•  Ida liña hasubudiruni gefentiña luagu Heowá anhein lunti lubéi hefeduhan ítaga fedu?

•  Lau sun mefeduhan hamá gefentiña luagu Heowá ítaga fedu, hínsiñememegiña san haduheñu houn?

•  Fosu hamutiña san gefentiña luagu Heowá amu gürigia lun mefeduhan hamá ítaga fedu?

 Lubaragiñe hanúadiruni gefentiña luagu Heowá anhein hefeduhaba lubéi ítaga fedu, akutihatiña furumiñe tidan Bíbülia. Anihein burí fedu le múaranti luma le tariñagubei Bíbülia. Lidan kesi le, mefeduhan hamuti gefentiña luagu Heowá. Anihein giñe amu burí fedu le ídanbei kada lan Gefenti lun lanúadiruni anhein lefeduhabei lubéi, áfaagueina lun madurun lan “ligibugiñe Bungiu luma hagibugiñe gürigia” (Adügaü 24:16).

 Guentó, ariha wamá aban lísüta lauti álügüdahani le hadügübei gefentiña luagu Heowá lun hasubudiruni anhein hefeduhaba lubéi ítaga fedu. a

•   Arufudahani san mama inarüniti lébunabei?

   Adundehani tídangiñeti Bíbülia: “Furí huma lubeiti haganaguagiñe ha mafiñenbaña; dise humá hawéi, liña Habureme: Maguura humá ni kata wíyeti” (2 Korintuna 6:​15-17).

   Lun hadisedun gefentiña luagu Heowá luéi arufudahani iyeeniti, lidan amu dimurei, arufudahani le múaranti luma le tarufudahabei Bíbülia, mefeduhantiña fedu le ítarati kei le uágubei layanuhóua ǘnabu.

   Fedu le gánibei hama búngiugu mama inarünitiña. Ariñagati Hesusu: “Lúnrügüba Babureme Bungiu báhuduragua, lúnrügüba giñe beseriwida” (Matéu 4:10). Kei gaganbadi habéi gefentiña luagu Heowá lun gumadi le, mefeduhan hamuti fedu le lánina duusu-hati, Paskua, Dimaasu le lánina Paskua ni fedu le adügǘbei furumiñe lidan seingü-hati, ladüga lídangiñe lan áhuduraguni houn búngiugu mama inarünitiña láhücha fedu burí le. Madan lumutiwa giñe fedu kéiburi:

  •  Kwanza. Según aban líburu, “lídangiñeti swahili matunda ya kwanzaa liri fedu le (mini lan ‘furumiñeti lin nadü’)” le efeduhóuabei “según fedu áfürikana le lánina alubahani”. Lau sun añahein lan asaminarutiña mama lan tánina relihión fedu le, góubaguagüda tumuti aban líburu luma aban fedu áfürikana le ídanbei ladagaragüdǘwa furumiñeti lin nadü “houn búngiugu luma houn binadu agüchagu lun heteingiruniña”. Ani ariñagatu líburu tuguya dandu lan fedu ligía kei fedu le hadügübei merigein wuritiña, le gíribei Kwanza, arufuda lani “ligiaméme igaburi lánina lichugúniwa eteingiruni houn binadu agüchagu luagu abiniruni le híchugubei houn” (Encyclopedia of African Religion).

  •  Fedu le adügǘbei Múberugu. Según aban líburu to gíriboun Otras culturas, otras formas de vida, layanuhóuña luagu aban fedu le ídanbei “híchiga gürigia adagaragüdüni lun bungiu hati”. Lidan fedu ligía, huduguatiña “würiña ha taburiña muna [...] lun bungiu ligía” (Religions of the World​—A Comprehensive Encyclopedia of Beliefs and Practices).

  •  Weyu lánina lichugúniwa seremei (Acción de Gracias o Thanksgiving). Ítara kei fedu Kwanza, gániti fedu le luma binadu efeduhani lánina alubahani le meha adügǘbei lun lichugúniwa uéiriguni houn búngiugu. Dan lárigiñe, “aba hagumeserun kristiánugu ha mama inarünitiña efeduhei fedu le” (A Great and Godly Adventure​—The Pilgrims and the Myth of the First Thanksgiving).

