Uá, mama fánreinguarügütiwa, wagía gefentiña luagu Heowá, luéi somu relihión le subudiwati. Keisi kristiánugu, adüga wamuti sun wayaraati lun wáyeihani Hesukrístu luma lun wanügüni wabagari kei larufudahani.

 Ámuñegueinarügüti hasaminan gürigia luagu relihión le afanreinragubei luéi burí relihión le subudiwabei. Akutiha wamá bián lídangiñe katei le hasaminarubei gürigia ani ariha waméi ka lan uagu wariñaga madan lániña gefentiña luagu Heowá.

•   Añahein asaminarutiña aban lan iseri relihión. Mama asagaharügütiwa, wagía gefentiña luagu Heowá, aban iseri relihión. Falarügü wamuti igaburi le meha hafalarubei kristiánugu ha meha awinwandubaña lidan furumiñeti sígulu, wínwantiwa kei harufudahani, áyeiha waméi hénpulu le meha hígirubei según waliihani tidan Bíbülia (2 Timotéu 3:​16, 17). Chouru wamuti Lererun lan Bungiu lunbei tariñaguni woun ida luba lan wáhuduragun lun Bungiu.

•   Añahein asaminarutiña aban lan sétanu gürigia denchaatiña wagía ha lábugiñetiña lalidihan somu gürigia. Wagía, gefentiña luagu Heowá, manügüntiwa ni aban gürigia keisi wábuti, lugundun gaganbaditiwa lun Hesusu le ariñagubei houn lani disipulugu: “Krísturügüñein Hábuti” (Matéu 23:10).

 Luéigiñe amu oubaü, madügüntiwa damichi ni ka un, lubaragiñe lira adügarügütiwa katei buiti dandu wóuniwagua kei hawagu amu gürigia ha geyegubaña wau. Kéiburi, íderaguaali uganu buiti le wapurichihabei, saragu gürigia lun hígirun bisiu kéiburi layusurún düroga luma átaguni. Ani lidan sun ubóu, íderaguaadiwa saragu míñunu gürigia lun hafurendeirun aliiha luma abürüha. Lanwoun lira, góudidatiwa íderaguaña gürigia ñein lumuti lasusereda somu hárabaganali, herigini, hiriri o katei líbeina lira. Adüga wamuti sun buiti le wayaraati houn gürigia wáledi, ítara kei larufudahani Hesusu houn lani disipulugu (Matéu 5:​13-​16).