Erli eena di maanin pahn Febiweri 24, 2022, Russia sen ih aami fi invayd Ukraine, eevn doa di werl leedaz fahn lata konchriz mi-di chrai stap dis fahn hapm. How dis afek di hoal werl? Kopl dayz agoa, di United Nations Sekriteri-Jeneral António Guterres mi seh: “Wi kyaahn eevn imajin di sofarin ahn dischrokshan weh dis wahn kaaz, di sayfti a di peepl a Europe an aal oava di werl deh eena daynja.”

•   Jeezas Krais mi seh dat wahn taim wahn kohn wen “di nayshan dehn wahn fait gens wan anada ahn di kingdom dehn wahn fait gens wan anada.” (Machyu 24:7) Fi si how di Baibl proov dat di waar dehn weh di hapm tudeh di kohn chroo egzakli how Jeezas mi seh mi wahn hapm, reed di aatikl “Wat Da di Sain a ‘di Laas Dayz,’ er ‘di Taim a di En’?”

•   Di buk a Revilayshan kompyaa waar tu sohnbadi weh di raid pahn wahn “brait red” haas ahn weh tek weh “pees fahn di ert.” (Revilayshan 6:4) Fi help yu si weh dis prafesi ga fi du wid waar weh di hapm tudeh, reed di aatikl “The Four Horsemen—Who Are They?”

•   Di buk a Daniel mi prafesai dat di “king a di naat”ahn di “king a di sowt” wahn fait gens wan anada. (Daniel 11:25-45) Wach di veedyo weh naym Prafesi Weh Don Kohn Chroo—Daniel Chapta 11 fi laan wai Russia ahn di konchriz weh sopoat dehn da di king a di naat. a

•   Di buk a Revilayshan aalso taak bowt “di waar a di grayt day a Gaad di Almaiti.” (Revilayshan 16:14, 16) Bot dis da noh wahn waar bitween di nayshan dehn laik weh wi di si rait now. Fi fain owt moa bowt da waar weh wahn hapm eena di fyoocha, reed di aatikl “What Is the Battle of Armageddon?”

•   Di Baibl pramis dat Gaad wahn put “wahn en tu aala di waar dehn eena di hoal ert.” (Psalm 46:9) Fi fain owt bowt di kaina fyoocha weh Gaad pramis, reed di aatikl “A Real Hope for a Better Tomorrow.”

•   Jeezas mi teech ih disaiplz fi pray fi mek Gaad Kingdom kohn. (Machyu 6:9, 10) Da Kingdom da wahn govament da hevn weh wahn mek Gaad wil tek plays pahn ert. Ahn paat a Gaad wil da fi mek di hoal ert ga pees. Fi laan how Gaad Kingdom ku benifit yoo, wach di veedyo weh naym Wat Da di Kingdom a Gaad?

 Moa dan 129,000 Jehoava Witnisiz liv da Ukraine. Jos laik di Witnisiz eena evri ada konchri, dehn fala Jeezas egzampl di noh tek paat eena palitiks ahn dehn noh fait eena waar. (Jan 18:36) Aal rong di werl, Jehoava Witnisiz kantinyu fi shayr di “gud nyooz bowt di Kingdom” ahn mek peepl noa dat dis da di onli way fi solv aala dehn prablemz, inkloodin waar. (Machyu 24:14) Wi invait yu fi kantak wi fi laan moa bowt di hoap weh di Baibl taak bowt.