel eevn hapiya dat wi mi du sohnting fi dehn.

15. Weh wi need fi memba wen sohnbadi noh shoa dat ih tankful?

¹⁵ Bot sohntaim, peepl noh tel wi tanks fi weh wi du fi dehn. Sohntaim ih luk laik adaz noh kay bowt aal weh wi du fi help dehn. Er wi mait tink dat dehn nat eevn si humoch taim, enerji, er moni wi mi yooz soh dat wi ku du sohnting fi dehn. If yu eva feel da way, weh ku help yu fi noh geh foschraytid er disapointid? Jos memba weh Aks 20:35 seh. Di hapinis wi feel wen wi giv tu adaz noh ga notn fi du wid di way dehn rispan tu weh wi du fi dehn. Wi ku chooz fi kantinyu giv ahn bee hapi eevn if adaz noh shoa dat dehn tankful. Mek wi si difrent wayz how wi ku du dat.

16. Weh ku help wi fi stay hapi az wi giv tu adaz?

¹⁶ Foakos pahn Jehoava egzampl. Hihn gi gud tingz tu peepl noh mata if dehn apreeshiayt it er nat. (Mach. 5:​43-48) Jehoava pramis dat if wi giv widowt “hoap fi get bak eniting,” wi “riwaad wahn bee grayt.” (Look 6:35) An “eniting” ku eevn bee wahn lee tanks. Soh noh bee disapointid if peepl noh aalwayz tank yu. Memba, Jehoava wahn aalwayz riwaad yu fi di gud yu du fi help adaz ahn bikaaz yu “hapi fi giv.”—Prav. 19:17; 2 Kor. 9:7.

17. Wat da wahn impoatant reezn wai wi waahn giv tu adaz? (Look 14:​12-14)

¹⁷ Wahn impoatant reezn wai wi waahn giv tu adaz deh eena Look 14:​12-14. (Reed.) If wi du dat, wi wahn di kapi Jehoava ahn wi wahn di obay Jeezas. Af koars, ih noh rang fi invait sohnbadi oava fi wahn meel er fi shoa kainis tu dehn, espeshali wen dehn ku du di saym  ting fi wi. Bot wat if wi noatis dat wi yoozhwali giv tu adaz bikaaz wi hoap fi get sohnting bak fahn dehn? Wel, if dat da di kays, chrai du weh Jeezas mi seh fi du. Bee jenaros tu sohnbadi weh kyaahn gi yu notn bak. If wi du dat, den wi wahn bee hapi bikaaz wi di kapi Jehoava egzampl. An if wi noh ekspek notn bak, wi wahn aalwayz bee hapi wen wi giv tu adaz, eevn wen dehn noh shoa dat dehn tankful.

18. Wai wi noh fi tink bad bowt peepl weh noh tankful?

¹⁸ Noh tink dat adaz noh tankful. (1 Kor. 13:7) If wi mi du sohnting fi sohnbadi an ih noh shoa dat ih tankful fi weh wi du far ahn, wi ku aks wiself: ‘Dis persn reeli noh tankful ataal, er ih jos noh memba fi shoa dat ih tankful?ʼ Maybi dehn ga ada reezn wai dehn noh shoa dat dehn graytful. Sohn peepl doo feel graytful, bot dehn jos noh noa how fi shoa it. Maybi dehn shaym fi geh help bikaaz eena di paas da dehn yoostu bee moa jenaros, bot now tingz difrent. If wi chrooli lov wi bradaz ahn sistaz, wi noh wahn tink bad bowt dehn ahn wi wahn kip di giv wid jai.—Ifee. 4:2.

19-20. Wai payshens impoatant wen wi giv tu adaz? (Koment pahn di picha.)

¹⁹ Bee payshent. King Salaman mi seh: “Chroa bred pahn tap a di waata, bikaaz afta sohn dayz yu wahn fain it agen.” (Ikl. 11:1) Dis vers teech wi dat sohntaim peepl mait noh shoa dat dehn tankful til “afta sohn dayz.” Noatis weh mi hapm tu wahn sista.

²⁰ Yaaz agoa, wahn serkit oavaseeya waif mi rait wahn inkorijin leta tu wahn sista weh mi jos geh baptaiz. Eena di leta, shee mi seh dat ih veri impoatant fi stay faytful tu Jehoava. Bowt ayt yaaz layta, di sista mi ansa bak wid wahn leta; ih seh: “Yoo noh noa dis, bot Ah reeli waahn yu noa humoch yu help mi dehnya paas yaaz. Eena yu leta, yu mi rait  sohn kain werdz, an Ah neva ferget di skripcha yu mi shayr wid mi.” a Shee mi eksplayn weh chalenjiz ih mi fays oava di yaaz, den ih seh: “Sohntaim Ah mi jos waahn giv op ahn stap serv Jehoava. Bot Ah mi aalwayz memba di skripcha eena di leta, an ih gi mi di schrent fi noh giv op. Joorin dehndeh ayt yaaz, notn els mi inkorij mi az moch az yu leta ahn di skripcha yu mi shayr wid mi.” Jos imajin how hapi di serkit oavaseeya waif mi hapi fi geh da inkorijin leta “afta sohn dayz”! Ahn wee tu mait praabli gaahn chroo sohnting simila ahn geh wahn lee noat er wahn tank yu til lang afta wi du sohnting fi sohnbadi.

21. Wai yu mek it yu goal fi kantinyu kapi wi jenaros hevnli Faada?

²¹ Jehoava noa dat ih mek wi eena wahn speshal way. Hihn noa dat wi wahn feel moa hapinis wen wi giv tu adaz dan wen wi get tingz fahn dehn. Wi feel gud wen wi ku help wi bradaz ahn sistaz. Ahn wi soh hapi wen dehn shoa dat dehn tankful. Bot eevn if di persn neva shoa dat ih graytful, wee ku bee shoar dat wi mi du di rait ting. Neva ferget dat wateva yu giv, “Jehoava ku gi yu moch moa dan dat.” (2 Chron. 25:9) Soh Jehoava wahn aalwayz riwaad yu wid moch moa dan weh yoo kuda eva giv enibadi els! Ahn wen Jehoava riwaad wi, da di bes yu kuda eva get. Mek wi mek it wi goal fi kantinyu kapi wi jenaros hevnli Faada.