Oava di paas mont, di Russian atariti dehn di du wahn kampayn weh dehn ares moa Jehoava Witnisiz ahn put dehn eena jayl bikaaz a dehn fayt. Dehn klaym seh dat Jehoava Witnisiz da fanatiks. Di polees dehn atak di Witnisiz hows dehn eena Birobidzhan, Khabarovsk, Magadan, Orenburg, Naberezhnye Chelny, Perm, Pskov, Saratov, ahn Tomsk. Dehn ares 15 moa bradaz, soh now 20 Witnisiz deh da jayl di wayt fi dehn koat kays ahn too moa deh anda hows ares. Pahn tap a dat, at lees 15 Witnisiz, inkloodin som weh deh eena dehn 70’s ahn 80’s, mi hafu sain wahn agreement weh seh dat dehn noh wahn lef di ayrya weh dehn liv. Sins Joon 14, 2018, di Russian atariti chaaj oava 40  Witnisiz az kriminal. If di koat seh dat dehn gilti, den dehn wahn hafu goh da jayl fi op tu ten yaaz.

Di Russian govament gaan gens di agreement weh dehn mi mek da koat dat di ban weh dehn put pan di Witnisiz neva mi wahn afek dehn rait fi praktis dehn fayt. Russia ignoar dis agreement ahn dehn di yooz Aatikl 282 a di Kriminal Koad az wahn ekskyoos fi chaaj di Witnisiz dehn fi di tek paat, aaganaiz, er gi moni tuwaadz wahn “fanatik” aaganaizayshan. Soh insteda dehn fait peepl weh da teroris, Russia di persikyoot ih oan sitizn dehn hoo jos di chrai wership eena wahn peesful way.

Joon 12, 2018, Saratov. Polees rayd ahn saach wahn fyoo Witnis hows ahn kehr at lees ten Witnis da di polees stayshan fi kweschan dehn. Wail dehn mi-di saach wan a di hows, di polees dehn haid sohn lichricha weh di Russian koat mi ban eena di hows. Den, dehn ares faiv bradaz. Dehn mi let goh too a dehn, bot di polees ares di ada chree ahn chaaj Konstantin Bazhenov ahn Feliks Makhammadiyev fi di ‘aaganaiz aktiviti fi wahn fanatik aaganaizayshan.’ Wi noh noa di kriminal chaaj fi di terd Witnis, Aleksey Budenchuk, yet. Pahn Joon 14, 2018, di Frunzenskiy Dischrik Koat da Saratov mi disaid fi kip Mr. Bazhenov ahn Mr. Makhammadiyev pahn riman til Aagas 12, 2018. Da saym koat seh fi kip Mr. Budenchuk pahn riman, bot dehn noh seh weh dayt ih wahn kom owt. Ada dan dat, di polees mi aada wahn nada Witnis fi sain wahn agreement dat ih noh wahn lef di ayrya.

Joon 3, 2018, Tomsk. 10 aklak eena di maanin, sohn polees ahn membaz a di Russian Speshal Militeri Foas (Spetsnaz) mi rayd too a Jehoava Witnisiz hows da Tomsk, Siberia. Dehn mi ares bowt 30 Witnisiz, inkloodin wahn 83-yaa-oal uman. Di polees tek weh dehn persnal tingz fahn dehn hows ahn veekl, put di Witnis dehn eena sohn bos, ahn kehr dehn da di Center for Counteracting Extremism.

Da di Senta, Ivan Vedrentsev, Aleksandr Ivanov, ahn Vyacheslav Lebedev, weh da sohn investigaytaz, foas di Witnis dehn fi ansa sohn kweschan til 2 aklak di neks maanin. Di investigayta dehn mi-di chretn wan a di Witnis dat ih ku looz ih jab. Joorin di investigayshan, dehn mi haftu kaal amblans fi kohn da di Senta wahn fyoo taimz, an at lees wan Witnis mi en op eena di haaspital.

Wan a di Witnis, Sergey Klimov, stil deh anda ares. Pahn Joon 5, 2018, di Oktyabrskiy Dischrik Koat da Tomsk mi chaaj ahn fi di ‘aaganaiz di aktiviti a wahn fanatik aaganaizayshan,’ ahn dehn mi seh dat hihn mi fi stay eena jayl til Aagas 4, 2018. Di joj rijek eni sojeshanz fi mek ih bee pahn hows ares er geh bayl.

