JANIWERI 22, 2018
ISRAEL
Wahn Display da Tel Aviv Weh Shoa Weh Jehoava Witnisiz Mi Gaahn Chroo Joorin di Rool a di Nazi Govament
TEL AVIV—Fahn Novemba 26 tu Disemba 2, 2017, bowt 1,700 peepl mi vizit di display weh Jehoava Witnisiz dehn mi set op da Hatachana. Dehn mi mek dis display fi mek peepl noa bowt di persikyooshan weh Jehoava Witnisiz mi gaahn chroo joorin di rool a di Nazi govament da Germany.
Wi mi shoa sohn veedyo ahn sohn oal pichaz. Wahn Witnis hoo mi servaiv da taim mi mek wahn yoonifaam jakit weh da jos laik di wan dehn weh dehn mi wayr da di kansenchrayshan kyamp. Di mayn paat a di display da-mi “The Buchenwald Series”—27 payntin bai Johannes Steyer (1908-1998). Mr. Steyer da-mi wan a Jehoava Witnisiz hoo mi servaiv ten yaaz a Nazi persikyooshan. Hihn da-mi wahn prizna da di Buchenwald, Mauthausen, Sachsenburg, ahn Sachsenhausen kansenchrayshan kyamp dehn. Hihn mi bays dehnya payntin pahn pichaz ahn fi hihn oan memriz a weh ih mi gaan chroo wen ih mi deh eena di kansenchrayshan kyamp dehn. Hihn mi finish aala di payntin dehn joorin di 1970’s.
Peepl weh di vizit luk pahn wahn yoonifaam jakit weh wahn Witnis weh mi servaiv da taim mek. Di yoonifaam jakit da wan laik weh dehn yoostu wayr da di kansenchrayshan kyamp dehn.
Yair Auron, wahn Profesa weh don ritaiya
Yair Auron seh dat ih impoatant fi ga dehnya kaina shoa da Tel Aviv. Hihn da wahn profesa fahn Israel hoo yoostu teech hischri da wahn yooniversiti. Ih seh: “Ai feel dat ih reeli impoatant dat di yong peepl weh di goh da hai skool vizit dis display, bikaaz dehn noh noa wahn lata infamayshan bowt Jehoava Witnisiz. Moas a di peepl da Israel noh noa notn bowt Jehoava Witnisiz ahn di tingz weh dehn mi gaahn chroo joorin di taim wen di Nazi dehn mi-di rool.”
Mauro Trapanese, wahn man weh reprizent Jehoava Witnisiz da Israel, eksplayn: “Wi mi waahn di display noh onli teech peepl bowt di sofarin weh Jehoava Witnisiz mi gaahn chroo anda di rool a di Nazi govament, bot aalso fi shoa wai fi wee ekspeeryens mi difrent fahn adaz weh di Nazi dehn mi persikyoot. Fi egzampl, wi mi fain owt dat wahn lata dehn wan weh mi vizit di display neva noa dat Jehoava Witnisiz mi geh di apachooniti fi geh rilees fahn di kansenchrayshan kyamp. Dehn mi onli need fi sain wahn paypa weh seh dat dehn da neva wahn Witnis agen. Soh bikaaz wi mek peepl noa bowt dehnya deetaylz, di display da-mi wahn sokses.”
Profesa Gideon Greif
Profesa Gideon Greif, wahn man weh noa wahn lat bowt di hischri a Auschwitz mi seh, “Jehoava Witnisiz da-mi gud ahn deesent peepl hoo mi pay wahn hai prais fi weh dehn mi laayal tu dehn bileef ahn dehn kanshans.”
Dr. Batya Brutin
Wen Dr. Batya Brutin, wahn persn weh stodi art fahn di taim wen di Nazi govament mi-di persikyoot peepl mi seh afta ih finish ih vizit: “Ah tink dat wen peepl laan bowt di ekspeeryens weh Jehoava Witnisiz mi gaahn chroo joorin di rool a di Nazi govament, ih ku bring owt di kaina atichood weh wi need fi help mek dis werl wahn beta plays.”
Eevn doa dehn mi put op di display fi jos wahn lee wail, peepl weh mi gaahn si di display ahn hoo reprizent difrent yooniversiti aks fi moa infamayshan bowt di ekspeeryens a Jehoava Witnisiz.
Fi moa infamayshan kantak:
Intanashanal: David A. Semonian, Office of Public Information, +1-845-524-3000
Israel: Mauro Trapanese, +972-54-568-1912