Aal rong di werl, lata konchri divaid op bikaaz a palitiks. Akaadn tu wahn servay weh di Pew Research Center du eena 2022, “65% a di adolts eena 19 konchriz weh tek paat eena di servay seh dat peepl eena fi dehn konchri noh gree wid wan anada bikaaz dehn sopoat difrent politikal paati.”

 Yoo noatis how palitiks di divaid op peepl moa ahn moa eena di ayrya weh yoo liv? Wai dis di hapm? How fi solv dis prablem? Mek wi luk pahn weh di Baibl seh.

 Di Baibl mi seh dat eena fi wee taim, weh ih kaal “di laas dayz,” di way peepl bihayv mi wahn mek it haad fi mek wi bee yoonaitid.

•   “Di laas dayz wahn bee daynjaros ahn laif wahn bee haad, bikaaz peepl wahn lov dehnself . . . . Dehn noh wahn bee wilin fi get lang wid wan anada.”—2 Timoti 3:1-3.

 Di govament dehn stil kyaahn werk tugeda fi fiks aala di prablemz, noh mata how haad peepl werk fi mek dat hapm, bikaaz peepl noh gree wid eech ada. Dis shoa wi dat weh di Baibl mi seh wahn lang taim agoa di kohn chroo.

•   “Man rool oava man an onli kaaz payn.”—Ecclesiastes 8:9.

 Di Baibl tel wi how dis prablem wahn geh fiks. Gaad wahn set op wahn govament, ahn di persn weh wahn rool eena dis govament wahn geh rid a aal di prablemz weh wi fays tudeh.

 Di Baibl tel wi dat Jeezas Krais kwalifai fi bee di leeda. Onli hihn ga di powa, di atariti, ahn di dizaiya fi bring pees ahn yooniti fi evribadi pahn di ert.

•   “Joorin fi hihn dayz di raichos wahn praspa, ahn pees wahn deh evriway.”—Psalm 72:7.

•   “Aala di nayshan dehn wahn serv hihn.”—Psalm 72:11.

 Jeezas da di bes leeda bikaaz hihn kay bowt peepl an ih waahn help dehn, espeshali dehn wan weh adaz luk dong pan er noh chreet fyaa.

•   “Hihn wahn sayv poa peepl weh di krai fi help, hombl peepl, ahn peepl weh noh ga nobadi fi help dehn. Hihn wahn ga piti pahn di hombl ahn di poa wan dehn, ahn hihn wahn sayv di poa wan dehn. Hihn wahn reskyu dehn fahn injostis ahn vailens.”—Psalm 72:12-14.

 Laan moa bowt Gaad Kingdom. Jeezas da di roola a dis govament weh di rool fahn hevn. Fain owt moa bowt how yoo ku benifit fahn dis govament ahn how yoo ku sopoat it.

•   Wach di veedyo weh naym Wat Da di Kingdom a Gaad?

•   Reed di aatikl weh naym “God’s Kingdom—A Government With No Corruption.”