   Fedu le gániti luma afiñeni mébunati o ubunuruni. Ariñagatu Bíbülia ha lan adaragüdübaña “éigini tuma diwéin lun […] lubungiutegu ubunuruni” díseñu haña lan luéi Heowá (Isaíasi 65:11). Ligía mefeduhan habalin gefentiña luagu Heowá fedu kéiburi le:

  •  Iván Kupala. “Según afiñeni kamaniti, lidan luéyuri Iván Kupala, ígiragüda lumuti sun le geyegubei wau lubafu le lánina mahia ani anhein lan ganigi lubéi aban gürigia, gabunurun ligía, gayaraabei lan libihin lídangiñe ubafu ligía” (The A to Z of Belarus). Lidan lagumeseha, aban meha fedu ubouaguna lira lun lefeduhóuniwa aban lídangiñe weyu létima migifebei lidan irumu, lidan sisi-hati. Kei tariñaguni aban líburu, “aba lamigisirún fedu le luma tufedun ligilisi [luéyuri san Juan Bautista] dan meha le lanharúnbei lun hafiñen kristiánugu” (Encyclopedia of Contemporary Russian Culture).

  •  Iseri Irumu lánina Hati (Iseri Irumu houn cheiní o Iseri Irumu houn koreana). “Lidan burí weyu ligía, sügǘ luéi lidan amu dan lidan irumu, luágutima ubunuruni heberesera iduheñu hama umadagu luma luagu híchugun uéiriguni houn habungiutegu luma houn sífirigu luma lun hayumahan ubunuruni lubá iseri irumu” (Mooncakes and Hungry Ghosts​—Festivals of China). Ítarameme, gániti Iseri Irumu koreana luma “láhudurawagun houn agüchagu, lafalarúniwa burí échuni lánina hadisedagüdüniwa sífirigu wuribatiña, libihíniwa ubunuruni lidan iseri irumu luma lariñawagún kaba lan lanüga iseri irumu” (Encyclopedia of New Year’s Holidays Worldwide).

   Fedu burí le gánibei luma afiñeni luagu móunwedadi tan uani. Marufudahantu Bíbülia sigí tan luani aban gürigia awinwanda lárigiñe lounwen. Dan le lounwen aban gürigia, gumuti giñe le lasandirubei luma le lasaminarubei, ábati hasaliragun kalikime (Apurichihati 9:​5, 10; Sálumu 146:4). Ligíati, mefeduhantiña gefentiña luagu Heowá fedu le awanseragüdübalin afiñeni luagu móunwedadi tan uani, kéiburi le:

  •  Haweyuri hilaaña. Según aban líburu, lidan weyu ligía “laritawagúa hawagun sun gürigia hilaguaaña ha meha úaraguabaña”. Ani sigitu líburu tuguya ariñaga: “Lidoun burí labadinagua irumu seingü-san darí irumu milu-seingü-san lárigiñe lidaani Kristu, gíbetiña meha gürigia asaminarutiña lídanñoun lan aban fulasu uani, le ñein lubéi harumadahóua hilaaña lubá hebelurun lidoun luéirigun Bungiu ani arufudagua hamá houngua kei úfiaü, burú, húa o katei líbeina lira houn gürigia ha óuserubaliña wuriba dan meha le wínwangiña” (New Catholic Encyclopedia).

   Fedu le gánibei luma katei hani máfianu. Ariñagatu Lererun Bungiu: “Ualá ni aban hídangiñe adagaragüdüti [...], maríaagüdün huguyame, málugun huguyame hariñaguni katei le lunbei lasuseredun, mabiñarahan huguyame, marumaagüdün huguyame hewe, málügüdahan huguyame hama garíaahatiña, ni hama búyeigu, ni hama hilaaña. Lugundun mínsiñetiña ha adügübaña katei líbeina le lun Bungiu” (2 Lúrudu 18:​10-12). Lun mádaragun hamá gefentiña luagu Heowá houngua lidoun katei le hámagiñeti máfianu, kéiburi taturiahóun waruguma (aban luwuyeri aríaagüdüni), mefeduhan hamuti Halloween ni fedu kei le:

  •  Iseri irumu. Ariñagatu aban líburu luagu fedu le: “Lidan irumu 46 lubaragiñe lidaani Kristu lanúadirei gumadimati rómana Huliu Sésarü weyu 1 lidan eneru lun lefeduhóun Iseri Irumu. Lun meha bungiu Hanu hanúadirei rómana weyu le” (The World Book Encyclopedia states).

