Di prezident a di World Bank Group mi ripoat dis eena Joon 2022: “Di werl deh eena daynja agen. Dis taim da bikaaz di prais fi evriting di goh op faas, bot peepl ga les moni fi spen.”

 Di International Monetary Fund seh: “Di kaas a fyoowel ahn food di goh op faas, ahn dat afek peepl weh liv eena poa konchriz di moas.”

 Di Baibl help wi fi andastan wai wi di goh chroo moni prablemz, how wi ku deel wid dehn, ahn weh hoap wi ga fi wahn beta fyoocha.

•   Di Baibl seh wi di liv eena “di laas dayz.”—2 Timoti 3:1.

•   Jeezas mi seh dat joorin dis taim “peepl wahn si tingz weh wahn mek dehn geh frayd.” (Look 21:11) Wen peepl si praisiz di goh op soh faas, dehn feel frayd fi weh mait hapm neks. Dehn wori bowt dehn fyoocha ahn weda er nat dehn wahn ku provaid fi dehn famili.

•   Di buk a Revilayshan prafesai dat joorin dehnya laas dayz di kaas a food mi gwehn op. Ih seh: “Ah yehr wahn song laik wahn vais. . . . Di vais seh, “Ih wahn tek wan day pay fi bai jos wan kwaat a weet; ahn da sayhn moni deh ku bai chree kwaat a baali.”—Revilayshan 6:6, Di Nyoo Testiment eena Bileez Kriol.

 Fi moa infamayshan pahn “di laas dayz” ahn di prafesi eena di buk a Revilayshan, wach di veedyo weh naym The World Has Changed Since 1914 ahn reed di aatikl weh naym “The Four Horsemen—Who Are They?”

•   “Dehn wahn bil hows ahn dehn saym wan wahn liv een deh; ahn dehn wahn plaant aachad ahn eet fahn di froot weh ih giv. Dehn noh wahn bil hows jos fi mek sombadi els liv een deh; dehn noh wahn plaant ahn sombadi els get fi eet di froot.”—Isaiah 65:21, 22.

•   “Plenti a grayn wahn deh pahn di ert; pahn di tap a di mongtin ih wahn di oavafloa.”—Psalm 72:16.

•   “Jehoava seh: ‘Ah wahn tek akshan, bikaaz peepl di sofa ahn stilyet peepl di chreet dehn bad, ahn bikaaz poa peepl di krai.”—Psalm 12:5. a

 Gaad wahn soon fiks aala wi moni prablemz, noh jos eena wan konchri bot aal rong di werl. Fi fain owt how, reed di aatikl weh naym “Is a Fair Economic System Possible?”

 Bot eevn wail wi di wayt fi wen Gaad fiks wi moni prablemz, di Baibl ku help wi fi deel wid how ekspensiv tingz di get. How? Ih gat een gud advais pahn how fi mek gud yoos a di moni weh wi gat. (Proverbs 23:4, 5; Ecclesiastes 7:12) Fi moa infamayshan, reed di aatikl dehn weh naym “Protek Yu Moni ahn di Tingz Weh Yu Oan” ahn “How fi Liv Pahn Les Moni.”