Imajin wahn pa di taak tu ih lee sevn yaa oal son. Ih tel ahn, “Fahn way way bak, Gaad mek di ert an evriting eena it, ahn hihn mek di son, di moon, ahn di staarz.” Di lee bwai stap ahn tink bowt it, den ih aks, “Dadi, da hoo mek Gaad?”

Ih pa tel ahn, “Nobadi mek Gaad. Hihn mi aalwayz egzis.” Fi now di lee bwai satisfai wid da ansa, bot az ih geh oalda ih aks di kweschan agen. Hihn fain it haad fi andastan how sohnbadi kuda aalwayz egzis widowt wahn biginin, bikaaz eevn di yoonivers mi ga wahn biginin. Soh hihn di wanda ‘Weh Gaad kohn fram?’

How di Baibl ansa dis kweschan? Di ansa da akchwali di saym fahn weh di pa tel ih son. Eena di Baibl, Moaziz mi rait: “Oa Jehoava, . . . bifoa di mongtin dehn egzis er bifoa yu mek di ert ahn di gud lan, fahn fareva eena di paas tu fareva eena di fyoocha, yoo da Gaad.” (Psalm 90:1, 2) Eevn di prafit Aizaiya mi seh: “Yoo neva noa? Yoo neva hyaa? Jehoava, di Kriyayta a di hoal ert, da di Gaad fi fareva an eva”! (Isaiah 40:28) Sayhn way soh, di leta fahn Jood seh dat Gaad mi aalwayz egzis “eena di paas.”—Jood 25.

Dehnya skripchaz shoa wi dat Gaad da di “evalastin King,” jos laik how di apasl Paal diskraib ahn. (1 Timoti 1:17) Dis meenz dat Gaad mi aalwayz egzis eena di paas ahn hihn wahn aalwayz egzis eena di fyoocha. (Revilayshan 1:8) Dat da weh mek hihn di Almaiti.

Wai wi fain it haad fi andastan dat Gaad mi aalwayz egzis? If wi kompyaa wiself tu Jehoava, wee noh liv fi lang ahn soh wee noh si taim di way how hihn see’t. Bikaaz Gaad da evalastin, tu hihn wahn towzn yaaz da laik wan day. (2 Peeta 3:8) Tink bowt dis: Yu tink wahn graashapa weh liv fi onli bowt 50 dayz ku andastan dat wee liv fi bowt 70 er 80 yaaz? Maybi nat! Yet, di Baibl tel wi dat wee da laik graashapa wen wi kompyaa wiself tu wi Kriyayta. Eevn fi hihn tinkin haiya dan di way how wee tink. (Isaiah 40:22; 55:8, 9) Soh ih shudn sopraiz wi dat dehn ga lata tingz bowt Jehoava weh hyoomanz kyaahn reeli andastan.

Aldoa ih ku bee haad fi andastan dat Gaad da evalastin, wi ku si dat ih mek sens. If sombadi els mi kriyayt Gaad, den da persn wuda bee di Kriyayta. Bot, laik how di Baibl tel wi, Jehoava da di wan hoo “mek evriting.” (Revilayshan 4:11) Pahn tap a dat, wi noa dat di yoonivers neva aalwayz egzis. (Genesis 1:1, 2) Weh ih kohn fram? Di wan hoo kriyayt it mi haftu egzis fers. Hihn mi aalso egzis bifoa enibadi els, eevn bifoa ih onli Son ahn di aynjelz. (Job 38:4, 7; Koloashanz 1:15) Soh ih klyaa fi si dat hihn aloan mi egzis fers. Notn mi egzis bifoa weh kuda mi kriyayt hihn.

Fi wee oan laif ahn di hoal yoonivers proov dat dehn haftu ga wahn Gaad weh mi aalwayz egzis. Onli hihn mi aybl fi kriyayt di yoonivers ahn di way how ih fongshan. An onli hihn kuda mi giv laif tu evriting els.—Job 33:4.