JOOLAI 13, 2018
SOUTH KOREA
Di Kanstityooshanal Koat da Korea Mek Wahn Disizhan Weh Wahn Help Wi Bradaz Weh Rifyooz fi Jain di Aami
Fi bowt 65 yaaz, di yong man dehn weh da Kristyan da South Korea mi haftu fays wahn prizn sentens bikaaz dehn rifyooz fi jain di aami sayka weh dehn bileev. Pahn Terzdeh, Joon 28, 2018, di Kanstityooshanal Koat mi mek wahn nyoo disizhan weh help dehn wan weh noh waahn jain di aami sayka dehn bileef. Dehn mi seh dat Aatikl 5, paragraaf 1, a di laa pahn militeri servis (MSA) mi-di goh gens di kanstityooshan bikaaz di govament noh gat notn els fi mek dehn wan weh noh waahn jain di aami serv dehn kamyooniti eena wahn neks way.
Sohn nyooz ripoata weh mi deh owtsaida di Kanstityooshanal Koat. Lata nyooz ripoata fahn rong di werl mi inchrestid eena di kays.
Nain joj mi handl dis kays ahn di Cheef Jostis, Lee Jin-sung, mi tek di leed. Hihn mi anonks di 6-3 disizhan weh bring di konchri moa in lain wid di intanashanal standadz weh alow peepl fi chooz weh dehn bileev ahn tink, ahn weh rispek peepl kanshans.
Sohn peepl weh reprizent Jehoava Witnisiz da Korea eensaida di Kanstityooshanal Koat rait bifoa di koat mek ih disizhan.
Evri yaa South Korea put wahn lata peepl eena prizn bikaaz dehn noh waahn jain di aami. If wi ad op di amonk a peepl weh aala di ada konchri dehn put eena jayl fi dis, di amonk a priznaz da South Korea wuda stil bee moa. Joorin wan peeryad a taim, bowt 500 tu 600 a wi bradaz mi geh put eena prizn evri yaa. Wen dehn geh rilees, aala dehn wan weh noh waahn jain di aami bikaaz a dehn bileef en op wid wahn bad naym sayka weh dehn mi spen taim eena prizn, ahn dat mi mek it haad fi dehn fain wahn jab aftawodz.
Bot eena 2011, som a wi bradaz mi sen een sohn leta tu di Kanstityooshanal Koat di komplayn bikaaz di laa neva provaid no ada opshan fi dehn dan fi goh da prizn bikaaz a weh dehn bileev. Ahn sins 2012, eevn som a di joj dehn weh mi feel bad fi ponish peepl ahn sen dehn da jayl sayka weh dehn bileev mi disaid fi rifaa dehndeh kays tu di Kanstityooshanal Koat fi mek dehn luk intu di laa pahn militeri servis (MSA).
Wahn intavyoo a Hong Dae-il, sombadi weh reprizent Jehoava Witnisiz da Korea, afta di koat mek ih disizhan.
Di Kanstityooshanal Koat dehdeh fi chek weda wahn laa deh in lain wid Korea Kanstityooshan er nat. Dehn mi ga too koat kays bowt dis (eena 2004 ahn 2011), ahn di Kanstityooshanal Koat mi disaid fi lef di laa pahn militeri servis (MSA) how ih deh. Bot now dehn si dat dehn need fi mek wahn chaynj. Di Koat mi aada di govament a South Korea fi rait oava di laa an inklood wahn neks opshan fi mek dehn wan weh no waahn jain di aami bikaaz a weh dehn bileev ku serv dehn kamyooniti eena wahn neks way. Dehn tel dehn dat dehn haftu du it bai di en a 2019. Sohn ada kaina servis weh dehn ku mek dehn du da fi werk da wahn haaspital ahn sohn ada werk weh noh ga fi du wid di aami ahn weh help di kamyooniti.
Fi mek wi reeli andastan how impoatant dis disizhan weh di koat mek, Brada Hong Dae-il, sombadi weh reprizent Jehoava Witnisiz da Korea, seh dis: “Di Kanstityooshanal Koat da di haiyis atariti weh protek hyooman raits, an ih mek wahn fongdayshan fi mek wi ku solv dis prablem. Wi bradaz luk faawod fi serv dehn kamyooniti di du sohnting weh noh goh gens dehn kanshans jos laik how ada konchriz alow fi dehn peepl fi du.”
Sohn ada impoatant ishuz stil need fi geh setl. Dat inklood di 192 Witnisiz weh stil deh eena prizn rait now bikaaz dehn rifyooz fi jain di aami, ahn bowt 900 kriminal kays weh dehn di kansida eena difrent koats.
Dis disizhan fahn di Kanstityooshanal Koat mek hischri, ahn now di Sopreem Koat moa laikli fi alow dehn wan weh noh waahn jain di aami fi serv eena wahn difrent way. Wateva di joj dehn da di Sopreem Koat disaid fi du wahn afek how eech wan a dehndeh kriminal kays geh handl.
Di Sopreem Koat sopoas tu ga wahn poblik koat kays pan Aagas 30, 2018, ahn dehn wahn anonks dehn disizhan aftawodz. Dat wahn bee di fos taim eena 14 yaaz weh aala di joj dehn fahn di Sopreem Koat wahn luk pahn di ishu a peepl weh rifyooz fi jain di aami bikaaz a weh dehn bileev.
Meenwail, di Nashanal Asembli di werk pahn sohn chaynjiz tu di laa pahn militeri servis.
Brada Mark Sanderson fahn di Govanin Badi seh: “Wi reeli di wayt fi hyaa weh di Sopreem Koat wahn disaid. Wi bradaz da Korea giv op dehn freedom bikaaz dehn noa ‘Gaad wahn bles dehn if dehn wilin fi tek di payn fi sohnting weh dehn noh dizerv bikaaz dehn waahn pleez ahn.’ (1 Peeta 2:19) Wi hapi dat wi bradaz ga di korij fi stan op fi weh dehn bileev, ahn dat di koat dehn fainali di giv atenshan tu di injostis weh wi bradaz di sofa.”