   Fedu burí le gánibei luma láhudurawagun lun Bungiu según Lilurudun Moisesi le meha agumuchubei seremei lani Hesusu sákürifisiu. Ariñagatu Lererun Bungiu: “Kristu lébehabei lagunfulirúniwa lilurudun Moisesi” (Rómana 10:4). Lau sun inarüni lan añahagua lan kristiánugu asagara buiti lídangiñe adundehani lúmagiñeti Bungiu le lídanbei Lilurudun Moisesi, lúrudu le meha ichugúbei houn binadu ísüraelina, mefeduhan hamuti gefentiña luagu Heowá hafedun ísüraelina, létima gánibei luma afiñeni luáguti lachülaaguba lan Mesíasi ámuñegü ladüga chouru hamani ñǘbuinhali lan. Ariñagatu Lererun Bungiu: “Sun burí katei le, liyawadirügüñein le lunbei liabin, Kristu ligía linarünbei” (Kolosana 2:17). Lau gabaroun hamani katei le luma ladüga falawa lan burí échuni le múaranti luma le tariñagubei Lererun Bungiu lidan burí fedu le, mefeduhantiña gefentiña luagu Heowá fedu kéiburi le:

  •  Hanuká. Adügǘwati fedu le lun laritawagún tederegerúniwa ténpulu huríu to Herusalénboun. Ani ariñagatu Lererun Bungiu iridúaali lan Hesusu kei Fádiri Íñutimati “ani sanduariu [o ténpulu] to ñein lubéi lafadiriha, buítimatu, úati mégeiti tuagu, ladüga mama hadüga gürigia, mama giñe ubouaguna” (Ebüréu 9:11). Táurügaali ténpulu lúmagiñetu Bungiu to siéluna, to teweñeguaboun ténpulu to meha Herusalénboun, heberesera kristiánugu.

  •  Rosh Hashaná.Ligía furumiñetibei weyu lidan irumu houn huríu. Lidan meha binadu dan, rúati meha adagaragüdüni espechaliti lun Bungiu lidan fedu le (1 Lúrudu 29:​1-6). Ánheinti guentó, adügaali Hesukrístu, le Mesíasi, lun lagumuchun “adagaragüdüni gudawarügüti luma idewesei” (Danieli 9:​26, 27). Ligíati, mebegihali adagaragüdüni burí le lun Bungiu.

•   Adügati san fedu le lun hamigisiragun tílana ámuñegueinarügü relihión?

   Adundehani tídangiñeti Bíbülia: “Ida lubagia lúaradun aban afiñeti luagu Kristu luma aban le mafiñenti. Kagia idan túaradagua litenpulun Bungiu hama guáriua?” (2 Korintuna 6:​15-17).

   Lau sun áfaagua hamá gefentiña luagu Heowá lun hawinwandun lidan darangilaü hama sun gürigia, inebe ligía liricha kada gürigia houn lun lanúadiruni kaba lan uagu lafiñera, mádaraguntiña houngua lidoun fedu le ídanbei hamigisiragua hama tílana amu burí relihión, kéiburi le uágubei layanuhóua ünabu.

   Fedu le adügǘbei lun lichugún uéiriguni houn gürigia o lun somu sügǘ le tánina relihión to ínchahabaliña tílana ámuñegueinarügü relihión lun háhuduragun lidan aban. Lidan meha binadu dan, dan meha le ladundehanbaliña Bungiu lumutuniña lidoun aban iseri fulasu, le meha ñein lubéi hawinwanda gürigia ha tílana amu burí relihión, ariñagati houn lubúeingu: “Madügabá daradu hama, ni hama habungiutegu, [...] huduguabiñein houn habungiutegu, beferidiragülebeiti lira” (Áfuriduni 23:​32, 33). Ligía mádaragun habéi gefentiña luagu Heowá houngua lidoun fedu kei le:

  •  Luferian kada fulasu. Ligía burí fedu le adügǘbei sagü irumu lidan burí fulasu le uágubei gabafu tan ligilisi to ariñaguboun tuougua kristiánu tan, lun híchugun uéiriguni lun “le abuyeihabei” hawagu o lisandun hageira. Wáwati lun fedu le feria o (fiesta patronal), le adügǘbei lidan kada hageira gürigia.

  •  Vesak. Anihántima hafeduhabei ha áhuduragubaña lun Bunda. “Lidan fedu le laritawagúa luéiyuri nasirua lan Buda, ladunrangun leiti lau luma lásügürün luéigiñe nirvana” (Festivals, and Celebrations of the World Dictionary).

