Uá. Subudi wamuti magañeirun wabéi lau wasalbarun lau wapurichihan muna tuagun muna (Éfesuna 2:8). Ka uagu?

 Samina humá luagun aban gürigia areidati le füramase haali líchuguba lan aban idewesei wéiriti lebegi houn sun ha achülürütiña lidoun ítaga fulasu lidan ítaga weyu. Anhein subudi wabalin gayara lan wafiñerun luagu lererun gürigia ligía, ma wadügüñein hamuga le lariñagubei? Ani wawisaruñanu hamuga giñe wamadagu hama waduheñu lun hachülürün eresibirei idewesei ligía. Íbini ítara, úabei ni aban agañeiruti idewesei ligía ladügarügü gaganbadi lan lun adundehani le líchugubei labureme idewesei. Rúarügüti idewesei, mama gáñeiwarügüti.

 Ítarameme, afiñetiwa, wagía gefentiña luagu Heowá, lagunfulirubei lan Bungiu füramasei le ladügübei libügürü líchuguba lan ibagari magumuchaditi houn sun ha gaganbaditiña lun (Rómana 6:23). Keiti busén wabéi lun giñe habihini amu gürigia lubuidun idewesei le, ligía wadügünbalin sun wayaraati lun wapurichihan houn. Gama lumoun, subudi wamuti magañeirun wabéi lan wasalbarun ladügarügü wídehan lidan wadagimanu le (Rómana 1:17; 3:28). Le linarün katei, úati ni kata le gayaraati wadügüni lun wagañeiruni lubuidun idewesei lúmagiñeti Bungiu le. Ariñagatu Bíbülia: “Aba lasalbaruniwa; mama hamuga ladüga wadügün somu katei buiti, ladüga wagudemen lun” (Titu 3:5).