Haychrid da wahn veri schrang feelin weh mek yu reeli noh laik sombadi er weh ku eevn mek yu waahn hert dehn. Da moa dan fi jos noh laik wahn persn er groop a peepl. Dis feelin ku laas fi wahn lang taim.

Peepl staat tu hayt eech ada fi wahn lata reezn. Moas a di taim, peepl weh hayt adaz noh reeli hayt dehn bikaaz a weh dehn du, bot bikaaz a hoo dehn. Dehn hayt dehn bikaaz dehn mait tink dat evribadi eena wahn sertn groop bad ahn dat dehn wahn neva chaynj, eevn doa di peepl eena da groop mait noh du notn bad. Dehn mait luk dong pahn dehn, si dehn az wahn chret, er si dehn az di reezn wai prablemz egzis. Peepl weh ga dis kaina feelin tuwaadz adaz praabli gaahn chroo vailens, injostis, er sohnting els.

Sohntaim peepl hayt adaz weh dehn nat eevn meet bifoa. Fi egzampl, widowt dehn eevn noa it, dehn ku staat tu feel di saym way how dehn famili er frenz feel tuwaadz wahn sertn persn er groop a peepl. Soh if sohnbadi eena di famili feel wahn sertn way bowt wahn persn er groop a peepl, soon evribadi eena di famili mait staat tu feel da sayhn way.

Wen wi andastan how eezi haychrid spred, wi ku si wai wahn lata peepl hayt adaz. Bot fi mek wi ku stap di haychrid weh egzis eena di werl, wi haftu fain owt how ih mi fers staat. Di Baibl tel wi how ih mi staat.

HAYCHRID NEVA STAAT WID HYOOMANZ. Ih mi staat wid Saytan di Devl. Hihn yoostu bee wahn aynjel da hevn, bot ih mi ribel gens Gaad. Di Devl “da-mi wahn merdara fahn di taim” ih mi ribel. Bikaaz “hihn laiyad ahn hihn da di faada a di lai dehn,” hihn kantinyu fi mek peepl hayt ahn hert wan anada. (Jan 8:44; 1 Jan 3:11, 12) Di Baibl seh dat hihn wikid, ih beks bad, an ih vailent.—Job 2:7; Revilayshan 12:9, 12, 17.

HYOOMANZ NOH PERFEK, SOH IH EEZI FI MEK DEHN HAYT EECH ADA. Di fers man, Adam, mi fala Saytan an ih mi ribel gens Gaad. Bikaaz a dat, aal hyoomanz inherit sin an imperfekshan. (Roamanz 5:12) Adam fers son, Kayn, mi hayt ih breda soh moch dat ih mi kil ahn. (1 Jan 3:12) Da chroo, wahn lata hyoomanz stil shoa lov ahn kompashan tudeh. Bot bikaaz aala wi inherit sin, wahn lata peepl selfish, jelos, ahn prowd. Dehndeh kwalitiz mek wahn lata peepl hayt eech ada.—2 Timoti 3:1-5.

WAHN PERSN WUDA HAYT ADAZ BIKAAZ DEHN DIFRENT. Di werl weh wi liv eena mek peepl hayt eech ada bikaaz dehn bihayv eena wahn way weh noh shoa no kaina mersi ahn dehn onli waahn hert adaz. Bikaaz “di hoal werl deh anda di powa a di wikid wan,” Saytan di Devl, peepl hayt adaz weh difrent fahn dehn, dehn taak eena wahn way weh insolt adaz, dehn buli ada peepl, ahn dehn damij ada peepl prapati.—1 Jan 5:19.

Di Baibl noh onli taak bowt how haychrid mi staat, bot ih aalso tel wi how wi kud geh rid a haychrid.