Akaadn tu di Baibl, King Dayvid mi liv ahn rool oava Izrel bowt 1,000 yaaz bifoa Jeezas Krais mi kohn pahn di ert. Ih son dehn mi kantinyu fi rool afta hihn. Bot som peepl kritisaiz di Baibl ahn seh dat Dayvid da neva wahn reel persn. Dehn tink dat di Jooish peepl dehn mi jos mek op stoari bowt hihn laytaraan eena hischri. Soh weh yoo tink? King Dayvid da-mi wahn reel persn?

 Eena 1993, Avraham Biran, wahn saiyentis weh stodi rooinz ahn hischri, mi fain wahn pees a wahn stoan da Tel Dan, eena naadan Izrel. Da stoan ga di werdz “Hows a Dayvid” rait dong pan it. Di werdz deh eena wahn stail a raitin weh peepl yoostu yooz bowt 800 yaaz bifoa Krais. Di stoan luk laik da mi paat a wahn stachu weh di Aramayan peepl mi put op fi boas bowt sohn waar weh dehn mi win gens di Izrelait dehn.

 Di Bible History Daily seh eena wahn aatikl: “Som peepl dowt dat di werdz ‘Hows a Dayvid’ reeli di taak bowt di King Dayvid weh deh eena di Baibl . . . Bot moas saiyentis weh stodi dehndeh ting agree dat di stoan weh dehn fain da Tel Dan da proof dat di King Dayvid weh deh eena di Baibl da-mi wahn reel persn eena hischri. Dat mek it wan a di moas impoatant tingz pahn di lis weh di BAR [Biblical Archaeology Review] rait bowt.”