Di European Union ahn di United States mi mek separayt koments di ekspres dehn kansaan bowt how di Russian govament noh di chreet Jehoava Witnisiz eena di rait way. Di koments shoa how Russia mi-di lai wen dehn mi seh dat di ban pahn di leegal aaganaizayshan a Jehoava Witnisiz neva mi wahn afek di freedom a wership a di Witnis dehn. Di European Union seh dat “di tingz weh dehn [di Russian govament] di du now, di goh gens weh dehn mi pramis.” Di United States seh dat wen dehn kompyaa weh Russia mi seh bifoa, tu how dehn di chreet di Witnisiz now, “dehn di du di kompleet opozit.”

Di Russian atariti dehn mi put ayt man weh da Witnis eena prizn, ahn rait now dehn di ga 12 kriminal investigayshan eena 11 difrent siti. Wail wi reeli di wori bowt how dehn di tek moa ahn moa a di prapati dehn, wi mayn kansaan da di sofarin a wi Kristyan bradaz ahn sistaz weh di goh chroo persikyooshan fi dehn fayt.

Di European Union ahn di United States di tel di Russian govament fi mek dehn rispek dehn pramis fi alow peepl freedom fi tink, bileev, ahn wership how dehn waahn.

Yu ku fain di koment dehn da dehnya link:

https://www.osce.org/permanent-council/381820

https://www.osce.org/permanent-council/381823