Lata govament rong di werl put op rischrikshan fi kip soashal distans ahn dehn noh di alow peepl fi gyada tugeda. Az Jehoava Witnisiz, wi obay dehnya rischrikshan bot wi kantinyu fi meet tugeda eena wahn sayf way. Soh wi staat tu ga wi kangrigayshan meetin dehn oava di Intanet ahn wi staat yooz difrent proagramz laik Zoom.

 Fi mek wi ku ga wi meetin dehn regyula, di Govanin Badi mi aproov fi mek di bradaz yooz som a di doanayshan fi bai sohn Zoom akonk fi di kangrigayshan dehn. Dis mi reeli help sohn kangrigayshan weh mi kyaahn afoad fi pay $15 tu $20 US er moa fi wahn akonk. Moas a di taim, dehnya kangrigayshan mi di yooz proagramz weh free, bot onli lee bit a peepl kuda mi jain an ih neva reeli sikyoar. Bot now, aala di kangrigayshan dehn weh di yooz dehnya Zoom akonk weh di aaganaizayshan provaid noh haftu deel wid dehnya prablem nohmoh. Soh faar, oava 65,000 kangrigayshan weh deh eena moa dan 170 konchri di yooz dehnya akonk.

 Di Kairagi kangrigayshan da Manado, North Sulawesi, Indonesia, mi stap yooz proagramz weh free ahn staat yooz Zoom akonks weh di aaganaizayshan provaid. Brada Hadi Santoso mi seh: “Eevn bradaz ahn sistaz weh noh noa how fi yooz wahn ilekchranik divais kud injai di meetin dehn now bikaaz dehn noh haftu lag aan moa dan wan taim joorin di meetin.”

 Wahn elda fahn di Gauyacanes Oeste Kangrigayshan da Guayaquil, Ecuador weh naym Lester Jijon, Jr., seh: “Wahn lata di bradaz ahn sistaz noh gat inof moni, soh ih mi wahn bee haad fi mek som a di kangrigayshan dehn bai wahn Zoom akonk fi mek aala di bradaz ahn sistaz jain dehn meetin. Bot now, bikaaz wi di yooz di Zoom akonk weh di aaganaizayshan provaid, wi kud invait adaz ahn wi noh haftu wori bowt di amonk a peepl weh jain.”

 Wahn nada elda fahn di Ngwere North Kangrigayshan da Lusaka, Zambia, weh naym Johnson Mwanza, mi rait: “Wahn lata bradaz ahn sistaz kip di seh, ‘bikaaz a dis araynjment, wi noh onli feel kloasa tu wi bradaz ahn sistaz, bot wi aalso si humoch Jehoava lov wi ahn tek kayr a wi.’”

 Fi bai dehnya Zoom akonks, di aaganaizayshan yooz moni weh dehn put wan said fi di dizaasta rileef werk weh di bradaz ahn sistaz doanayt tu di werlwaid werk. Dehn mek wahn lata dehnya doanayshanz onlain pahn donate.pr418.com. Tank unu soh moch fi unu jenaros doanayshan, weh aalso help wid ada rileef werk rong di werl.—2 Korintyanz 8:14.