KIP PAHN DI LUKOWT!
Food Shaatij Rong di Werl di Geh Wers Bikaaz a Waar ahn Daynjaros Chaynjiz Eena di Weda—Weh di Baibl Ga fi Seh?
Sayka daynjaros chaynjiz eena di weda rong di werl lang wid di waar da Ukraine, lata konchriz di ga prablemz fi geh di food weh deh naamali geh fahn ada konchriz. Ih eevn haada fi di poa konchri dehn, bikaaz peepl eena dehndeh konchri don fain it haad fi geh food.
“Waar, chaynjiz eena di weda, di prais a gyas, an ada tingz di mek it haad fi projoos food ahn fi mek peepl get it.”—António Guterres, UN secretary-general, Joolai 17, 2023.
“Russia mi kom owta di agreement fi help Ukraine fi mek shoar dat di food weh dehn di sen owt tu ada konchriz reech sayf. Soh, sohn eksperts bileev dat dis wahn mek food shaatij rong di werl eevn wers. Food wahn geh moa ekspensiv fi konchriz weh poa, espeshali fi konchriz eena North Africa ahn di Middle East.”—Atalayar.com, Joolai 23, 2023.
Mek wi luk pahn weh di Baibl seh bowt di food shaatij weh di hapm rong di werl ahn bowt di fyoocha.
Di Baibl mi prafesai dat wi wahn ga food shaatij
Jeezas mi prafesai dat: “Di nayshan dehn wahn fait gens wan anada ahn di kingdom dehn wahn fait gens wan anada, ahn dehn wahn ga famin.”—Machyu 24:7.
Di buk a Revilayshan tel wi bowt foa man weh di raid foa haas. Wan a di man weh di raid wan a di haas reprizent waar. Ahn di neks raida weh di fala ahn reprizent famin. Dis prafesi di taak bowt wahn taim wen food wahn skyaas ahn kaas wahn lata moni. “Ah si wahn blak haas! Di persn weh mi-di raid ahn mi ga wan a dehn balans skayl, weh dehn yooz fi way tingz pan, eena ih han. Ah yehr wahn song laik wahn vais . . . Di vais seh, ‘Ih wahn tek wan day pay fi bai jos wan kwaat a weet; ahn da sayhn moni deh ku bai chree kwaat a baali.’”—Revilayshan 6:5, 6, Di Nyoo Testiment eena Bileez Kriol.
Dehnya Baibl prafesi bowt food shaatij di kohn chroo tudeh day, joorin di taim weh di Baibl kaal “di laas dayz.” (2 Timoti 3:1) Fi laan moa bowt “di laas dayz” ahn fi fain owt moa bowt di foa man weh di raid di foa haas weh Revilayshan taak bowt, wach di veedyo weh naym The World Has Changed Since 1914 ahn reed di aatikl weh naym “The Four Horsemen—Who Are They?”
How di Baibl ku help wi
Di Baibl ga lata gud advais weh ku help wi deel wid haad taimz. Fi egzampl, ih ku help wi deel wid di hai kaas a food an eevn food shaatij. Yu ku fain sohn egzampl eena di aatikl weh naym “How fi Liv Pahn Les Moni.”
Di Baibl aalso gi wi hoap dat tingz wahn geh beta. Ih pramis dat wahn taim wahn kohn wen “dehn wahn ga lata grayn pahn di ert” an evribadi wahn ga lata food fi eet. (Psalm 72:16) Fi laan moa bowt di hoap fi di fyoocha ahn wai wi ku chros dat weh di Baibl seh wahn kohn chroo, reed di aatikl weh naym “A Real Hope for a Better Tomorrow.”