•   Pahn Septemba 7, 2022, The Guardian mi seh: “China ripoat dat dis soma mi hata dan eva bifoa ahn da mi di terd jraiyis soma pahn rekad.”

•   Pahn Aagas 26, 2022, UN News mi ripoat: “Dis da di fif yaa weh paats a Africa wahn sofa bikaaz waata di geh skyaas.”

•   Pahn Aagas 23, 2022, BBC News mi seh: “Moa dan haaf a Europe eena daynja bikaaz di weda soh jrai dat dehn noh wahn ga inof waata. Dis wahn praabli bee di wers jrowt eena 500 yaaz.”

 Lata ekspert seh dat dehnya kaina weda kandishan wahn kantinyu an ih wahn eevn geh wers. Yu tink wi ga eni hoap fi wahn beta fyoocha? Mek wi si weh di Baibl seh bowt dis.

 Di Baibl prafesai dat eena fi wee taim:

•   “Food shaatij . . . wahn deh aal oava di plays.”—Look 21:11.

 Lata taim jrowt kaaz food shaatij. Dehndeh food shaatij, ahn di sofarin ahn det weh dehn kaaz, da paat a weh di Baibl prafesai fi di laas dayz.—Revilayshan 6:6, 8.

 Di Baibl tel wi wai wi di ga moa ahn moa jrowt. Ih seh:

•   “Ih noh eevn bilangz tu wahn man weh di waak fi seh how fi tek di neks step.”—Jeremiah 10:23.

 Dat meenz dat peepl kyaahn eevn seh “how fi tek di neks step,” er rool dehnself eena di rait way. Dehn mek bad disizhanz, ahn lata taim dehn en op di du tingz weh mek waata geh skyaas.

•   Moas saiyentis agree dat di weda di geh hata bikaaz a di tingz weh peepl du tu di ert, ahn sayka dat ih di kaaz jrowt aal oava di werl.

•   Peepl greedi ahn dehn mek disizhanz widowt tink bowt di fyoocha, soh dehn chap dong faris, dehn kaaz polooshan, ahn dehn noh yooz di tingz pahn di ert eena di rait way. Sayka dat, wi di ron owta kleen waata.

 Bot di Baibl gi wi hoap.

 Eena di Baibl, Gaad pramis wi dat hihn wahn fiks di waata shaatij weh wi ga rait now. How hihn wahn du dat?

1.  1. Gaad wahn “dischrai di wan dehn weh di rooin di ert.” (Revilayshan 11:18) Hihn wahn geh rid a wan a di reezn wai waata di geh skyaas—di wikid ahn greedi peepl weh di damij di ert.—2 Timoti 3:1, 2.

2.  2. “Di jrai grong wahn ton intu wahn pool a waata wid plaants di groa eena it.” (Isaiah 35:1, 6, 7) Gaad wahn fiks aala di damij weh jrai weda kaaz ahn ton di ert intu wahn paradais weh ga plenti waata.

3.  3. “Yoo tek kyaa a di ert. Yu mek di grong veri gud ahn yu mek ih projoos lata food.” (Psalms 65:9) Wid Gaad help, di ert wahn ga plenti gud food ahn kleen waata fi evribadi.