   Fedu le adügǘbei lun lafalarúniwa échuni tánina relihión le múaranti luma le tarufudahabei Bíbülia. Ariñagati Hesusu houn tábutigu relihión: “Mebegigüda humaali lugumadin Bungiu lun hafalaruni binadu higaburi”. Ariñagati giñe houn mala lan meha háhuduraguña lan lun Bungiu “ladüga lérügüñein [lan] hagumadihan wügüriña harufudaha” (Matéu 15:​6, 9). Kei gaganbadi hamá gefentiña luagu Heowá lun eweridihani le, mefeduhantiña fedu tánina relihión, kéiburi le:

  •  Fedu lánina tamudeirun María sielun. Ñǘbuinti fedu le lídangiñe afiñeni luagu mudei tan lúguchu Hesusu sielun lau sun túgubu. Afuranguagüdatu Diccionario de religiones comparadas fuá lan “afiñeni le luagu furumiñeti wéiyaasu [...] lidan lagumuchagüle sígulu gádürü” ani “tidan Iseri Daradu, úati ariñahani le arufuduti inarüni lan afiñeni le”.

  •  Lefeduhóun mafigoun tan María dan le tagurahóunbei. Ariñagatu Enciclopedia Católica Online luagu afiñeni luagu mafigounhan tan María dan le tagurahóunbei: “Siñati larufudún tau Lererun Bungiu inarüni lan afiñeni le”. Ligilisi arufudahabalin lira.

  •  Kuaresma. Afuranguagüdatu Enciclopedia universal ilustrada europeo-americana “lárigiñehali lan irumu 325”, lóugiñe bián-san irumu lárigiñe tabürüdǘn tagumuhóun líburu tídangiñetu Bíbülia, lagumeserúa lidaani ayunaruni luma asufuriruni le adügǘwa. Ariñagatu liburuméme to luagu furumiñeti weyu lánina Kuaresma, o weyu luagu-ǘrüwa le ídanbei lichugúa baligi hereberugu gürigia (Miércoles de Ceniza): “Lídanhali aban adamuridaguni le adügǘbei uburugu Benevento lidan irumu 1091, líchiga Urbano II gumadi lunti lan ladügǘn gurúa lauti baligi hereberugu sun tílana ligilisi”.

  •  Luéyuri Gurúa. Ariñagatu aban líburu anihán lan “aban lídangiñe fedu le wéiritimabei lun laritawagún gurúa kei aban seini hánina kristiánugu […]. Efeduhóuati lau óunwenbu burí uéndegu ani wéiriti lubafu luagu le hasandirubei afiñetiña” (The Religious Studies to labürüdüboun Sásaamu Lubsky). Ánhañati gefentiña luagu Heowá, mayusutiña gurúa lidan háhuduragun.

•   Ruti san fedu ligía uéiriguni lun aban gürigia, tun aban óundaruni, lun fanidira o lun katei líbeina lira?

   Adundehani tídangiñeti Bíbülia: “Lariñahare Aburemei: ‘Íñarawaguati sun le adiñurutu lanigi nuéi, le íchugubalin lemenigin hawagu wügüriña, afiñe ligía luagu hámaba lan ladarira ídemuei’” (Heremíasi 17:5).

   Íbini samina hamá gefentiña luagu Heowá hawagu gürigia, furíei hagía hawagu, madan lumutiña fedu burí le:

   Lichugún uéiriguni lun aban gumadimati o lun aban gürigia le wéiriguti. Ariñagatu Lererun Bungiu, to Bíbülia, moun lumuti lan wíchuguni wemenigin hawagu gürigia, ladüga “ítara liña habagari gürigia kei aban awaraguni” (Isaíasi 2:22). Ligía lébunabei mefeduhan hamani gefentiña luagu Heowá lagunfulirun aban urúei irumu, wügüri lan yebe o würi.

   Lefeduhóuniwa lufedun fanidira. Mefeduhan hamuti gefentiña luagu Heowá Luéyuri Fanidira. Ka uagu? Ladüga ariñagatu Lererun Bungiu: “Mafalara humaña búngiugu ha iyeenitiña” (1 Huan 5:21). Añahein gürigia saminatiña mama lan aban guáriua fanidira, lidan amu dimurei, aban katei le unbei láhudurawagua. Ariñagati aban abürühati gíriti Carlton Hayes luagu “échuni le kamanibei uguñe weyu”: “Fanidiratima wéiribei lisudinin lidan ageiraü ani ligíatima unbei láhudurawagua”.

