KIP PAHN DI LUKOWT!
Aal Rong di Werl di Weda Di Geh Hata Dan Naamal—Weh di Baibl Ga fi Seh?
Joorin Joolai 2022, lata plays rong di werl ripoat dat di weda hata dan eva bifoa:
Pahn Joolai 25, 2022, di CNN Wire Service seh: “Fi di sekant taim dis mont, ofishalz da China ripoat di haiyis heet alert ahn waan peepl dat di weda eena bowt 70 siti wahn bee soh hat dat peepl wahn deh eena daynja.”
Pahn Joolai 17, 2022, The Guardian seh: “Lata bush faiya di bon aal oava Europe bikaaz di weda soh hat.”
Pahn Joolai 24, 2022, The New York Times seh: “Pahn Sondeh, wahn lata siti eena di United States sofa weda weh hata dan eva bifoa az wahn heet wayv spred aal op ahn dong di ees said a di United States.”
Weh aala dis meen? Tingz wahn geh soh bad dat notn wahn ku liv pahn ert agen? Weh di Baibl ga fi seh?
Di Baibl prafesai eniting bowt heet wayv?
Yes. Di Baibl prafesai dat tingz laik heet wayv mi wahn hapm eena fi wee taim. Fi egzampl, Jeezas mi seh dat wi wuda si “tingz weh wahn mek [peepl] geh frayd,” er “aal kaina fraitnin tingz.” (Look 21:11; Di Nyoo Testiment eena Bileez Kriol) Sayka weh di weda di geh soh hat, lata peepl frayd dat hyoomanz di du tingz weh wahn mek it impasabl fi kantinyu liv pahn ert.
Dat meenz tingz wahn geh soh bad dat nobadi ahn notn wahn ku liv pahn ert?
No. Gaad mi mek di ert fi mek peepl liv pan fareva. (Psalms 115:16; Ecclesiastes 1:4) Hihn noh wahn alow peepl fi dischrai di ert. Insteda dat, ih pramis fi “dischrai di wan dehn weh di rooin di ert,” ahn dat da egzakli weh ih wahn du.—Revilayshan 11:18.
Mek wi luk pahn jos too prafesi weh shoa wat els Gaad pramis:
“Di wildanes ahn di jrai lan wahn rijais, ahn di dezert wahn bee ful a jai an ih wahn blaasam laik di safron.” (Isaiah 35:1) Gaad noh wahn alow di ert fi en op laik wahn dezert wehpaat notn ku liv. Insted, hihn wahn fiks aala di damij weh don hapm tu di ert.
“Yu tek kayr a di ert; yu mek di lan gud soh dat ih projoos lata food.” (Psalm 65:9) Wid Gaad blesin, di ert wahn bee wahn byootiful paradais.
If yu waahn laan moa bowt weh di Baibl prafesai bowt how di weda di chaynj, reed di aatikl weh naym “Climate Change and Our Future—What the Bible Says.”
If yu waahn laan moa bowt weh di Baibl pramis bowt how aala di damij tu di ert wahn geh fiks, reed di aatikl weh naym “Who Will Save the Earth?”