Eevn joorin di coronavirus pandemik, Jehoava Witnisiz kantinyu fi projoos di Baibl eena moa nyoo langwij. Pahn Joon 28, 2020, di Hoali Baibl—Nyoo Werl Chranslayshan mi kom owt eena foa difrent langwij: Swati, Tsonga, Zulu, ahn Chitonga. Di Hoali Baibl—Nyoo Werl Chranslayshan (Machyu – Revilayshan) mi aalso kom owt eena Belize Kriol ahn Totonac. Eevn doa wi bradaz ahn sistaz kudn meet tugeda bikaaz a di COVID-19 pandemik, dehn mi stil hapi fi geh di dijital verzhan a dehnya Baibl. Dehn mi rikaad wahn speshal proagram fi eech langwij fi prizent di nyoo Baibl dehn, soh dat di poblishaz kuda mi wach di proagram tugeda fahn hoam.

Brada Geoffrey Jackson, wahn memba a di Govanin Badi, mi prizent di Hoali Baibl—Nyoo Werl Chranslayshan eena Swati ahn wahn rivizhan a di Hoali Baibl—Nyoo Werl Chranslayshan eena Tsonga ahn Zulu dijital faamat (si di picha da di tap a di payj). Poblishaz eena South Africa ahn Eswatini mi tai een fi di speshal meetin.

Eena di South Africa branch teritori, bowt 18.5 milyan peepl taak Swati, Tsonga, er Zulu, ahn dat inklood moa dan 38,000 poblishaz.

Brada Augustine Semo, wahn memba a di Malawi Branch Komiti, mi anonks dat di hoal Hoali Baibl—Nyoo Werl Chranslayshan avaylabl eena di Chitonga (Malawi) langwij.

Chree sistaz ahn faiv bradaz mi werk fi moa dan too yaaz fi finish di nyoo Baibl eena Chitonga. Wan a di sista seh: “Peepl taak chree difrent verzhan a di Chitonga langwij. Soh peepl fahn wan ayrya mait yooz difrent werdz dan peepl fahn wahn nada ayrya. Wi mi haftu bee kyaaful fi pik werdz weh moas peepl wahn ku andastan. Ahn den wi mi yooz sohn futnoat eena di Baibl fi eksplayn tingz soh ih klyaa tu evribadi.”

Wahn neks sista seh: “Poblishaz wahn fain it eezi fi yooz dis Baibl eena di minischri er da di meetin dehn bikaaz di werdz weh ih yooz simpl ahn klyaa, ahn soh ih eezi fi reed an andastan.”

Brada Joshua Killgore, wahn memba a di Central America Branch Komiti, mi anonks dat di Hoali Baibl—Nyoo Werl Chranslayshan (Machyu – Revilayshan) avaylabl eena Belize Kriol. Moa dan 1,300 peepl mi tai een fi di speshal proagram.

Siks chranslaytaz mi werk fi 16 monts fi finish dis proajek. Wan a di chranslayta mi seh dis bowt di benifits a dis nyoo Baibl: “Wi bradaz ahn sistaz fainali ga wahn Baibl chranslayshan weh dehn ku chros ahn pen pan. Ih wahn bee laik wahn lamp weh lait op dehn andastandin.”

Wahn neks chranslayta seh: “Joorin dis COVID-19 pandemik, wi bradaz ahn sistaz weh taak Belize Kriol wahn ku reed di Skripchaz eena dehn oan langwij. Dis wahn komfert dehn ahn kip dehn kaam soh dat dehn ku bayr op chroo eni chraiyalz weh deh heda wi.”

Eena Belize, dehn ga 867 poblishaz eena 19 Belize Kriol kangrigayshan. Wahn neks 58 poblishaz serv eena Belize Kriol kangrigayshanz ahn groops da di United States.

Brada Jesse Pérez, wahn memba a di Central America Branch Komiti, mi anonks dat di Hoali Baibl—Nyoo Werl Chranslayshan (Machyu – Revilayshan) avaylabl eena Totonac. Bowt 2,200 peepl fahn di 50 Totonac kangrigayshanz eena di branch teritori mi tai een fi di proagram.

Wan sista ahn too bradaz mi finish dis proajek eena lee bit moa dan chree yaaz. Dis chranslayshan wahn bee veri yoosful fi preech di gud nyooz tu di moa dan 250,000 peepl hoo taak Totonac da Mexico.

Di Hoali Baibl—Nyoo Werl Chranslayshan (Machyu – Revilayshan) veri difrent fahn ada Baibl eena di Totonac langwij. Wan a di chranslayta seh: “Ih yooz di kaina langwij weh wi taak evri day, soh now ih wahn bee eeziya fi mek wi ku eksplayn difrent Baibl tapik tu di peepl dehn weh wi taak tu eena wi minischri.”

Wahn neks chranslayta seh: “Wi bradaz ahn sistaz di wayt lang taim fi wahn Baibl laik dis. Som a di Totonac poblishaz yoostu mek dehn oan chranslayshan a difrent Baibl vers fi wen dehn ga asainments pahn di meetin dehn. Now dat dehn ga dis Baibl, dehn noh wahn haftu du dat nohmoh.”

Wan a di benifit a dis Baibl chranslayshan da di futnoat dehn weh gi difrent opshanz fi how sertn tingz ku chranslayt. Sins peepl fahn difrent ayrya taak Totonac lee difrent fahn wan anada, dehnya opshanz mek shoar dat peepl fahn aal oava wahn ku yooz dis Baibl.

Wi soh hapi fi wi bradaz ahn sistaz hoo geh dehn Baibl eena dehn oan langwij. Wi noa dat az dehn yooz di “soad a di spirit” eena dehn minischri ahn persnal Baibl stodi, ih wahn schrentn dehn fayt.—Heebrooz 4:12.