Eevn if nobadi eva hayt yu bifoa, moa dan laikli yu don si sohnbadi hayt wahn nada persn. Wi aalwayz hyaa bowt peepl weh hayt adaz bikaaz dehn kohn fahn wahn difrent konchri, kolcha, er bikaaz dehn da homosekshwal. Bikaaz a dat, wahn lata govament set op sohn laa fi ponish enibadi weh komit wahn kraim bikaaz a haychrid.

Moas a di taim, peepl weh sofa bikaaz adaz hayt dehn naamali staat hayt adaz tu. Ahn soh dehn du bad tingz tu ada peepl, ahn dat mek haychrid kantinyu oava ahn oava agen.

Maybi yu noa weh ih feel laik fi mek peepl insolt yu, teez yu, er eevn chretn yu. Bot haychrid ku bee moa dan dat. Sohntaim haychrid ku mek peepl bee reeli vailent tuwaadz adaz. Dehn mait buli dehn, dischrai dehn prapati, beet dehn op, rayp dehn, er eevn kil dehn.

Dis magazeen wahn ansa dehnya kweschan an ih wahn shoa wi how wi ku geh rid a haychrid:

• Wai soh moch peepl hayt adaz?

• How wi ku stap haychrid fahn hapm oava ahn oava agen?

• Wi wahn eva ga wahn taim wen peepl noh wahn hayt eech ada?