Wahn lata flod weh kaaz damij di hapm aal oava di werl. Sayka dat, wahn lata peepl di sofa. Noatis weh dehnya ripoat seh:

•   “Di kyapital a China mi geh wahn lata rayn eena jos wahn fyoo dayz. Bitween Satideh ahn Wenzdeh dehn mi geh . . . 29.3 inch (744.8 milimeeta) a rayn. Dehn noh si rayn laik dat fi at lees 140 yaaz.”—AP News, Aagas 2, 2023.

•   “Terzdeh da-mi di sekant day weh Harikayn Khanun mi hit di sowt a Japan wid haad rayn ahn schrang breez, an at lees too peepl mi ded. . . . Da staam wahn afek Taiwan tu. Ih wahn bring wahn lata rayn, op tu bowt 2 fut (0.6 meeta) a waata, eena di mongtin dehn da senchral Taiwan.”—Deutsche Welle, Aagas 3, 2023.

•   “Dehn mi ga sohn flod da Nova Scotia oava di weeken sayka di lata rayn weh dehn mi get. Fi oava 50 yaaz, dehn neva si soh moch rayn eena da paat a Canada bai di Atlantic Ocean.”—BBC News, Joolai 24, 2023.

 Weh di Baibl seh bowt tingz laik dat?

 Di Baibl kaal dehnya taimz weh wi di liv eena “di laas dayz.” (2 Timoti 3:1) Jeezas mi prafesai dat peepl wahn “si tingz weh wahn mek dehn geh frayd.” (Look 21:11) Di daynjaros chaynjiz eena di weda di mek it haada fi pridik di weda. Dehndeh chaynjiz aalso di kaaz bad weda fi hapm moa aafn ahn fi kaaz moa damij.

 Di Baibl tel wi dat di tingz weh wi si di hapm rait now weh fraitn wi shuda bee reezn fi ga hoap. Wai? Bikaaz Jeezas seh: “Wen unu si dehnya tingz di hapm, unu wahn noa dat di Kingdom a Gaad deh kloas.”—Look 21:31; Machyu 24:3.

 Dehnya tingz shoa wi dat wen Gaad Kingdom staat rool, wi noh wahn ga nohmoh bad weda. Ih wahn tek ful kanchroal oava tingz eena naycha, ahn dis inklood di waata saikl.—Job 36:27, 28; Psalm 107:29.

 Fi laan moa bowt how Gaad Kingdom wahn fiks di prablemz pahn di ert, si di aatikl weh naym “Who Will Save the Earth?”