   Fedu burí le íchugubei uéiriguni lun aban sandu. Ka ladügübei apostolu Féduru dan le láhuduragunbei aban wügüri ligibugiñe? Ariñagatu Lererun Bungiu: “Aba liñuraguni Féduru, aba lariñagun lun: —Ráramaba; wügüri giñe au bíledi” (Adügaü 10:​25, 26). Dandu Féduru kei ha híbiri apostolugu, máhatiña meha lun lichugúniwa uéiriguni ni inebesei houn lidan aban igaburi le espechaliti. Ligía maha habéi gefentiña luagu Heowá lun gadan lániña fedu burí le íchugubei uéiriguni houn gürigia ha arihúbaña kei sandu, kéiburi:

  •  Haweyuri Sun Sandu. Según aban líburu to gíriboun Año cristiano, le lébunabei fedu le “lefeduhóuniwa houn sun sandu”. Afuranguagüdatu giñe líburu to: “Madari hamagili sásaamu ha akutihabalin le asuseredubei lidan dan le sügühalibei halíagiñe lan láhücha fedu le”.

  •  Tufedun Guadalupe. Adügǘwati fedu le tun “Hasandun mesigaanu”, ani según le hafiñerubei saragu gürigia tuguyaméme nege Maríaboun, to lúguchu Hesusu. Ariñawagúati aban lan tasaliragun lun aban gürigia lidan irumu 1531 (Enciclopedia Guadalupana).

  •  Luéyuri lichugúniwa iri luagu irahü. Según aban líburu, ligía “luéyuri lefeduhóun lun sandu le gíribalin iri le ichugúbei luagu aban irahü lidan luéyuri labadiseirun o lidan luéyuri ladügüni irahü ligía gufirümaü ligilisirugu”. Ani sigitu ariñaga: “Aban weyu le wéiribei gani lan tuma relihión lira” (Celebrating Life Customs Around the World​—From Baby Showers to Funerals).

   Fedu burí le gánibei luma polítika luma lun liabin sánsiguaü. Ariñagatu Lererun Bungiu: “Buítimati lemenigidúniwa luagu Aburemei sügǘ lau lemenigidúniwa luagu gürigia” (Sálumu 118:8, 9). Kei mabusenrun habéi gefentiña luagu Heowá lun hasaminarun gürigia hemenigi hamá wügüriñaba lan aransehei turobuli le ubouagubei, madan lumutiña fedu le gániti luma polítika o sánsiguaü le hámagiñeti gürigia, kéiburi haweyuri nibureingiña (Día Internacional de la Juventud) o tuéyuri würi (Día Internacional de la Mujer). Mefeduhan hamuti giñe luéyuri hesefuragun gürigia houngua luéi ítaga ubafu (Día de la Emancipación) o katei líbeina lira. Lubaragiñe lira, afiñetiña lagumuchuba lan Larúeihan Bungiu lau iyereehabúni luagu amu rasa luma lau múarani (Rómana 2:11; 8:21).

•   Adügati san fedu ligía lun lasaminarúniwa buidu hama lílana aban sétanu o aban ageiraü luéi amu?

   Adundehani tídangiñeti Bíbülia: “Úati [...] himei lan Bungiu aban gürigia luéi aban, lubaragiñe lira, resibirügü lumutiña sun ha inebehabubaña lun ani adüga haméi le buídubei” (Adügaü 10:​34, 35).

   Lau sun hínsiñe lan ageiraü le ídanbei hawinwanda gefentiña luagu Heowá houn, madan lumutiña fedu le íchugubalin aban ageiraü o lílana aban sétanu iñu hawéi ha híbiri.

   Fedu burí le íchugubei uéiriguni houn súdaragu. Lubaragiñe meha línchahaniña Hesusu lani disipulugu lun houdin awuribuha, ariñagati houn: “Hínsiñe hamá háganiñu hun [...], afurieida huguyame lun Bungiu hawagu ha anabagubalün” (Matéu 5:44). Ligía mefeduhan habéi gefentiña luagu Heowá fedu le ruti uéiriguni houn súdaragu, kéiburi:

  •  Haweyuri súdaragu. Según páhina lánina Internet le hani súdaragu, lidan weyu le “lariñaga gumadimati wadimaluna tun óundaruni hani súdaragu buidu lan hadüga”. Wéiriguti fedu le lidan ageiraü le darí lun adügǘwa lan sagü léiguadun weyu 30 lidan sisi-hati.

