KIP PAHN DI LUKOWT!
2022 Da Wahn Yaa Weh Mi Ful a Prablemz—Weh di Baibl Ga fi Seh?
Joorin 2022, wi geh loan bad nyooz bowt waar, moni prablemz, ahn prablemz weh di damij di ert. Onli di Baibl ku tel wi di reezn wai dehnya bad tingz di hapm.
Wai lata bad tingz mi hapm eena 2022?
Evriting weh hapm eena 2022 proov dat wee di liv joorin di taim weh di Baibl kaal “di laas dayz.” (2 Timoti 3:1) Di laas dayz mi staat eena 1914. Mek wi si how di tingz weh di Baibl mi don prafesai di kohn chroo rait now:
“Waar.”—Machyu 24:6.
“Eena 2022, Europe staat sofa sayka wahn waar aal oava agen.” a
Reed di aatikl weh naym “Russia Invayd Ukraine.”
“Dehn wahn ga famin.”—Machyu 24:7.
“Eena 2022, wahn lata plays rong di werl ga food shaatij.” b
Reed di aatikl weh naym “Di Waar da Ukraine Di Mek Food Shaatij Geh Wers Aal Rong di Werl.”
“Aal kaina dizeez.”—Look 21:11.
“Polio staat afek lata peepl agen, monkeypox da wahn seeryos prablem rait now, ahn pahn tap a dat lata peepl stil di sofa fahn COVID-19. Dehnya siknis shoa dat wahn dizeez weh eezi fi kech veri daynjaros an ih ku kil lata peepl.” c
Reed di aatikl weh naym “6 Milyan Peepl Don Ded Fahn COVID.”
“Peepl wahn si tingz weh wahn mek dehn geh frayd.”—Look 21:11.
“Heet wayv, waata di geh skyaas, bush faiya, ahn lata flod. Nobadi wahn ferget di soma eena 2022 bikaaz di daynjaros chaynjiz eena di weda mi kaaz lata damij. Honjridz a towznz a peepl mi ded, ahn milyanz a peepl mi stay widowt wahn plays fi liv.” d
Reed di aatikl weh naym “Aal Rong di Werl di Weda Di Geh Hata Dan Naamal.”
“Raiyat.”—Look 21:9.
“Eena 2022 wahn lata peepl mi-di proates di govament sayka moni prablemz. Dehn beks bikaaz di prais a evriting di goh op faas ahn dehn noh ga inof moni fi liv pan.” e
Reed di aatikl weh naym “Aal Rong di Werl di Prais a Evriting Di Goh Op.”
Weh 2023 wahn bee laik?
Nobadi noa fi shoar weh wahn hapm eena 2023. Bot wi doo noa dat Gaad Kingdom, er govament, wahn soon fiks aala di prablemz weh di hapm rait now. (Daniel 2:44) Gaad govament wahn geh rid a evriting weh mek peepl sofa, an ih wahn mek shoar dat fi Hihn perpos fi di ert kohn chroo.—Machyu 6:9, 10.
Wi inkorij yu fi fala Jeezas advais fi “kip pahn di lukowt.” (Maak 13:37) Pay atenshan tu di tingz weh di hapm rait now ahn tu how Baibl prafesi di kohn chroo. Pleez kantak wi if yu waahn laan moa bowt how di Baibl ku help yu ahn bowt di reel hoap fi di fyoocha weh yoo ahn yu famili ku gat.
a AP News, “2022 Was Year the Horror of War Returned to Europe,” bai Jill Lawless, Disemba 8, 2022.
b World Food Programme, “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” bai Lawrence O. Gostin, JD, Septemba 22, 2022.
d Earth.Org, “What’s Behind the Record-Breaking Extreme Weather Events of Summer 2022?” bai Martina Igini, Aktoaba 24, 2022.
e Carnegie Endowment for International Peace, “Economic Anger Dominated Global Protests in 2022,” bai Thomas Carothers ahn Benjamin Feldman, Disemba 8, 2022.