KIP PAHN DI LUKOWT!
Yu Tink di Nayshanz Ku Werk Tugeda fi Stap di Daynjaros Chaynjiz Eena di Weda Weh di Kaaz Dischrokshan?—Weh di Baibl Seh?
Pahn Sondeh, Novemba 20, 2022, di COP27 United Nations Climate Change Conference mi en. Di leedaz ahn di eksperts hoo mi aten da kanfrens mi agree fi gi moni tu di poa konchri dehn fi help dehn chrai deel wid di dischrokshan weh di chaynjiz eena di weda bring. Bot lata peepl admit dat dis noh wahn stap di prablem.
Pahn Novemba 19, 2022, di sekiteri-jenaral a di United Nations, António Guterres, mi seh: “Ah hapi dat wi mek di disizhan fi put moni wan said fi help di peepl weh di sofa bikaaz a di daynjaros chaynjiz eena di weda weh di kaaz dischrokshan. Ih klyaa fi si dat dis noh wahn inof. . .Di ert deh eena wahn daynjaros sichuwayshan bikaaz wi wahn soon kyaahn du notn fi fiks it.”
Pahn Novemba 20, 2022, Mary Robinson, hoo da-mi di prezident a Ireland ahn weh yoostu bee di UN High Commissioner for Human Rights, seh: “Tingz wahn geh soh bad wid di chaynjiz eena di weda dat evribadi pahn ert wahn sofa.”
Yong peepl wori moa bowt di fyoocha a di ert. Bot, yu tink di nayshanz ku werk tugeda fi kip dehn pramis fi stap di daynjaros chaynjiz eena di weda weh di kaaz dischrokshan. Weh di Baibl seh?
Yu tink di nayshanz wahn ku werk tugeda ahn fiks di prablem?
Di Baibl tel wi dat noh mata how haad hyoomanz chrai fi fiks di prablem, dehn wahn kyaahn fiks it. Noatis too reezn wai:
“Yu kyaahn schraytn owt sohnting weh don krukid.”—Ecclesiastes 1:15.
Weh ih meen: Di govament dehn noh ga sokses bikaaz Gaad neva mek hyoomanz fi rool dehnself. (Jeremiah 10:23) Eevn if dehn kud werk tugeda, dehn wahn stil kyaahn solv di prablemz eena di werl, noh mata how haad dehn chrai.
“Peepl wahn lov dehnself ahn lov moni. . . Dehn noh wahn bee wilin fi get lang wid wan anada.”—2 Timoti 3:2, 3.
Weh ih meen: Di Baibl mi karek wen ih seh dat peepl mi wahn onli tink bowt dehnself ahn dehn noh wahn wilin fi werk tugeda fi help mek laif pahn ert beta fi evribadi.
Wahn reezn fi ga hoap fi wahn brait fyoocha
Bot di fyoocha fi di ert noh pen pahn non a di pramis dehn weh di govament dehn mek. In fak, Gaad don pik sombadi weh kwalifai fi rool dis werl, ih Son, Jeezas Krais. Dis da weh di Baibl seh bowt Jeezas:
“Hihn wahn ga atariti fi rool. Dehn wahn kaal ahn Waiz Kongsla, Maiti Gaad, di wan weh da Faada Fareva, Prins a Pees.”—Isaiah 9:6, futnoat.
Jeezas da di King a Gaad Kingdom, di govament weh deh da hevn. (Machyu 6:10) Hihn ga di powa, di wizdom, ahn hihn reeli waahn tek kayr a di ert an evribadi weh liv pan it. (Psalm 72:12, 16) Wen hihn tek oava di roolaship, fi hihn hevnli Kingdom wahn geh rid a dehn wan weh di “dischrai di ert” an ih wahn mek di ert bee helti agen.—Revilayshan 11:18, futnoat; Isaiah 35:1, 7.
If yu waahn laan moa bowt weh da di onli ting weh wahn stap di daynjaros chaynjiz eena di weda, reed di aatikl weh naym “Climate Change and Our Future—What the Bible Says.”