Pahn Aypril 2, 2018, Kazakhstan Prezident Nursultan Nazarbayev mi mek dehn rilees 61-yaa-oal Teymur Akhmedov, hoo mi deh eena prizn fi oava wahn yaa fi wahn kraim weh ih neva komit. Bikaaz di prezident paadn ahn fi di kraim, ih ga wahn kleen kriminal rekad. Mr. Akhmedov mi hyaa dat di prezident mi wahn rilees ahn pahn Aypril 4, ahn dehn stap hoal ahn az wahn prizna wail ih mi deh eena di haaspital di geh beta afta wahn serjri. Now ih deh wid ih famili agen ahn ih ku geh di medikal chreetment weh ih need fi fait kyansa.

Dehn mi ares Mr. Akhmedov, hoo da wan a Jehoava Witnisiz, pahn Janiweri 18, 2017, jos bikaaz ih mi-di shayr ih bileef wid ada peepl. Fi wahn kopl monts bifoa dehn mi ares ahn, hihn mi diskos di Baibl wid sohn man weh mi-di priten fi bee inchrestid eena weh Jehoava Witnisiz bileev. Di man dehn mi-di werk fi di seekrit polees da Kazakhstan, di Nashanal Sikyoariti Komiti (KNB), ahn dehn mi-di rikaad evriting weh dehn diskos wid Mr. Akhmedov widowt hihn noa. Bays pahn dehndeh rikaadn, di KNB mi ares Mr. Akhmedov ahn dehn akyooz ahn a “di staat op rilijos kanflik” ahn dehn klaym seh dat hihn di tel peepl dat “[fi hihn] rilijan . . . beta dan evribadi els wan,” wich da wahn kraim anda Aatikl 174(2) a di Kriminal Koad da Kazakhstan.

Afta dehn mi ares ahn, di polees dehn aks Mr. Akhmedov wahn lata kweschan ahn dehn lak ahn op fi chree monts bifoa ih koat dayt. Pahn May 2, 2017, di koat sentens ahn tu faiv yaaz eena prizn an dehn tel ahn dat ih kyaahn du notn rilijos fi wahn ekschra 3 moa yaaz afta dat.

Mr. Akhmedov’s laaya dehn mi mek lata difrent apeel fi mek dehn rilees ahn, bot di koat rijek aala dehn. Wans dehn mi du evriting weh dehn kuda mi du akaadn tu di laa da Kazakhstan, hihn mi chrai geh help fahn di intanashanal koat dehn. Hihn mi rait letaz di komplayn tu di UN Working Group on Arbitrary Detention (WGAD) ahn di UN Human Rights Committee.

Eena Aktoaba 2017, di WGAD mi kandem Kazakhstan bikaaz a weh dehn put Mr. Akhmedov eena prizn, ahn dehn tel di govament dat dehn shuda rilees ahn rait away, sins weh hihn mi-di du “da-mi sohnting weh mi peesful ahn hihn mi gat di rait fi praktis ih rilijan.” Eena Janiweri 2018, di Human Rights Committee mi aksep Mr. Akhmedov’s leta dehn, ahn dehn tel Kazakhstan fi mek shoar ih geh gud medikal chreetment wail ih di wayt fi dehn mek wahn disizhan. Di Human Rights Committee mi aalso tel Kazakhstan fi kansida rilees ahn fahn prizn wail dehn di wayt fi hyaa di fainal disizhan bays pan di leta weh hihn mi rait ahn sen.

Wail Mr. Akhmedov mi deh da prizn, ih helt mi-di geh wos ahn wos. Erliya dis yaa, di dakta dehn tel ahn dat ih ga koalan kyansa ahn dat ih helt di geh wos. Sayka weh di Human Rights Committee mi disaid dat Mr. Akhmedov shuda geh medikal chreetment wail ih stil deh eena prizn di wayt fi hyaa weh di koat dehn disaid, Kazakhstan ofishal dehn tel Mr. Akhmedov dat ih ku rait wahn leta tu Prezident Nazarbayev ahn aks ahn fi mek hihn paadn ahn an rilees ahn fahn prizn.

Hihn mi sen een ih leta pahn Maach 5, 2018, and ih aks fi mek dehn pleez luk pan it az soon az dehn kud bikaa hihn mi need fi geh chreetment rait away fi stap di kyansa fahn spred. Meenwail, sohn prizn ofishal mi sen Mr. Akhmedov da Almaty, Kazakhstan, wehpaat dehn mi du wahn serjri pan ahn pahn Maach 27, 2018.

Mr. Akhmedov an ih waif, Mafiza, an dehn pikni hapi dat hihn geh rilees. Dehn tankful dat Prezident Nazarbayev mi klayr Mr. Akhmedov kriminal rekad. Bikaaz a weh dehn mi sen ahn da prizn fi sohnting weh ih neva du, di govament mi freez ih bank akonk, ahn dat mi mek laif haad fi ih waif joorin di taim wen hihn mi deh da jayl.

Jehoava Witnisiz rong di werl hoap dat sayka weh mi hapm wid Mr. Akhmedov, di Stayt ofishal dehn da Kazakhstan wahn alow di Witnisiz fi ga moa freedom fi praktis dehn peesful wership an dat dehn noh wahn chrai stap dehn.