Bowt 3,500 yaaz abak, jos bifoa di nayshan a Izrel mi gaan eena di Pramis Lan, Gaad mi seh dat hihn mi wahn protek dehn fahn “di terabl dizeez dehn” weh dehn mi haftu deel wid da Eejip. (Deuteronomy 7:15) Wan way how hihn mi du dis da-mi wen ih gi dehn sohn spesifik laa bowt how fi kanchroal dizeez ahn how fi stay kleen. Fi egzampl:

•   Di laa dehn weh ih gi di nayshan mi mek it klyaa dat dehn mi haftu bayd ahn wash dehn kloaz.—Leviticus 15:4-27.

•   Wen ih kohn tu yooz baachroom, Gaad mi seh: “Unu haftu ga wahn speshal plays owtsaida di kyamp, ahn da deh unu shuda goh. Yu haftu ga wahn stik weh yu wahn yooz az wahn tool. Ahn wen yu stup dong owtsaid, yu wahn yooz it fi dig wahn hoal ahn kova yu stool.”—Deuteronomy 23:12, 13.

•   If enibadi mi luk laik dehn ga wahn dizeez, er siknis, weh ku spred tu ada peepl, dehn yoostu kip da persn separayt fahn evribadi els owtsaida di kyamp fi wahn sertn amonk a taim. Wans dehn get oava di siknis, dehn mi haftu bayd ahn wash dehn kloaz eena waata bifoa dehn kuda mi seh dehn “kleen.”—Leviticus 14:8, 9.

•   Enibadi hoo mi toch wahn ded badi mi haftu separayt dehnself fahn di res a peepl fi wahn sertn amonk a taim.—Leviticus 5:2, 3; Numbers 19:16.

 Dehnya laa bak den mi deh faar heda a hyooman andastandin ahn saiyens.

 Da ada konchri bak dehn, peepl neva yoostu ga dis hai standad fi helt, ahn dehn neva yoostu bee soh kleen. Fi egzampl:

•   Dehn yoostu lef gyaabij eena di schreet dehn. Sayka dis, di waata weh dehn yoostu yooz mi doti ahn dehn food neva yoostu kleen, ahn soh di kandishan weh dehn mi liv eena mek wahn lata dehn geh sik ahn lata dehn baybi mi ded.

•   Di dakta dehn bak den neva ga wahn andastandin bowt jermz ahn bakteerya. Di Eejipshan dehn mi ga sohn way owt kyoar fi sertn siknis. Fi egzampl, dehn mi yooz lizad blod, pelikan stool, ded rat, yoorin, ahn moaldi bred az medisn. Dehn yoostu yooz hyooman stool an animal stool fi sertn medikal praktis tu.

•   Di Eejipshan dehn yoostu yooz waata fahn di Nail Riva ahn di kanal dehn weh mi kanek tu it. Bot da waata neva kleen soh dehn yoostu geh aala kaina siknis fan it. Wahn lata baybi yoostu ded fahn loos stoolz an ada siknis sayka doti waata ahn food weh neva kleen.

 Pahn di ada han, di Izrelait dehn mi benifit fahn di standadz weh Gaad set eena di Laa weh ih gi dehn, ahn soh dehn mi faar moa heltiya dan di peepl rong dehn.