KIP PAHN DI LUKOWT!
Skool Shoot-Owt—Weh di Baibl Ga fi Seh?
Pahn May 24, 2022, sohnting terabl mi hapm eena wahn smaal tong weh naym Uvalde, da Texas, U.S.A. The New York Times seh dat “wahn gonman kil 19 pikni ahn too teechaz . . . da Robb Elementary School.”
Sad fi seh, bad tingz laik dehnya hapm wahn lat. USA Today ripoat dat jos eena di United States, “laas yaa dehn mi ga moa shootin dan eni ada yaa sins 1970—249 shootin mi hapm da difrent skool.”
Wai dehnya terabl tingz hapm? Wehpaat wi ku fain komfert wen dehnya wikid tingz hapm? Vailens wahn eva kohn tu wahn en? Di Baibl ga di ansaz.
Wai di vailens eena di werl kip di geh wosa ahn wosa?
Di Baibl kaal di taim weh wee di liv eena “di laas dayz” an ih aalso seh dat nowadayz peepl “noh wahn ga no afekshan” ahn “dehn wahn bihayv laik wail animal.” Dis meen dat dehn wahn ak eena wahn kruwil way ahn du harabl tingz. Peepl weh bihayv laik dis “wahn goh fahn bad tu wers.” (2 Timoti 3:1-5, 13) Reed di aatikl weh naym “Did the Bible Predict the Way People Think and Act Today?” fi laan moa bowt dis tapik.
Wahn lata peepl wanda, “Wai Gaad noh stap bad tingz laik wahn skool shoot-owt fahn hapm? Fain owt weh di Baibl ga fi seh eena di aatikl weh naym “Bad Things Happen to Good People—Why?”
Wehpaat wi ku fain komfert wen wikid tingz hapm?
“Evriting weh mi geh rait dong fahn way bak mi geh rait dong fi teech wi ahn gi wi hoap, bikaaz di Skripchaz gi wi komfert.”—Roamanz 15:4.
Di Baibl help wi fi deel wid dis werl weh ful op a vailens. Reed di Awake! weh naym “Will Violence Ever End?” fi moa infamayshan.
Payrents ku fain sohn gud sojeshan pahn how fi help dehn pikni koap wen dehn feel fraitn bowt di tingz weh dehn si er hyaa pahn di nyooz, eena di aatikl “Disturbing News Reports and Your Children.”
Vailens wahn eva kohn tu wahn en?
“Hihn wahn reskyu dehn fahn injostis ahn vailens.”—Psalm 72:14.
“Dehn wahn ton dehn soad intu toolz fi plow di ert ahn dehn spyaa intu toolz fi chrim plaants. Nayshan noh wahn pik op soad gens ada nayshan, ahn dehn noh wahn laan bowt waar nohmoh.”—Micah 4:3.
Gaad ga di powa fi du tingz weh peepl kyaahn du. Fi hihn hevnli govament wahn geh rid a vailens an dischrai eni kaina wepan. Reed di aatikl “Anda di Kingdom a Gaad ‘Pees Wahn Deh Evriway’” fi laan moa bowt weh Gaad Kingdom, er govament, wahn du.