Joon 3, 2018, Pskov. Di polees dehn mi rayd kopl a Jehoava Witnisiz hows da Pskov. Da wan hows, dehn mi ares evribadi weh mi dehdeh ahn kweschan dehn, inkloodin too vizitaz weh da noh Witnisiz. Dehn mi kehr kopl a Jehoava Witnisiz, inkloodin Gennadiy Shpakovsky, da di Pskov Reejinal Hedkwaataz fi di Fedaral Sikyoariti Servis (FSB) fi kweschan dehn. Di polees mi presha som a di wan dehn da di polees stayshan fi giv evidens gens Mr. Shpakovsky. Di atariti dehn mi staat wahn kriminal kays gens hihn ahn chaaj ahn fi di ‘aaganaiz di aktiviti a wahn fanatik aaganaizayshan.’ Eevn doa laytaraan dehn mi let ahn goh, di ofishal dehn mait pres chaajiz weneva dehn waahn.

May 30, 2018, Khabarovsk. Polees mi ares Ivan Puyda afta dehn gaan eena ih hows ahn saach it. Dehn mi kehr ahn da Magadan ahn dehn mi kip ahn da jayl deh. Pahn Joon 1, 2018, di Zheleznodorozhniy Dischrik Koat mi chaaj Mr. Puyda fi di ‘aaganaiz di aktiviti a wahn fanatik aaganaizayshan,’ ahn dehn mi seh dat hihn mi fi stay eena jayl til Joolai 30, 2018.

May 30, 2018, Magadan. Sohn polees weh mi gat aan maas mi rayd wahn praivit hows da Magadan ahn dehn mi ares Konstantin Petrov, Yevgeniy Zyablov, ahn Sergey Yerkin. Pahn Joon 1, 2018, di Magadan Siti Koat chaaj Mr. Petrov ahn Mr. Zyablov fi di ‘aaganaiz di aktiviti a wahn fanatik aaganaizayshan.’ Pahn da saym day, di Magadanskiy Dischrik Koat mi chaaj Mr. Yerkin. Ahn dehn mi put di chree a dehn pahn riman til Joolai 29, 2018.

May 29, 2018, Shuya, Ivanovo Reejan. Di atariti dehn ares Dmitriy Mikhailov ahn hoal ahn da di polees stayshan fi wahn sekant taim. Afta wahn rayd pahn Aypril 20, polees mi chaaj ahn fi di ‘tek paat eena di aktiviti a wahn fanatik aaganaizayshan,’ an ih mi need fi sain wahn agreement dat ih neva mi wahn lef di ayrya. Pahn May 29, di atariti dehn mi aalso chaaj ahn fi ‘di giv moni tuwaadz di aktiviti a wahn fanatik aaganaizayshan.’ Pahn Joon 3, 2018, di Shuya Siti Koat mi put ahn pahn riman til Joolai 19, 2018.

May 27, 2018, Naberezhnye Chelny, Republic of Tatarstan. Oavanait, FSB aygents mi saach ten praivit hows ahn tek weh dehn ilekchranik divais, sel foan, ahn paaspoat. Dehn mi ares Ilkham Karimov, Konstantin Matrashov, ahn Vladimir Myakushin ahn mi kip dehn da di polees stayshan. Pahn May 29, 2018, di Naberezhnochelninskiy Dischrik Koat mi chaaj di chree man fi aaganaiz ahn bring een peepl fi wahn “fanatik” aaganaizayshan ahn fi tek paat eena dehn aktiviti. Di koat mi put dehn pahn riman til Joolai 25, 2018. Laytaraan, dehn mi ares Aydar Yulmetyev tu, ahn pahn May 31, 2018, di koat mi seh dat hihn mi fi stay eena jayl tu.

