Pahn Aypril 4, 2022, António Guterres, di sekiteri-jenaral a di United Nations mi gi wahn speech bowt di Intergovernmental Panel on Climate Change ripoat. Hihn mi seh: “Hyoomanz di du lata tingz weh wahn soon dischrai di ert. Fi egzampl, wahn lata big siti wahn soon deh anda waata. Difrent plays wahn ga heet wayv laik neva bifoa. Wi wahn ga sohn terabl staam. Wahn lata plays noh wahn ga inof waata. Wahn milyan difrent kaina plaants an animalz wahn soon ded owt. Ah noh di egzajarayt; ih wahn hapm fi chroo. Dis da weh saiyens seh wahn hapm if di govament dehn noh chaynj di way how dehn konchri yooz enerji.”

 Pahn Joon 15, 2022, The New York Times mi poblish wahn aatikl weh naym “Flooding Chaos in Yellowstone, a Sign of Crises to Come.” Ih seh: “Saiyentis di waan dat soon nayli aala a di 423 nashanal paak [eena di United States] wahn geh dischrai bikaaz a chaynjiz eena di weda, espeshali bikaaz a how hat weda afek dehnya paak. Di bad tingz weh ku hapm song laik sohn dizaasta weh wi mait reed bowt eena di Baibl: faiya ahn flod, ais sheet di melt, see levl di goh op ahn heet wayv di lik.”

 Yu tink ih pasabl fi fiks di prablemz weh di damij di ert? If yes, den da hoo yu tink wahn fiks dehn? Mek wi si weh di Baibl seh bowt dis.

 Di Baibl seh dat Gaad wahn “dischrai di wan dehn weh di rooin di ert.” (Revilayshan 11:18) Wi laan chree tingz fahn dis vers:

1.  1. Peepl wahn du tingz weh wahn du wahn lata damij tu di ert.

2.  2. Di prablemz weh di kaaz damij tu di ert wahn definaytli kohn tu wahn en.

3.  3. Peepl noh wahn fiks dehnya prablemz. Gaad da di wan weh wahn sayv di ert.

 Di Baibl seh dat “di ert wahn deh ya fareva.” (Ecclesiastes 1:4) Peepl wahn aalwayz liv pahn di ert.

•   “Di raichos wan dehn wahn inherit di ert, ahn dehn wahn liv fareva pan it.”—Psalm 37:29.

 Di ert wahn kohn bak tu perfek kandishan.

•   “Di wildanes ahn di jrai lan wahn rijais, ahn di dezert wahn bee ful a jai an ih wahn blaasam laik di safron.”—Isaiah 35:1.