Moa ahn moa, Jehoava Witnisiz tudeh di yooz di dijital verzhan a di poblikayshanz ahn veedyoz. Bot lata wi bradaz rong di werl kyaahn afoad fi ga Intanet. Som a dehn liv eena ayryaz weh noh aalwayz ga powa, weh di Intanet sloa, er weh noh ga no Intanet ataal.

 Bot now, lata wi bradaz ahn sistaz ku dongload wi poblikayshanz widowt wahn Intanet kanekshan! How dehn du dat?

 Di kangrigayshan dehn weh noh ga Intanet yooz di JW Baks. Eensaida it ga wahn divais weh di Kompyoota Dipaatment da Betel yooz fi mek wahn saafwayr; da way dehn ku put wi poblikayshanz ahn veedyoz pan it. Eech baks kaas bowt $150 BZD.

 Da di Kingdom Haal, bradaz ahn sistaz kud kanek dehn divais tu di JW Baks soh dat dehn ku dongload di poblikayshanz ahn veedyoz. Ih noh mata if dehn ga wahn ekspensiv divais er nat. Bot wat if wahn kangrigayshan noh ga no Intanet, how di JW Baks stay op-tu-dayt? Di branch sen wahn flash jraiv evri now ahn agen wid nyoo poblikayshanz ahn veedyoz soh dehn kud opload it pahn di JW Baks. Dis kaas bowt $8 BZD eech.

 How di JW Baks di help wi bradaz ahn sistaz? Brada Nathan Adruandra, wahn pa weh liv da di Democratic Republic of Congo, mi seh: “Fi wahn lang taim, Ah mi chrai dongload di jrama dehn weh naym ‘Oa Jehoava, . . . .Ai Chros Eena Yoo’ ahn Memba Weh Hapm Tu Lat Waif. Bot Ah kudn du dat an ih mi diskorij mi. Now Ah ku dongload dehnya veedyo pahn mi foan, ahn dis help wee weh da payrents fi teech wi pikni dehn beta.”

 Wahn brada weh help set op di JW Baks dehn da Nigeria seh: “Di bradaz si dis az wahn speshal gif fahn Jehoava, ahn dehn hapi dat now dehn ku dongload di poblikayshanz ahn di veedyoz fahn di Teechin Toolbaks.”

 Moa dan 1,700 JW Baks geh sen owt tu wi bradaz da Africa, Oceania, ahn South America, ahn wi di mek planz fi sen owt moa JW Baks tu lat moa kangrigayshan. How dehn ku pay fi aala dis? Dis pasabl bikaaz a di doanayshanz weh geh mek tu di werlwaid werk chroo donate.pr418.com. Tanks fi aala unu lovin sopoat.