Brada Jean-Yves an ih waif, Vasthie Mudaheranwa, di help peepl weh ga coronavirus da Montreal, Canada. Brada Mudaheranwa da wahn dakta weh werk da wahn haaspital eena di ayrya weh dehn liv, ahn Sista Mudaheranwa da wahn ners weh werk da wahn speshal haaspital fi peepl weh ga coronavirus. Joorin dis taim wen peepl schres owt ahn di wori, di too a dehn di pen pahn Jehoava fi gi dehn schrent, ahn dehn di benifit fahn Jehoava pramis a wahn “gud kandishan a di haat.”—Isaiah 65:14.

Brada Mudaheranwa seh dat wahn lata di peepl weh ih werk wid frayd bad, ahn hihn neva si dehn laik dat bifoa. Ahn Sista Mudaheranwa seh dat persnal stodi help shee wahn lat. Shee aalso seh dat dehn tink bowt di sainz a di laas dayz ahn rimain dehnself dat Jehoava deh wid dehn, an ih noh wahn let dehn dong. Pahn tap a dat, shee seh pryaa veri impoatant. Bifoa ih goh da werk, ih pray an ih ga pees.

Brada Mudaheranwa seh: “Ai da fahn Rwanda, an Ai mi liv chroo wahn taim wen dehn onli mi-di merda peepl fahn wahn sertn rays.” Hihn kantinyu fi seh: “Da Canada, wee neva yet ekspeeryens eniting laik dat, soh sohntaim ih eezi fi ferget dat wi di liv eena di laas dayz. An Ah haftu bee aanis, eevn Ai neva aalwayz tink dat di day a Jehoava mi deh kloas. Soh dis dizeez mek Ai noa fi shoar dat Ai di liv eena di laas dayz, an ih schrentn mi fayt eena di Baibl ahn Baibl prafesi.”

Jehoava peepl rong di werl ga di saym schrang fayt weh Brada ahn Sista Mudaheranwa gat, an aala dehn kantinyu fi ga pees joorin dis haad taim.—Isaiah 48:18.