ROME—Pahn Fraideh, Novemba 24, 2017, difrent peepl eena di medikal feel mi meet tugeda da di Yooniversiti a Padua, wan a di oaldis yooniversiti da Italy, fi wahn impoatant meetin weh naym “The Refusal of Blood Transfusion by Adult Patients: What Are the Treatment Options?—Blood Save 2017.” Tweni-faiv difrent saiyens aaganaizayshan ahn di Minischri a Helt da Italy mi giv moni fi mek dis meetin pasabl.

Fi yaaz, lata peepl tink dat blod chransfyoozhan noh hert peepl ahn dat dat da di onli opshan weh ku sayv di laif a sombadi weh di goh chroo wahn seeryos serjri. Wahn lata peepl weh mi giv speech da di meetin mi shoa dat dis bileef rang. Wahn dakta weh naym Luca P. Weltert, fahn di European Haaspital da Rome hoo du haat serjri, mi eksplayn: “Tudeh wi mi si dat blod chransfyoozhan ku kaaz damij tu wahn persn ahn lata taim, dehn noh eevn need it.”

Bikaaz a dehn risaach an ekspeeryens, Dakta Weltert ahn sohn ada dakta pahn di proagram mi agree dat risaach shoa dat blod chransfyoozhan kaaz wahn lat moa det ahn siknis, mek peepl stay langa eena di haaspital, ahn kaaz wahn lata ada seeryos helt prablemz fi di payshent. *

Eena 2010, dehnya evidens, lang wid di hai prais weh ih kaas fi du wahn blod chransfyoozhan, mi mek di World Health Organization (WHO) kom op wid wahn kaina helt kayr weh inklood aal di difrent medikal feel ahn weh foakos pahn di helt ahn sayfti a di payshent, di rizolt a serjri, ahn di yoos a les blod chransfyoozhanz. Dehn kaal dis “payshent blod manijment” (PBM). Di WHO mi rait op wahn ripoat an inkorij aal 193 membaz a di United Nations fi yooz di PBM proagram.

Profesa Stefania Vaglio, di cheef a chransfyoozhan medisn da di Sant’Andrea Yooniversiti Haaspital da Rome, mi diskos di nyoo PBM proagram, ahn ih mi seh dat dehn mi yoostu aalwayz dipen pahn blod chransfyoozhan fi chreet payshents, bot now “di foakos kompleetli swich fahn di blod weh peepl doanayt tu di payshent oan blod.” Wan a di goal a PBM da “fi put di payshent da di senta a di proseeja soh dat dehn noh looz tu moch blod, . . . ahn foakos dehn atenshan ahn du aal weh dehn kud fi sayv di payshent blod.” Profesa Vaglio aalso seh dat if daktaz yooz wahn medikal proseeja fi sayv wahn payshent oan blod, ih “wahn mek dehn gi beta kwaliti chreetment.”

Dakta Tommaso Campagnaro, wahn jenaral serjan da di Verona Yooniversiti Haaspital, mi seh dat yu ga lata benifit wen yu chrai ahn stay weh fahn blod chransfyoozhan. Afta dehn mi gaahn oava sohn infamayshan weh goh way bak tu di layt 1990s weh ga fi du wid sohn payshent weh mi gaahn chroo seeryos serjri pahn dehn beli, hihn mi seh: “Di payshent dehn weh neva geh wahn blod chransfyoozhan mi ga les prablem ahn les a dehn mi ded dan di wan dehn weh mi geh wahn blod chransfyoozhan.”

Dakta Campagnaro, lang wid lata di ada peepl hoo mi giv wahn speech da di meetin, mi tank Jehoava Witnisiz fi help di dakta dehn fi kom op wid sohn ada opshan ada dan blod chransfyoozhan. Anna Aprile, wahn asoasiayt profesa a medikal laa da di Yooniversiti a Padua, mi seh: “Wi tank Jehoava Witnisiz, hoo mi bring op dis ishu bowt di rait fi rifyooz wahn blod chransfyoozhan. Dis mi help evribadi fi tink bowt dis ishu ahn fi kom op wid wayz fi yooz les blod.”

Di dakta dehn weh mi gi wahn speech da di meetin kohn fahn lata difrent medikal bakgrong. Bot, di mesij da mi-di saym: wen wi si di lata infamayshan ahn ekspeeryens fahn som a di bes dakta dehn, den di medikal aaganaizayshan dehn, di wan dehn weh mek di laa dehn, ahn di poblik shuda bee wilin fi aksep di PBM proagram.

Dakta Weltert seh: “Wan a di bigis serjri weh yu kuda eva du pahn di hyooman badi da wahn serjri wehpaat yu hafu fiks wahn valv eena di haat. Dis da wan a di laytes medikal proseeja. . . . If yu ku du dis widowt yooz blod, den reeli yu ku du eniting.”