Láutima budagia le híchugubei gefentiña luagu Heowá lau sun hagundan lamainirúa wadagimanu lánina apurichihani. a Másügüragüdüntiwa ágeidinaü lidan burí wadamuridagun lun lamuriahóun seinsu hama achülürütiña, mamuriahóunti giñe hama lílana damuriguaü lun híchugun diisi lídangiñe kada san fiádürü le hagañeirubei (Matéu 10:7, 8). Ígiruarügütu burí gafu tidan Luban wadamuridagun habá sun ha busentiña híchugun budagia tidoun. Miridúnwati hiri ha íchugubaña budagia.

 Memegeiruntiwa giñe wayusurun saragu seinsu lugundun mafayeirúnwatiña wügüriña ha anügübalin ubaraü waganagua. Úati giñe ni aban gefenti luagu Heowá aguburahati luagu lapurichihan muna tuagun muna, mibe ligía uéndeni lidan burí fulasu le ñein lubéi wadamuridagua. Ounahóuati lídangiñe budagia le tidoun hani gefentiña luagu Heowá sukursáli lun layusurún lun híderawagun ha asufurirubaña ladüga somu hárabaganali, herigini, hiriri o katei líbeina lira, lun híderawagun misionerugu hama óunigirutiña sirkuitu, lun tábunawagun lúbaana adamuridaguni lidan burí ageiraü gudemeti luma lun imprimírua tan ounahóua tuguya Bíbülia tuma burí agumeiraguagüdüni lidoun burí damuriguaü.

 Kada gürigia desidírübalin anhein líchuguba lubéi budagia lun lafayeirún sun le agastarúbei lidan damuriguaü le ñein lubéi, o lun wadagimanu lánina apurichihani le adügǘbei lidan sun ubóu o anhein líchuguba lubéi budagia lun biángubei katei le. Rúati awisahani lidan kada damuriguaü lun hasubudiruni lílana ka lan adügǘbei lau budagia le ichugúbei.

•   Gafu lánina budagia: Gayaraati híchugun budagia lau híchugun seinsu o chekü tidoun gafu lánina budagia to tídanboun Luban Adamuridaguni, Muna to luntu Adamurini o to lídanboun fulasu le ñein lubéi hadamuridagua.

•  ● Budagia luéigiñe Internet: Anihein burí ageiraü le ídanbei gayara lan hayusuruni páhina “Lichugún budagia houn gefentiña luagu Heowá” lun híchugun budagia tau tárüheta lánina dúeiti, tárüheta lánina seinsu areidúañuti, hásügüragüdün lídangiñe seinsu le húmabei halaürugu lidoun tiseinsun óundaruni o lau amu burí ligaburi lichugún budagia luéigiñe Internet. b Añahein Gefentiña ayusuruti aban lídangiñe igaburi le lun hadügün aransehani lun ladireirúniwa “murusun lídangiñe le [h]agañeirubei” sagü hati lun híchuguni keisi budagia (1 Korintuna 16:2).

•   Budagia le mégeibei aransehani: Lun lichugún budagia lun wadagimanu lánina apurichihani lidan igaburi burí le, mégeiwati aransehani buiti luma lálügüdahoun luma somu gürigia le subudihabúti lun lúrudu. Gayaraati giñe ladügün ligaburi lichugún budagia le lun hasagarun buiti lidan luáguti lafayeihóun liseinsuna gumadi hageira. Gíbeeña gürigia asagarutiña buiti lárigiñe habihin ariñahani luáguti budagia le gayaraabei hadügüni sun wínwangiña lan o le gayaraabei hígiruni keisi alagan. Anhein busén hubéi híchugun budagia lidan aban lídangiñe igaburi le, wa humá o abürüha humá tidoun Beteli to ídangiñeboun larihúa lau hawadigimari gefentiña luagu Heowá lun hamuriahan lanwoun ariñahani:

  •   seinsu le húmabei halaürugu

  •   liseinsuna ichouruni luma hígirawagüdün lídangiñe wadigimanu

  •   huban o hufulasun

  •   hufanran tídangiñe somu kónpeni luma furedeiti le táguyugüdübei hun

  •   dugumedu luáguti alagan le lunbei hígiruni

 Lun hadarirun ariñahani luáguti ligaburi lichugún budagia le lídanbei fulasu le ñein hubéi, heiba lidoun páhina “Lichugún budagia houn gefentiña luagu Heowá.”