Noatis dehnya koments pahn how sohn faymos rilijos leedaz riyak tu di waar da Ukraine:

•   “Op tu now, di hed a di Russian Orthodox Church, Patriarch Kirill, noh seh notn bad bowt weh Russia di du. . . . Fi hihn Cherch kip aan di spred lai bowt Ukraine, ahn Putin yooz dehndeh saym lai fi difen di waar gens Ukraine.”—EUobserver, Maach 7, 2022.

•   “Patriarch Kirill . . . seh dat Russia ga gud reezn fi invayd Ukraine bikaaz dis waar da paat a di fait gens sin.”—AP News, Maach 8, 2022.

•   “Pahn Mondeh, di Ukrainian Orthodox Church leeda, Metropolitan Epiphanius I of Kyiv, bles ih peepl an inkorij dehn fi ‘fait gens di Russian dehn weh di invayd Ukraine’ . . . Ahn [hihn] seh dat da noh wahn sin fi kil di Russian soalja dehn.”—Jerusalem Post, Maach 16, 2022.

•   “Wee [di Ukrainian Council of Churches and Religious Organizations (UCCRO)] sopoat Ukraine Aami an evribadi weh di fait fi difen wi konchri. Wi bles weh dehn di du fi fait gens Ukraine enimi, ahn wi pray fi dehn.”—UCCRO a Statement, Febiweri  24, 2022.

 Yu tink eni rilijan weh klaym fi fala Jeezas Krais fi inkorij dehn membaz fi goh da waar? Weh di Baibl ga fi seh bowt dat?

Di hischri a rilijan ahn waar

 Hischri shoa dat lata taim rilijan weh klaym fi fait fi pees sopoat waar. Dehn seh dat notn rang wid goh da waar, dat dehn ga gud reezn fi goh da waar, er dat sohntaim ih eevn nesiseri fi goh da waar. Fi yaaz now, Jehoava Witnisiz di help peepl fi si dat dehndeh rilijan da hipokrit. Noatis weh som a wi poblikayshan dehn seh:

•   Di aatikl weh naym “The Crusades—A ‘Tragic Illusion’” shoa how di Roman Catholic Church rispansabl fi wahn lata kilin weh hapm eena di naym a Gaad ahn Krais.

•   Di aatikl weh naym “The Catholic Church in Africa” shoa how rilijan neva chrai stap di waar bitween difrent chraib, eevn wen wan chraib chrai kil owt wahn hoal ada chraib.

•   Di aatikl dehn weh naym “Is Religion to Blame?,” “Religion’s Role in Man’s Wars,” ahn “Religion Takes Sides” eksplayn how di Catholic, Orthodox, ahn di Protestant rilijos leedaz sopoat di too said a wahn lata waar.

Yu tink eni Kristyan rilijan shuda sopoat waar?

 Weh Jeezas teech wi: “Yu fi lov yu nayba jos laik how yu lov yuself.” (Machyu 22:39) “Kantinyu fi lov unu enimi dehn.”—Machyu 5:44-47.

 Weh Jeezas mi seh: “Mai Kingdom noh bilangz tu dis werl. If mai Kingdom da-mi paat a dis werl, den mai falowaz wuda mi fait fi mek dehn noh han mi oava.” (Jan 18:36) “Enibadi weh yooz wahn soad, wahn ded bai wahn soad.”—Machyu 26:47-52.

 Tink bowt dis: If Kristyanz neva fi fait, nat eevn fi protek Jeezas, yu tink dehn ku fait fi eni ada reezn? Fi si how faytful Kristyanz eena di paas mi kapi Jeezas egzampl ahn fala weh hihn mi teech, reed di aatikl weh naym “Is War Compatible With Christianity?”

Weh wahn hapm tu dehn rilijan weh sopoat waar?

 Di Baibl teech dat Gaad rijek eni rilijan weh klaym seh dehn reprizent Jeezas bot noh fala fi hihn teechin dehn.—Machyu 7:21-23; Taitos 1:16.

•   Di buk a Revilayshan shoa dat Gaad hoal dehndeh rilijan rispansabl fi “aala di peepl a di ert weh geh kil.” (Revilayshan 18:21, 24) If yu waahn laan di reezn wai, reed di aatikl weh naym “What Is Babylon the Great?”

•   Jeezas mi seh dat evri rilijan weh Jehoava rijek wahn geh dischrai fi aal di wikidnis weh dehn du, jos laik how wahn ratn chree weh bayr ratn froot wuda “geh chap dong ahn chroa eena di faiya.” (Machyu 7:15-20) Fi laan how dis wahn hapm, reed di aatikl weh naym “The End of False Religion Is Near!”

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images