Eena Joolai 2022, lata shootin mi hapm aal rong di werl:

•   Pahn Joolai 10, 2022, The Japan Times mi ripoat: “Japan moas faymos palitishan [Shinzo Abe, hoo yoostu bee wahn Praim Minista] mi geh merda. Di peepl a Japan mi beks ahn di res a di werl mi sopraiz bowt di nyooz, espeshali sins Japan noh ga lata vailent kraim ahn dehn ga sohn schrik laa fi kanchroal gonz.”

•   Pahn Joolai 4, 2022, Reuters mi ripoat: “Peepl da Denmark shak bikaaz wahn man kil chree peepl eena wahn shapin maal da Copenhagen.”

•   Pahn Joolai 10, 2022, The Guardian mi ripoat: “Da Soweto, South Africa, 15 peepl ded afta sohn man staat shoot op eena wahn baar.”

•   Pahn Joolai 5, 2022, CBS News mi ripoat: “Moa dan 220 peepl geh shat ahn ded oava di Joolai 4th haliday weeken da di United States.”

 Wi ga eni hoap dat dis kaina vailens wahn eva kohn tu wahn en? Weh di Baibl ga fi seh?

 Di Baibl kaal di taim weh wi di liv eena “di laas dayz,” an ih seh dat joorin dis taim peepl wahn ak meen, kruwil, ahn vailent. (2 Timoti 3:1, 3) Di vailens weh wi di si eena di werl tudeh mek peepl feel frayd. (Look 21:11) Bot di Baibl pramis wi dat wahn taim wahn kohn wen nohmoh vailens wahn deh, ahn “peepl wahn liv eena wahn peesful plays, eena sohn sayf hows an eena sohn kwaiyet plays.” (Isaiah 32:18) How vailens wahn kohn tu wahn en?

 Gaad wahn geh rid a wikid peepl ahn dischrai evri wepan.

•   “Az fi di wikid wan dehn, dehn wahn geh dischrai.”—Proverbs 2:22.

•   “[Gaad] di stap aal waar aal oava di ert. Hihn brok di boa an aro ahn brok op di spyaa eena peesiz; hihn bon op di waar chariyat dehn wid faiya.”—Psalm 46:9.

 Gaad wahn teech peepl fi ga pees wid wan anada, ahn da way deh vailens noh wahn egzis nohmoh.

•   “Dehn noh wahn du no haam ner kaaz no kaina prablem pahn fi mee hoali mongtin; bikaaz di ert wahn bee ful op a di nalij a Jehoava jos laik how di waata ful op di see.”—Isaiah 11:9.

•   Eevn now, Gaad di teech peepl aal rong di werl fi kip weh fahn vailens ahn wepanz, fi “ton dehn soad intu toolz fi plow di ert ahn dehn spyaa intu toolz fi chrim plaants.”—Micah 4:3.

 If yu waahn laan moa bowt weh di Baibl pramis wi bowt wahn werl widowt fyaa, reed di aatikl weh naym “Freedom From Fear—Is It Possible?”

 If yu waahn laan moa bowt how vailens wahn kohn tu wahn en, reed di aatikl weh naym “Peace on Earth at Last!”