Ka uagu midin habéi gefentiña luagu Heowá awuribuha?

GUMESELÁ LIDAN

Mídintiwa, wagía gefentiña luagu Heowá, awuribuha lugundun:

Bungiu íchugubalin gumadi woun. Ariñagatu Bíbülia lidan aban profesía mosu lan hadaagun lubúeingu Bungiu “hu tídangiñe hefeinte [...] mibihin hagíame arufudahani lun wuribu” (Isaíasi 2:4).
Ru laali Hesusu gumadi woun. Ru lumuti Hesusu gumadi le lun apostolu Féduru: “Areidabóun befeinte; ladüga sun ha áfarahatiña tau eféin, tauba giñe eféin hafarúa” (Matéu 26:52). Lau dimurei burí le larufudei Hesusu furangu moun lumuti lan hárügüdün lánigu áruma.

Ariñagati giñe Hesusu “mama [lan] lani ubóu” lani disipulugu. Ligía moun lumuti lubéi hádaragun houngua lidoun polítika (Huan 17:16). Mabuidunti giñe hásurun ariñaga luagu hawadigimari milidaru ni hálugun hafosuruniña amu lun masudarahan hamá.
Mosu hínsiñe hamá gürigia wáledi woun. Ru lumuti giñe Hesusu gumadi le houn lani disipulugu: “Hínsiñegua humá húmagua” (Huan 13:34, 35). Añahein wíbirigu lidan ámuñegueinarügü ageiraü, ani maweiyasuntiña kristiánugu ha inarünitiña árügüda áruma lun háfaraguniña hábirigu (1 Huan 3:10-12).
Mídintiña meha furumiñetiña kristiánugu awuribuha. Ariñagatu aban líburu: “Mídehantiña meha furumiñetiña lánigu Hesusu lidan wuribu maha hagía hasudarahan” ladüga gunfuranda hamani “múaran lan katei burí le luma le larufudahabei Hesusu houn libügürü lunti lan hínsiñe hamá háganiñu houn” (Encyclopedia of Relihión and War). Ariñagati giñe aban alunduna gíriti Edward Gibbon tidan líburu to labürüdüboun: “Masudarahántiña meha kristiánugu [...] ánheingubeirügü hígira eseriwiduni le sagüráutimabei furumiñe” (Historia de la decadencia y caída del Imperio romano).

Barüti ligaburi wóuserun buiti woun súngubei

Gürigia ha barütiña buiti houn lílana hageira gefentiña luagu Heowá ani madügüntiwa ni kata le gayaraati lagidaruni darangilaü le lídanbei ageiraü le ñein lubéi wawinwanda. Inebeti halurudun gumadimatiña woun lugundun gúnfuli wamuti gumadi tídangiñeti Bíbülia le:

“Gaganbadi h[u]má houn gumadimatiña.” (Rómana 13:1.)
Ru humeiti lani urúei lun urúei, ru humeime lani Bungiu lun Bungiu” (Matéu 22:21).

Ligía wagunfulirunbei lau le lariñagubei lilurudun wageira, fayei waméi liseinsuna gumadi, ídeha wagía lidan sun aransehani le hadügübei gumadimatiña lun habuidun guánarügü lílana ageiraü.