Wans a yaa, Jehoava Witnisiz ahn milyanz a peepl rong di werl kohn tugeda fi selibrayt di Memoaryal a Krais det. Dis da sohnting weh Jeezas koman wi fi du. (Look 22:19) Dis ivent help wi fi si wai wi need fi andastan an apreeshiayt weh Jeezas mi du wen ih giv op ih laif fi hyoomanz. Ih aalso help wi fi andastan how Jeezas sakrifais ku benifit wi now an eena di fyoocha.—Jan 3:16.

 Weda er nat yu gaahn da di Memoaryal dis yaa, ih gud fi mek yu laan how Jeezas sakrifais ku help yoo. Dehn ga too impoatant tingz weh Jeezas seh wi haftu du soh dat wi ku benifit fahn ih sakrifais:

1.  1. Laan bowt Gaad ahn Jeezas. Wahn taim wen Jeezas mi-di pray tu ih Pa, hihn mi seh: “Di wan dehn weh wahn get evalastin laif need fi get fi noa yoo, di onli chroo Gaad, ahn di wan weh yu sen, Jeezas Krais.”—Jan 17:3.

2.  2. Praktis weh yu laan. Jeezas mi mek it klyaa dat wi need fi praktis weh wi laan eena wi laif. Wen Jeezas mi finish ih Sermon Pahn di Mongtin, hihn mi komen evribadi weh mi “hyaa [ih] werdz an obay dehn.”(Look 6:46-48) Den, pahn wahn nada taim, hihn mi seh: “Unu noa dehnya tingz, bot unu wahn hapi if unu du dehn.”—Jan 13:17.

 Yoo wuda waahn laan moa bowt Gaad ahn Jeezas? Yoo wuda waahn sohn advais pahn how fi praktis weh yu laan? Dehnya da som a di tingz weh ku help yu.

 Wi free Baibl stodi proagram don help lata peepl fi staat stodi di Baibl ahn fi praktis weh dehn laan eena dehn laif.

•   Fi laan moa bowt dis, goh da di sekshan a wi websait weh naym “Wahn Baibl Stodi Proagram.”

•   Wach di veedyo weh naym “How Wi Baibl Stodi Proagram Werk?” fi si weh ih wahn bee laik wen yu stodi di Baibl wid wan a Jehoava Witnisiz.

 Jehoava Witnisiz meet tugeda too taimz fi di week da di Kingdom Haal. Da wi meetinz, wi laan moa bowt weh di Baibl teech ahn how wi ku praktis weh wi laan eena wi laif.

 Enibadi ku kohn da wi meetin dehn; yu noh haftu bee wahn Jehoava Witnis. Dipendin pahn weh yu liv, yu ku eeda goh da di Kingdom Haal er yu ku aten it onlain.

•   Wach di veedyo weh naym “Weh Aal Hapm da Wahn Kingdom Haal?” fi noa weh yu ku ekspek if yu aten di meetin dehn.

•   Fi fain wahn Kingdom Haal weh deh kloas tu wehpaat yoo liv, goh pahn wi websait anda di sekshan weh naym “Di Meetin Dehn Weh Eech Kangrigayshan a Jehoava Witnisiz Gat.”

 Dehn ga lata aatikl ahn veedyo pahn wi websait weh ku help yu fi laan moa bowt weh Jeezas mi teech ahn wai ih impoatant fi apreeshiayt fi hihn sakrifais.

 Fi egzampl, if yoo waahn laan how ih pasabl fi mek wan man sakrifais benifit milyanz a peepl, reed di aatikl dehn weh naym “Jesus Saves—How?” ahn “Why Did Jesus Suffer and Die?” er wach di veedyo weh naym “Wai Jeezas Mi Ded fi Wi?”