May 22, 2018, Perm. Wen Aleksandr ahn Anna Solovyev mi kom bak tu Perm afta wahn chrip tu Moldova, sohn polees aafisa mi meet dehn da di chrayn stayshan, hankof Mr. Solovyev, tek weh dehn persnal tingz, ahn kehr di kopl tu di polees stayshan eena separayt veekl. Wail Mr. Solovyev mi deh eena wahn sel da di polees stayshan, polees saach ih hows an aks ih waif sohn kweschanz. Pahn May 24, 2018, di Sverdlovskiy Dischrik Koat mi chaaj Mr. Solovyev fi di ‘tek paat eena di aktiviti a wahn fanatik aaganaizayshan’ ahn put ahn anda hows ares.

May 17, 2018, Birobidzhan. Eena wahn andakova aparayshan wid di koad-naym Jojment Day, 150 polees aafisa ahn membaz a di FSB mi rayd 22 Jehoava Witnis hows. Di polees tek weh dehn tablet, sel foan, ahn moni. Den, dehn ares Alam Aliev, wan a di 34 Witnisiz weh dehn mi saach joorin di rayd. Pahn May 18, di Birobidzhanskiy Dischrik Koat mi chaaj ahn fi ‘aaganaiz di aktiviti a wahn fanatik aaganaizayshan’ ahn dehn put ahn pahn riman til Joolai 13, 2018. Pahn May 25, 2018, Joj A. V. Sizova a di Appellate Court of the Jewish Autonomous Region mi aksep Mr. Aliev apeel ahn let ahn goh til ih chraiyal.

May 16, 2018, Orenburg. Sohn polees aafisa rayd ahn saach sohn Jehoava Witnis hows. Dehn mi ares chree Witnisiz: Aleksandr Suvorov, Vladimir Kochnev, ahn Vladislav Kolbanov. Pahn May 18, di Promyshlenniy Dischrik Koat chaaj Mr. Kolbanov fi di ‘giv moni tuwaadz di aktiviti a wahn fanatik aaganaizayshan.’ Di koat mi let ahn goh bot dehn mi seh dat ih fi stay anda hows ares. Di neks day, di saym koat chaaj Mr. Kochnev ahn Mr. Suvorov fi di ‘aaganaiz di aktiviti a wahn fanatik aaganaizayshan’ ahn dehn mi put dehn pahn riman til Joolai 14, 2018. Di investigayta mi aada sevn ada Witnisiz fi sain wahn agreement fi noh lef di siti joorin di investigayshan.

Di European Union (EU) ahn di United States mi gi wahn ofishal staytment dat Russia noh di rispek peepl rait fi ga freedom. Di EU tel Russia “fi rispek di rait weh peepl ga fi chooz dehn rilijan er dehn bileef, dehn freedom a speech ahn freedom fi meet tugeda.” Di United States tel Russia “fi let goh dehn wan weh dehn mi put da jayl jos bikaaz dehn yooz dehn freedom a rilijan er bileef.”

Philip Brumley, wahn laaya weh reprizent Jehoava Witnisiz, seh: “Jehoava Witnisiz rong di werl noh laik si di terabl tingz weh di hapm tu dehn bradaz ahn sistaz da Russia. Jehoava Witnisiz di goh chroo di saym taip a injostis tudeh laik weh dehn mi sofa anda di Kamyoonis Govament. Russia di brok dehn oan pramis fi rispek peepl raits, bikaaz dehn di persikyoot peepl fi weh dehn bileev, ahn dehn nat eevn di haid weh dehn di du.”

• Dennis Christensen

  Ayj 45, Oryol, mi geh ares pahn May 25, 2017, dehn mi seh dat hihn mi fi stay eena jayl til Aagas 1, 2018.

• Valentin Osadchuk

  Ayj 42, Vladivostok, mi geh ares pahn Aypril 19, 2018, dehn mi seh dat hihn mi fi stay eena jayl til Joon 20, 2018.

• Viktor Trofimov

  Ayj 61, Polyarny, mi geh ares pahn Aypril 18, 2018, dehn mi seh dat hihn mi fi stay eena jayl til Akoaba 11, 2018.

• Roman Markin

  Ayj 44, Polyarny, mi geh ares pahn Aypril 18, 2018, dehn mi seh dat hihn mi fi stay eena jayl til Akoaba 11, 2018.

• Anatoliy Vilitkevich

  Ayj 31, Ufa, mi geh ares pahn Aypril 10, 2018, dehn mi seh dat hihn mi fi stay eena jayl til Joolai 2, 2018.