Rong di werl, peepl di deel wid sohn reeli hat weda weh dehn neva ekspeeryens bifoa. Di weda soh hat dat ih eevn kaaz sohn nachral dizaasta. Mek wi luk pahn weh sohn ripoat seh:

•   “Fi 174 yaaz now, peepl di rikaad di tempricha rong di werl ahn dis yaa Joon, dehn seh dat da-mi di hatis mont eva.”—National Oceanic and Atmospheric Administration, U.S. Department of Commerce, Joolai 13, 2023.

•   “Italy, Spain, France, Germany ahn Poland dehn di goh chroo wahn bad heet wayv. Ahn dehn di ekspek dat di tempricha gwehn op tu 118°F [48°C] pahn di ailan dehn da Sicily ahn Sardinia. Dis kud bee di hatis tempricha weh dehn eva rikaad eena Europe.”—European Space Agency, Joolai 13, 2023.

•   “Az di ert di geh hata ahn hata, wi ekspek wahn lat moa rayn, ahn dis wahn kaaz wahn lat moa daynjaros flod.”—Stefan Uhlenbrook, dairekta a hydrology, water ahn cryosphere da di World Meteorological Organization, Joolai 17, 2023.

 Sins wi di hyaa moa ahn moa ripoat bowt dehnya daynjaros weda, yu tink da sohnting weh yu need fi wori bowt? Mek wi si weh di Baibl ga fi seh bowt dis impoatant tapik.

 Yes. Di heet wayv dehn ahn di ada daynjaros weda weh wi si di hapm rong di werl di mach op wid weh di Baibl seh mi wahn hapm eena fi wee taim. Fi egzampl, Jeezas mi seh dat “peepl wahn si tingz weh wahn mek dehn geh frayd.” (Look 21:11) Peepl wori dat az di ert geh hata ahn hata, nobadi wahn ku liv pahn di ert.

 No. Gaad mi mek di ert soh dat peepl ku liv pan it fareva; soh ih noh wahn mek hyoomanz dischrai it. (Psalm 115:16; Ecclesiastes 1:4) Az a mata a fak, Gaad pramis dat ih wahn “dischrai di wan dehn weh di rooin di ert.”—Revilayshan 11:18.

 Di Baibl shoa dat Gaad noh onli ga di powa fi protek di ert, bot ih aalso waahn protek it. Soh ih noh wahn mek notn dischrai it.

•   “[Gaad] kaam dong di schrang breez, ahn hihn kwaiyet dong di wayvz eena di see.” (Psalm 107:29) Gaad ga di powa fi kanchroal evriting eena naycha, soh wi ku bee shoar dat hihn wahn fiks aala di prablemz weh wi di goh chroo rait now weh di kaaz dehnya daynjaros weda.

•   “Yu tek kayr a di ert; yu mek di lan gud soh dat ih projoos lata food.” (Psalm 65:9) Gaad wahn bles di ert ahn hihn wahn mek ih bee wahn paradais.

 Fi laan moa bowt weh di Baibl seh bowt how Gaad wahn fiks di ert, si di aatikl weh naym “Who Will Save the Earth?”