Jos bikaaz dehn neva deh wid Jeezas wen ih staat op Krais Eevnin Meel, noh meenz dat hihn neva aksep dehn er dat dehn mi abandan ahn. Jeezas mi jos waahn deh wid ih apasl dehn pahn da okayzhan. Soh wi noh ga no reezn fi tink dat di ada disaiplz mi abandan ahn.

Di 12 ahn di 70 da-mi Jeezas disaiplz. Jeezas mi chooz 12 man fahn monks di disaiplz an ih kaal dehn apaslz. (Look 6:​12-16) Hihn mi deh da Gyalilee wen ih “kaal di 12 apasl” ahn “sen dehn owt fi preech bowt di Kingdom a Gaad ahn fi heel sik peepl.” (Look 9:​1-6) Layta, da Judeeya, Jeezas mi “chooz 70 ada disaipl ahn sen dehn owt too bai too” fi preech. (Look 9:51; 10:1) Bikaaz a dat, Jeezas mi ga disaiplz eena lata difrent ayrya.

Jooz weh mi ton Jeezas disaiplz wuda stil selibrayt di Paasoava evri yaa, praabli tugeda wid dehn famili. (Eks. 12:​6-11, 17-20) Lee bit bifoa Jeezas mi ded, hihn an ih apasl dehn gaahn da Jeroosalem. Bot hihn neva aks aala ih disaipl dehn fahn Judeeya, Gyalilee, ahn Pereeya fi kohn selibrayt di Paasoava tugeda. Soh wi ku si dat Jeezas mi onli waahn deh wid ih apasl dehn fi dis okayzhan. Hihn mi tel dehn: “Ah onli hapi fi eet dis Paasoava meel wid unu bifoa Ah sofa.”—Look 22:15.

Jeezas mi ga gud reezn fi du dat. Hihn mi wahn soon ded az “di Lam a Gaad weh wahn tek weh di sin a di werl.” (Jan 1:29) Jeezas mi wahn ded da Jeroosalem, di plays wehpaat dehn mi aafa sakrifais tu Gaad fi wahn lang taim. Di Paasoava lam mi rimain di Izrelait dehn dat Jehoava mi tek dehn owta Eejip. Bot Jeezas sakrifais wuda du moch moa dan dat. Hihn wahn set evribadi free fahn sin ahn det! (1 Kor. 5:​7, 8) Bikaaz a Jeezas sakrifais, di 12 apasl wuda bee paat a di fongdayshan a di Kristyan kangrigayshan. (Ifee. 2:​20-22) Sohnting inchrestin da dat Nyoo Jeroosalem, di hoali siti, ga “12 fongdayshan stoan” weh ga “di naym a di 12 apasl a di Lam.” (Rev. 21:​10-14) Soh di faytful apasl dehn wuda ga wahn speshal paat eena Gaad perpos. Wi ku andastan wai Jeezas mi waahn ih apaslz deh wid ahn fi di laas Paasoava ahn fi Krais Eevnin Meel.

Di 70 ahn di res a di disaiplz neva jain eena di meel wid Jeezas. Stilyet, doh, aala di disaiplz weh mi faytful wuda benifit fahn Krais Eevnin Meel. Az taim paas, aala dehndeh disaiplz weh geh anointid wuda bee paat a di kovenant fi wahn kingdom, weh Jeezas mi menshan tu ih apasl dehn da nait.—Look 22:​29, 30.