  •  Luéyuri lichugún uéiriguni houn gürigia ha asudarahaañabaña (Weyu lun laritawagún, Dimaasu lánina laritawagún, Weyu lun haritawagún ha óunwegubaña lidan wuribu). Según Enciclopedia Moderna efeduhóuati weyu le “dandu lun haritawagún súdaragu ha seriwihañabaña lidan ageiraü [...] kei lun haritawagún ha óunwegubaña lidan wuribu”.

     Lefeduhóun sügǘ súdiniti o lafanreinragun aban ageiraü luéi amu. Ariñagati Hesusu hawagu lani disipulugu: “Ítara kei mama nan lani ubóu, mama giñe lani ubóu hagía” (Huan 17:16). Íbini gunda hamá gefentiña luagu Heowá lau hafurendeiruni sun luáguti ageiraü le ídanbei hawinwanda, mefeduhan hamuti weyu le ídanbei lafanreinragua aban ageiraü luéi amu.

•   Aban san fedu le ñein lubéi márügüdagun hamá gürigia houngua, adaagua hagía magíaguni?

   Adundehani tídangiñeti Bíbülia: “Buídurügaali dan le abagarida humaalibei adaaguei meha luriban burí katei le hínsiñebei houn ha ibidiñehabúbaña lun Bungiu. Lidan meha dan le sügühalibei, haganóunña meha lidan ibagari nibusigarídünati, falá humuti meha luriban haritagun, abacharuada, adaagua fedu, átagua, luma áhuduragua houn guáriua” (1 Féduru 4:3).

   Kei gaganbadi habéi gefentiña luagu Heowá lun adundehani le, mefeduhan hamuti fedu le ídanbei hátagua gürigia, márügüdagun hagía houngua. Hínsiñeti houn gefentiña luagu Heowá lun hásügürün dan hama hamadagu, ani fiu hádangiñe, anúadahatiña lun hatun murusun binu. Áfaaguatiña lun hafalaruni adundehani tídangiñeti Lererun Bungiu le ariñagubei: “Anhaün lubeiti eiga o ata o hadügün furumiñeguarügü katei, adüga huméi súngubei lun híchugun uéiriguni lun Bungiu” (1 Korintuna 10:31).

   Ligía lubeiti mádaragun habéi gefentiña luagu Heowá houngua lidoun fedu kéiburi karnawáli o katei líbeina lira, le ñein lubéi ladügǘwa katei le múaranti luma le tariñagubei Lererun Bungiu. Aban giñe luwuyeri karnawáli hafedun huríu le gíribei Purim. Lau sun meha seriwi lan fedu le, luagu aban dan, lun haritaguni huríu luéyuri hesefurún lidan sígulu keinsi lubaragiñe lidaani Kristu, guentó, gayaraahali lariñawagún hani lan huríu karnawáli. Ariñagatu líburu to gíriboun El Judaísmo subudiwa lan fedu le luagu “hinchahóun gürigia lun hátagun darí habidiñedagun houngua luma luagu chagaguaü le kamanibei lidan burí karnawáli, lau lidáü burí igibu luma hadaüragun burí katei le adügübei lun ibidiñewa hamá”.

 Anha. Arufudahatu Lererun Bungiu mosu lan hínsiñe hamá ani inebe hagíame waduheñu woun, meberesenga ka lan hafiñenbei (1 Féduru 3:​1, 2, 7). Másiñati aba lan hasandiragun liduheñu aban gefenti luagu Heowá houngua wuriba o lau igañi ladüga mefeduhanhaali lan haduhe ítaga fedu. Ligía lubeiti, áfaaguatiña gefentiña luagu Heowá lun harufuduni houn haduheñu hínsiñe hamá houn lau hafuranguagüdüni houn ka lan uagu mefeduhan habéi ítaga fedu ani bisida hamutiña lidan burí amu weyu.

 Uá. Afiñetiña gefentiña luagu Heowá mosu lan lanúadahani kada gürigia kaba lan ladüga (Hosué 24:15). Inebehabutiña houn sun gürigia, meberesenga ka lan hániboun relihión (1 Féduru 2:17).