Pahn May 31, 2018, di Sopreem Koat a Canada mi hyaa di kays a Highwood Congregation of Jehovah’s Witnesses (Judicial Committee) v. Wall. Di koat mi disaid dat “aal rilijos groop free fi mek dehn oan roolz ahn disaid hoo ku bee wahn memba a dehn rilijan,” soh di koat kyaahn intafyaa wid di araynjment fi disfeloship wahn memba a di kangrigayshan.

Fi kloaz di kays, di koat seh dat di Witnisiz araynjment fi disiplin sohnbadi weh komit wahn seeryos sin “da noh fi ponish di persn, bot da fi help di memba weh sin fi kom bak tu di kangrigayshan,” ahn soh di koat disaid dat dehn kyaahn intafyaa wid rilijos mataz laik dat.

Wen dehn mi-di eksplayn wai dehn mek da disizhan, Sopreem Koat Joj, Jostis Malcolm Rowe, weh mi taak fi di ada ayt joj, seh: “Di roolz weh wahn rilijos groop ga yoozhwali bays pahn weh dehn bileev, jos laik eena dis kays. Di koat dehn noh ga no atariti, nalij, ner powa fi mek eni disizhan bowt eni rilijos bileef er teechin.”

Philip Brumley, wahn laaya fi Jehoava Witnisiz, seh: “Di Sopreem Koat a Canada mek di saym disizhan az sohn ada hai koat da Argentina, Brazil, Hungary, Ireland, Italy, Peru, Poland, ahn United States, hoo rekonaiz dat wi ga di leegal rait fi yooz di Baibl fi disaid hoo ku kwalifai fi bee wan a Jehoava Witnisiz.”—1 Korintyanz 5:11; 2 Jan 9-11.